រាជធានីភ្នំពេញ ៖ បុរសម្នាក់បើករថយន្តហាយឡេនឌ័រ ពណ៌ស ហើយម្ចាស់រថយន្តច្រឡំដាក់លេខខុសរួចក៏ថយក្រោយជ្រុលទៅបុកស្លាកយីហោ និងបង្គោលភ្លើងបណ្តាលអោយវៀចអស់មួយបង្គោល ខូចខាតរថយន្តខ្ទេចអស់មួយកំណាត់ខាងក្រោយ ហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៥ ខែមិថុនា ឆ្នាំ២០១៨ តាមបណ្តោយផ្លូវជាតិលេខ៥ ស្ថិតនៅក្នុងសង្កាត់ស្រះចក ខណ្ឌដូនពេញ ។
សាក្សីដែលឃើញហេតុការណ៍បានអោយដឹងថា មុនពេលគេបានឃើញបុរសម្នាក់បើករថយន្តមួយគ្រឿងម៉ាកហាយឡេនឌ័រ ពណ៌ស ពាក់ស្លាកលេខ ភ្នំពេញ ២AN-១៧៤២ បើកបរតាមបណ្តោយផ្លូវជាតិលេខ៥ក្នុងទិសដៅពីត្បូងទៅជើង ។
ខណៈពេលបើកមកដល់ចំណុចកើតហេតុខាងលើម្ចាស់រថយន្តហាយឡេនឌ័រច្រឡំដាក់លេខថយក្រោយជ្រុលជាន់ហ្គាទៅបុកស្លាកយីហោ និងបង្គោលភ្លើងបណ្តាលអោយបាក់វៀចខូចខាតយ៉ាងដំណំ តែមិនបង្កអោយមានគ្រោះថ្នាក់ដល់អាយុជីវិតនោះឡើយ ចំណែកឯរថយន្តបង្កវិញរងការខូចខាតខ្ទេចអស់គូទក្រោយ និងបែកកញ្ចក់ខាងក្រោយរួមនឹងវៀចកង់ក្រោយ ។
ភ្លាមៗនោះដែលរថយន្តបង្កបម្រុងនឹងបើករត់គេចខ្លួន ប៉ុន្តែសំណាងអាក្រក់អីបើករត់បាន១០ម៉ែត្រទៅមុខលែងរួច ។ ក្រោយពេលកើតហេតុរថយន្តបង្កត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ