រាជធានីភ្នំពេញ លោក ពេជ្រ ស្រស់ ថាកូនស្រីលោក កឹម សុខា កំពុងធ្វើឱ្យឪពុកបន្តជាប់ឃុំគ្មានថ្ងៃចេញ ដោយសារតែយកសាំងចាក់លើភ្លើងប្រធានគណបក្សយុវជនកម្ពុជាលោក ពេជ្រ…
រាជធានីភ្នំពេញ លោក ពេជ្រ ស្រស់ ថាកូនស្រីលោក កឹម សុខា កំពុងធ្វើឱ្យឪពុកបន្តជាប់ឃុំគ្មានថ្ងៃចេញ ដោយសារតែយកសាំងចាក់លើភ្លើងប្រធានគណបក្សយុវជនកម្ពុជាលោក ពេជ្រ ស្រស់ និយាយថា កូនស្រីលោក កឹម សុខា គឺកញ្ញា កឹម មនោវិទ្យា បាននិងកំពុងធ្វើឱ្យឪពុករបស់ខ្លួនបន្តជាប់ឃុំគ្មានថ្ងៃចេញបន្ថែមទៀត ។ ការលើកឡើងរបស់ប្រធានគណបក្សយុវជនកម្ពុជានេះ គឺបន្ទាប់ពីកញ្ញា កឹម មនោវិទ្យា បានជំរុញឱ្យសហរដ្ឋអាមេរិកមានចំណាត់ការលេីការបំពានសិទ្ធិមនុស្សនៅកម្ពុជា បន្ថែមនូវចំណាត់ការផ្សេងៗទៀត ។
លោក ពេជ្រ ស្រស់ បានឱ្យដឹងនៅថ្ងៃទី១៤ ខែមិថុនាថា «មិនមែនជាដំណោះស្រាយល្អទេនាងអើយ ហើយក៏មិនមែនជាដំណោះស្រាយរបស់នាង ដើម្បីឱ្យឪពុកនាងនៅក្រៅឃុំបាននោះដែរ គឺរឹតធ្វើឱ្យឪពុកនាងបន្តជាប់ឃុំគ្មានថ្ងៃចេញថែមទៀត ។ ខ្មែរឱ្យតែយ៉ាងនេះ គឺគ្មានថ្ងៃទៅមុខរួចនោះទេ គ្មាននរណាម្នាក់អាចដោះស្រាយបញ្ហាផ្ទៃក្នុង ក្រៅពីខ្មែរគ្នាឯងនោះឡើយ» ។
ក្នុងជំនួបជាមួយជាមួយលេាក ស្កត់ បាស់ប៊ី (Scott Busby) ឧបការីរងក្រសួងការបរទេសសហរដ្ឋអាមេរិក ទទួលបន្ទុកសិទ្ធិមនុស្ស កាលពីថ្ងៃទី១៣ ខែមិថុនា កញ្ញា កឹម មនោវិទ្យា បានថ្លែងអំណរគុណក្រសួងការបរទេសសហរដ្ឋអាមេរិក ដែលបានជំរុញឱ្យមានចំណាត់ការលេីការបំពានសិទ្ធិមនុស្សនៅកម្ពុជា ។
កញ្ញា កឹម មនោវិទ្យា ក៏បានស្នេីឲ្យសហរដ្ឋអាមេរិកបន្ត និងបន្ថែមនូវចំណាត់ការផ្សេងៗទៀត ក្នុងគេាលបំណងជំរុញឱ្យប្រទេសកម្ពុជា ត្រឡប់មកដេីរលេីគន្លងប្រជាធិបតេយ្យវិញ ដេីម្បីឱ្យមានសន្តិភាព និងការបង្រួមបង្រួមជាតិយូរអង្វែង ឈរលេីមូលដ្ឋានគេារពគ្នាទៅវិញទៅមក ។
លោក ពេជ្រ ស្រស់ បានលើកឡើងថា ក្នុងកាលៈទេសៈនេះ ខ្មែរគ្រប់និន្នាការនយោបាយទាំងអស់ គួរនាំគ្នាជ្រោងទង់ជាតិខ្មែរ ដើម្បីប្រឆាំងឥទ្ធិពលអាក្រក់របស់បរទេស ។ លោកបញ្ជាក់ថា «ខ្ញុំ ពេជ្រ ស្រស់ សូមអំពាវនាវដល់បងប្អូនជនរួមជាតិខ្មែរ នៅគ្រប់និន្នាការនយោបាយទាំងអស់ គួរតែនាំគ្នាជ្រោងទង់ជាតិខ្មែរ ដើម្បីប្រឆាំងឥទ្ធិពលអាក្រក់របស់បរទេស ពីព្រោះថាវាមិនមានប្រយោជន៍ដល់ប្រជាជាតិខ្មែរនោះទេ នៅពេលដែលប្រជាជាតិខ្មែរយើងបែកបាក់គ្នានោះ គឺធ្វើឱ្យបរទេសឆ្លៀតឱកាសបំផ្លាញខ្មែរទៅវិញ» ។
ការលើកឡើងរបស់លោក ពេជ្រ ស្រស់ នេះបន្ទាប់ពីសហរដ្ឋអាមេរិកបានដាក់លោកនាយឧត្តមសេនីយ៍ ហ៊ីង ប៊ុនហៀង មេបញ្ជាការកងអង្គរក្សរបស់សម្តេចតេជោនាយករដ្ឋមន្ត្រី ហ៊ុន សែន បញ្ចូលទៅក្នុងបញ្ជីខ្មៅនៃបុគ្គលដែលត្រូវរងទណ្ឌកម្មក្រោមច្បាប់ក្លូប៊ល ម៉ែកនីតស្គី ដោយចោទថាបានចូលដៃក្នុងការរំលោភសិទ្ធិមនុស្ស និងប្រជាធិបតេយ្យនៅកម្ពុជា ៕
ចែករំលែកព័តមាននេះ