ខេត្តត្បូងឃ្មុំ ៖ គ្រាន់តែរឿងរង្វាន់ធំតែOISHI ត្រូវបានរថយន្តម៉ាក FORD RANGER XLT ដែលមានតម្លៃជាង៤ម៉ឺនដុល្លារ ធ្វើឱ្យអ្នកបម្រើការងារ២នាក់នៅហាងខារ៉ាអូខេវិមានទ្រព្យ ស្ថិតក្នុងភូមិម៉ាស៊ីនទឹក ឃុំមេមត់ ស្រុកមេមត់ ដណ្តើមគ្នាយ៉ាងស្វិតស្វាញ និងធ្វើឱ្យថៅកែខារ៉ាអូខេលោក ស៊ិន ម៉ៅ ត្រូវគេរិះគន់យ៉ាងចាស់ដៃ ដោយសារស្តាប់តែភាគីម្ខាងចោទថាស៊ីដាច់ និងល្បីស្ទើរពេញប្រទេសកម្ពុជា ។ ទោះបីជាបែបណា ក្រោយរលកនៃការតវ៉ាគ្នាទីបំផុតដំណោះស្រាយឈ្នះ-ឈ្នះ ក៏ត្រូវបានភាគីទាំង២ដែលដណ្តើមគ្នាថា ជាម្ចាស់គម្របដបតែOISHI ឯកភាពគ្នាតាមរយៈសមត្ថកិច្ចធ្វើការសម្របសម្រួល ក្រោយពេលបញ្ជូនមកកាន់ស្នងការដ្ឋាននគរបាលខេត្ត នាព្រឹកថ្ងៃទី ១៤ ខែមិថុនា ។
ភាគីទាំង២នាក់បានយល់ព្រមយកដំណោះស្រាយឈ្នះ-ឈ្នះ គឺទទួលយក៥០ភាគរយម្នាក់ ធ្វើឱ្យពួកគេត្រូវរ៉ូវគ្នា និងសន្យាមិនមានការគុំកួនគ្នានោះទេ ។ អ្នកបង្ហោះហ្វេសប៊ុកឈ្មោះ ហែម និមល អាយុ២៥ឆ្នាំ និយាយថា ដោយសារជីវភាពក្រីក្រ រូបគេនិងប្រពន្ធបានមកស៊ីឈ្នួលនៅហាងខារ៉ាអូខេខាងលើ ចំណែកម្តាយវិញស៊ីឈ្នួលលាងចានឱ្យគេនៅខេត្តព្រះសីហនុ ។ កាលពីយប់ថ្ងៃទី២៦ ខែឧសភា កន្លងទៅ គេបានយកលុយទៅទិញតែOISHI ចំនួន២ដបមកផឹក ហើយឈ្មោះ តាន់ ជាអ្នកបើកត្រូវរង្វាន់រថយន្ត ធ្វើឲ្យពួកគេមានសេចក្តីត្រេកអរខ្លាំងណាស់ និងបានយកគម្របដបនោះទៅសួរនាំអ្នកលក់គេប្រាប់ថា ពិតជាត្រូវរង្វាន់ធំមែន ទើបមួយយប់ទល់ភ្លឺដេកមិនលក់ទេ ។
ហែម និមល និយាយទៀតថា លុះព្រឹកឡើងឈ្មោះ តាន់ មានបំណងទៅរាជធានីភ្នំពេញដើម្បីបើកយករង្វាន់ តែរូបគេឃាត់មិនឱ្យទៅ និងបានសន្យាចែកគ្នា៥០ភាគរយម្នាក់ តែក្រោយមកបែរជាគិតផ្សេង ទើបមានរឿងវែងឆ្ងាយបែបនេះ ។ ហែម និមល រៀបរាប់ទៀតថា ក្នុងពេលសមត្ថកិច្ចព្យាយាមដោះស្រាយនៅអធិការដ្ឋាននគរបាលស្រុកមេមត់ គឺមិនត្រូវរ៉ូវគ្នានទេ ។ លុះមកដល់ព្រឹកថ្ងៃទី១៤ ខែមិថុនា ពួកគេបាន
ធ្វើដំណើរតាមរថយន្តមកដោះស្រាយនៅស្នងការដ្ឋាននគរបាលខេត្ត ។
ដោយមានការណែនាំពីលោកអធិការ លោកនាយការិយាល័យព្រហ្មទណ្ឌកម្រិតស្រាលខេត្ត និងលោក ស្នងការនគរបាលខេត្តដែលបានពន្យល់ពីហេតុផល ទើបធ្វើឱ្យពួកគេយល់ព្រមទទួលយកនូវដំណោះស្រាយ៥០ភាគរយម្នាក់ៗ ។ សម្រាប់រង្វាន់ដែលបានមកនោះ នឹងយកទៅចាត់ចែងដោះស្រាយជីវភាពគ្រួសារ ឯចំពោះរូបគេនឹងយកលុយទៅទិញគោចិញ្ចឹម លក់គ្រឿងទេស និងទិញសម្ភារឱ្យប្រពន្ធបើកអ៊ុតសក់ ។ចំណែកឈ្មោះ សែន កាណាន់ ហៅតាន់ អាយុ២៦ឆ្នាំ ដែលពិការជើងម្ខាង ដោយគ្រោះថ្នាក់ចរាចរណ៍ ហើយដែលជាអ្នកបើកគម្របដបត្រូវរង្វាន់ធំ និងមានជីវភាពក្រីក្រដូចគ្នា និយាយថា សម្រាប់ដំណោះស្រាយខាងលើនេះ រូបគេពេញចិត្តនឹងទទួលយក ។ នៅពេលបានរង្វាន់មកនឹងលក់បែងចែកគ្នា ហើយនឹងយកទៅសាងសង់ផ្ទះឱ្យម្តាយនៅស្រុកសំរោង ខេត្តតាកែវ ។ ចំណែកលុយនៅសល់រូបគេក៏ចង់ឱ្យម្តាយជួយស្តីដណ្តឹងប្រពន្ធឱ្យផងដែរ ។
រឿង រ៉ាត្រូវរង្វាន់ធំតែOISHI ដែលតភាគ៣ថ្ងៃជាប់គ្នានេះក៏បានដល់ទីបញ្ចប់ហើយដែរ និងមានតែបួង សួងសូមឱ្យបំណងរបស់ពួកគេទាំង២នាក់បានសម្រេចដូចក្តីប្រាថ្នាផងចុះ ។
ចែករំលែកព័តមាននេះ