រាជធានីភ្នំពេញ ៖ កម្ពុជាកាន់តែឈានឡើងមួយកម្រិតទៀតនៅលើឆាកអន្តរជាតិ ហើយនឹងធ្វើឲ្យគេស្គាល់កាន់តែច្រើន បន្ទាប់ពីបានក្លាយជាសមាជិកក្រុមប្រឹក្សាសេដ្ឋកិច្ច និងសង្គមរបស់អង្គការសហប្រជាជាតិ ដោយទទួលបានសំឡេង១៨៣ ក្នុងចំណោមសំឡេងសរុប ១៨៨ កាលពីពេលថ្មីៗនេះ ។
ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានបញ្ជាក់ថា ការណ៍នេះ នឹងធ្វើឲ្យកម្ពុជាទទួលបានកេរ្តិ៍ឈ្មោះបន្ថែមនៅលើឆាកអន្តរជាតិ ច្រើនជាងផលប្រយោជន៍សេដ្ឋកិច្ច តែយ៉ាងណាក៏ដោយ ប្រយោជន៍សេដ្ឋកិច្ចនឹងទទួលបាននៅពេលបន្តបន្ទាប់ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានឲ្យដឹងថា នេះគឺជាកិត្តិយសមួយសម្រាប់ជាតិ ដែលពិភពលោកទទួលស្គាល់កម្ពុជា និងអនុញ្ញាតឲ្យកម្ពុជាធ្វើសកម្មភាពនេះនៅលើពិភពលោក ហើយវាក៏ជារឿងល្អប្រសើរសម្រាប់កម្ពុជាធ្វើកិច្ចការជួយពិភពលោក ដើម្បីកសាងកេរ្តិ៍ឈ្មោះ។ លោកថា ៖« វាគឺជារឿងល្អសម្រាប់ការទូត នយោបាយ និងមុខមាត់ប្រទេស ហើយវាក៏មានតិចតួចដែរសម្រាប់ផលប្រយោជន៍សេដ្ឋកិច្ចប្រទេសកម្ពុជា តែជំហានដំបូងគេ ជាកេរ្តិ៍ឈ្មោះ និងមុខមាត់ » ។ លោកបន្តថា កាលពីមុន អង្គការសហប្រជាជាតិតែងតែជួយដល់កម្ពុជា ពីព្រោះកម្ពុជាទើបតែងើបពីភ្លើងសង្គ្រាម និងមិនទាន់មានសមត្ថភាពអាចជួយខ្លួនឯងបាន ។ ពេលនោះអាចនិយាយបានថា កម្ពុជាគ្រាន់តែជាអ្នកឈរមើលពីខាងក្រៅសង្វៀននៅក្នុងសកម្មភាពរបស់អង្គការសហប្រជាជាតិប៉ុណ្ណោះ ហើយក៏មិនអាចជួយអ្វីបានដែរ ។ តែពេលនេះ ដោយសារកម្ពុជាអាចមានសមត្ថភាពក្នុងការចូលរួមជាមួយអង្គការសហប្រជាតិ ទើបអង្គការនេះបានអនុញ្ញាតឲ្យកម្ពុជាចូលរួមជាមួយនៅក្នុងសង្វៀនប្រយុទ្ធលើការងារមនុស្សធម៌ និងការងារអភិវឌ្ឍន៍ផ្សេងទៀតនៅលើពិភពលោក ។
លោកបន្ថែមថា អ្វីដែលកម្ពុជាត្រូវធ្វើក្រោយពេលប្រទេសសមាជិកផ្ដល់ទំនុកចិត្តឲ្យធ្វើជាអនុប្រធាននៅក្នុងក្រុមប្រឹក្សាសេដ្ឋកិច្ច និងសង្គម គឺកម្ពុជាត្រូវចែករំលែកនូវអ្វីដែលខ្លួនបានធ្វើកន្លងមកទៅដល់បណ្ដាប្រទេសផ្សេងទៀត ។ លោកមានប្រសាសន៍ថា ៖« អ្វីដែលយើងត្រូវធ្វើនោះ គឺចែកចាយមេរៀនដល់ប្រទេសកំពុងអភិវឌ្ឍន៍ផ្សេងទៀត និងឆ្លៀតពេលផ្សព្វផ្សាយពីខ្លួនឯងឲ្យគេស្គាល់ផងដែរ ហើយបើសិនជាយើងមានឱកាសផ្សព្វផ្សាយហើយ បែរជាមិនខំផ្សព្វផ្សាយ និងមិនខំធ្វើនូវអ្វីដែលខ្លួននិយាយ ក៏គេមិនជឿនោះដែរ ។ អ្វីៗគ្រប់យ៉ាង គឺត្រូវតែធ្វើឲ្យគេ មិនមែនទៅនិយាយឲ្យគេស្ដាប់ឡើយ » ។
លោកបណ្ឌិតបញ្ជាក់ថា នេះគឺជាឱកាសល្អណាស់សម្រាប់កម្ពុជា ក្នុងការផ្សព្វផ្សាយពីខ្លួនថា តើខ្លួនមានអ្វីខ្លះសម្រាប់ឲ្យគេយកគំរូតាម តែគំរូនោះជាគំរូដែលមានប្រសិទ្ធភាព នៅពេលគេធ្វើតាមហើយ គឺត្រូវតែតាមដានគេឲ្យបានហ្មត់ចត់ ។ លោកថា ៖« ដោយសារតែសមាជិករបស់អង្គការសហប្រជាជាតិ ជាប្រទេសកំពុងអភិវឌ្ឍន៍ ហើយនៅពេលគេឃើញប្រទេសណាមានស្ថានភាពអភិវឌ្ឍន៍លេចធ្លោជាងគេ គេនឹងជ្រើសរើសប្រទេសនោះសម្រាប់ធ្វើជាគំរូដល់ប្រទេសដទៃទៀត ។ ជាក់ស្ដែង កម្ពុជានាពេលនេះ ក៏ត្រូវបានអង្គការសហប្រជាជាតិជ្រើសរើសសម្រាប់ជាអនុប្រធានក្រុមប្រឹក្សាសេដ្ឋកិច្ច និងសង្គម របស់អង្គការអន្តរជាតិមួយនេះដែរ» ។
គួរបញ្ជាក់ថា កាលពីដើមខែមិថុនា ឆ្នាំ២០១៨នេះដែរ កម្ពុជាក៏ត្រូវបានគេជ្រើសរើសធ្វើជាអនុប្រធានមហាសន្និបាតអង្គការសហប្រជាជាតិ លើកទី៧២ នៃឧត្តមក្រុមប្រឹក្សាសន្តិសុខនៃអង្គការសហប្រជាជាតិ ។ ដូចនេះ កម្ពុជាកំពុងតែឈានជើងកាន់តែខ្លាំងនៅក្នុងឆាកអន្តរជាតិ ៕
ចែករំលែកព័តមាននេះ