សហរដ្ឋអាមេរិក ៖ ក្រុងវ៉ាស៊ិនតោន បានប្រកាសនាថ្ងៃទី១៤ មិថុនាថា សមយុទ្ធយោធារួមរបស់ខ្លួនជាមួយកូរ៉េខាងត្បូង ចាប់ពីពេលនេះតទៅផ្អាកគ្មានកាលកំណត់ ទោះបីជាទណ្ឌកម្មប្រឆាំងកូរ៉េខាងជើង ដើម្បីបង្ខំប្រទេសនេះឲ្យបោះបង់ចោលជាស្ថាពរ កម្មវិធីអាវុធនុយក្លេអ៊ែររបស់ខ្លួននៅរក្សាទុកក្ដី។
ហើយ២ថ្ងៃក្រោយការប្រកាសគួរឲ្យភ្ញាក់ផ្អើលរបស់ប្រធានាធិបតីអាមេរិក លោកដូណាល់ ត្រាំ បានបញ្ឈប់សមយុទ្ធបង្កហេតុ ក្រោយការជួបគ្នាកំពូលជាប្រវត្តិសាស្ត្រ ជាមួយមេដឹកនាំកូរ៉េខាងជើងលោកគីម ជុងអ៊ុន ចំណែកអ្នកទទួលខុសត្រូវជាន់ខ្ពស់អាមេរិកមួយរូប បានគូសបញ្ជាក់ប្រាប់ AFP ថា សមយុទ្ធយោធាសំខាន់ៗត្រូវផ្អាកគ្មានពេលកំណត់នៅឧបទ្វីបកូរ៉េ។
រដ្ឋមន្ត្រីការបរទេសអាមេរិកលោក MIKE POMPEO បានជួបនៅក្រុងសេអ៊ូលជាមួយសម្ព័ន្ធមិត្តកូរ៉េខាងត្បូង និងជប៉ុន មុនពេលលោកមកកាន់ក្រុងប៉េកាំង ជួបជាមួយប្រធានាធិបតីចិនលោកស៊ីជីន ពីង ដែលស្វាគមន៍ដល់ជោគជ័យនៃការជួបគ្នាកំពូល។នៅក្រុងសេអ៊ូលប្រមុខការទូតអាមេរិក អះអាងជាថ្មីថា ទិសដៅរបស់យើងនៅតែទាមទារឲ្យមានការរំសាយនុយក្លេអ៊ែរទាំងស្រុង អាចត្រួតពិនិត្យបាននិងពុំមានការប្រែក្រឡាស់របស់កូរ៉េខាងជើង។
លោក POMPEO អះអាងម្យ៉ាងទៀតថា ការបញ្ឈប់សមយុទ្ធយោធារួមរវាងក្រុងវ៉ាស៊ីនតោន និងកូរ៉េខាងត្បូង មានលក្ខខណ្ឌគឺបន្តការចរចាដោយស្ថាបនា និងស្មោះសជាមួយកូរ៉េខាងជើង ដើម្បីអនុវត្តកិច្ចព្រមព្រៀងសិង្ហបុរី។ កូរ៉េខាងជើងទាមទារចាប់តាំងពីយូរមកហើយ ឲ្យបញ្ឈប់សមយុទ្ធយោធារួមទាំងនេះ ដែលខ្លួនចាត់ទុកថា ជាការរៀបចំសម្រាប់លុកលុយចូលដែនដីខ្លួន។ ក្រុងព្យុងយ៉ាងតែងមានប្រតិកម្មតប ដោយធ្វើសមយុទ្ធយោធានានារបស់ខ្លួនដែរ៕
ចែករំលែកព័តមាននេះ