រាជធានីភ្នំពេញ ៖ យុវជនម្នាក់បានស្លាប់ក្នុងមន្ទីរពេទ្យកាល់ម៉ែតកាលពីវេលាម៉ោង៣ និង៣០នាទី ទៀបភ្លឺថ្ងៃទី១០ ខែមីនា ឆ្នាំ២០១១ ក្រោយពីត្រូវក្រុមក្មេងស្ទាវចាក់មួយកាំបិត ខណៈមានទំនាស់ពាក្យសំដីគ្នាពេលរាំធុងបាស់ក្នុងពិធីមង្គលការរបស់បងប្រុសបង្កើតនៅភូមិកណ្តាល ឃុំសាឡុង ស្រុកខ្សាច់កណ្តាល ខេត្តកណ្តាល។ យុវជនដែលស្លាប់នេះឈ្មោះអ៊ិន សំណាង អាយុ២២ឆ្នាំ មានទីលំនៅក្នុងភូមិម្រះព្រៅ ឃុំត្រពាំងស្តៅ ស្រុករមាសហែក ខេត្តស្វាយរៀង។
តាមសាច់ញាតិយុវជនរងគ្រោះបានឱ្យដឹងថា នៅថ្ងៃទី៩ មីនា យុវជនអ៊ិន សំណាង និងសាច់ញាតិបានមកចូលរួមពិធីមង្គលការរបស់បងប្រុសបង្កើតក្នុងភូមិកណ្តាល ឃុំសន្លុង ស្រុកខ្សាច់កណ្តាល ខេត្តកណ្តាល លុះយប់ឡើងក៏មានចាក់ធុងបាស់រាំកំដរោងការ និងជាការស្វាគមន៍ដល់មិត្តភក្តិដែលចូលរួមដោយចាក់សុទ្ធតែបទញាក់កន្ត្រាក់អារម្មណ៍ពីមួយបទទៅមួយបទយ៉ាងសប្បាយ ហើយកូនកំលោះកូនក្រមុំក៏រាំដែរ។
នៅវេលាម៉ោងជាង១១យប់យុវជនអ៊ិន សំណាង បានឡើងរាំជាមួយមិត្តភក្តិ ហើយពេលនោះមានយុវជនមួយក្រុមទៀតដែលគេស្គាល់ថាជាក្រុមក្មេងស្ទាវប្រចាំឃុំសន្លុងចូលរាំបទញាក់ និងជាន់ជើងភាគីជនរងគ្រោះក៏កើតទំនាស់ពាក្យសំដីគ្នាទៅវិញទៅមក ឯម្ចាស់រោងការក៏សុំឱ្យបញ្ឈប់ទំនាស់ និងបន្តការរាំទៀត។ ក្រោយមកយុវជនរងគ្រោះឈប់រាំ ហើយដើរទៅផ្ទះស្នាក់នៅ ប៉ុន្តែទើបចេញផុតពីរោងការបានបន្តិច ស្រាប់តែមានក្មេងស្ទាវពីរនាក់ជិះម៉ូតូមកក្បែរ រួចជនម្នាក់ដែលអង្គុយខាងក្រោយលោតចុះពីលើម៉ូតូដកកាំបិតចាក់ចំក្រោមឆ្អឹងជំនីរខាងឆ្វេងមួយកាំបិតបណ្តាលឱ្យដេកដួលលើដីព្រមទាំងស្រែកឱ្យសាច់ញាតិជួយ រីឯជនដៃដល់នាំគ្នាគេចខ្លួនបាត់ដោយបន្សល់ទុកម៉ូតូនៅកន្លែងកើតហេតុ។
សាច់ញាតិជនរងគ្រោះបញ្ជាក់ថា ភ្លាមៗនោះយុវជនរងគ្រោះត្រូវបានបញ្ជូនទៅមន្ទីរពេទ្យកាល់ម៉ែតដើម្បីសង្គ្រោះជីវិត ក៏ប៉ុន្តែដោយសារមុខរបួសធ្ងន់ធ្ងរពេកជនរងគ្រោះក៏បានស្លាប់នៅវេលាម៉ោង៣ និង៣០នាទីទៀបភ្លឺថ្ងៃទី១០ មីនា ក្រោមសំលេងស្រែកយំរបស់ក្រុមគ្រួសារ ព្រោះយុវជនដែលស្លាប់នេះគឺជាកូនពៅដែលមកចូលរួមមង្គលការបងប្រុសជាកូនទីប្រាំ។ សពជនរងគ្រោះ ត្រូវដឹកយកទៅធ្វើបុណ្យនៅឯស្រុកកំណើត រីឯជនដៃដល់ត្រូវបានស្គាល់អត្តសញ្ញាណ ដែលពេលនេះសមត្ថកិច្ចកំពុងស្រាវជ្រាវតាមចាប់ខ្លួនយកមកផ្តន្ទាទោស ៕
ចែករំលែកព័តមាននេះ