រាជធានីភ្នំពេញ ៖ បុរសម្នាក់ស្រវឹងបានបើករថយន្តឡិចស៊ីស RX330 ក្នុងល្បឿនយ៉ាងលឿនហើយជែងគ្នាជាមួយរថយន្តតាក់ស៊ីជ្រុលបុកខឿនពុះចែកទ្រូងផ្លូវ និងបន្តទៅបុកស្លាកប៉ាណូ បណ្តាលអោយបាក់អស់មួយ រួចក្រឡាប់អស់៣ជុំ អ្នកបើកបររងរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទីរំលងអាធ្រាត្រឈានចូលថ្ងៃទី១៥ ខែមិថុនា ឆ្នាំ២០១៨ តាមបណ្តោយផ្លូវជាតិលេខ៦ នៅចំណុចមុខផ្ទះសំណាក់មួយកន្លែង ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញបុរសម្នាក់បើករថយន្តមួយគ្រឿង ម៉ាកឡិចស៊ីស RX330 ពណ៌ស ពាក់ស្លាកលេខ ភ្នំពេញ ២AK-៦៧៧៩ បើកបរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង លុះពេលបើកមកដល់ចំណុចកើតហេតុខាងលើ រថយន្តឡិចស៊ីស RX330 បានបើកជែងជាមួយរថយន្តមួយគ្រឿងម៉ាកសាំយ៉ុងជារថយន្តតាក់ស៊ីរត់តាមខេត្ត ចៃដន្យជែងទៅជែងមកក៏ជ្រុលទៅបុកឡើងលើខឿនសួនច្បារពុះចែកទ្រូងផ្លូវ ហើយក៏ជ្រុលបន្តទៅបុកស្លាកប៉ាណូទៀត បណ្តាលឱ្យរថយន្តឡិចស៊ីស RX330 ក្រឡាប់ផ្ងារជើងឡើងលើអស់៣ជុំ ចំណែកអ្នកបើកបរបានរងរបួសធ្ងន់ រីឯរថយន្តឡិចស៊ីស RX330 ខ្ទេចអស់មួយកំណាត់មុខ ក្រពឹតដំបូលរថយន្តអស់ស្ទើរទាំងស្រុង និងបាក់ស្លាកប៉ាណូអស់មួយផ្ទាំង សំណាងល្អហើយដែលមិនមានរថយន្ត និងម៉ូតូធ្វើដំណើរកាត់តាមទីនោះ កុំអីមិនដឹងថា មានមនុស្សស្លាប់អស់ប៉ុន្មាននាក់នោះទេ ភ្លាមៗនោះដែរ អ្នកបើកបររថយន្តដែលរងរបួសធ្ងន់ត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន។
ក្រោយពេលកើតហេតុ រថយន្តឡិចស៊ីស RX330 ត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ