គួរងាកមកសាកល្បងដាំទំពាំងបារាំង ព្រោះមានទីផ្សារខ្ពស់
- កំពង់ឆ្នាំង
ខេត្តកំពង់ឆ្នាំង ៖ ទំពាំងបារាំង ជាបន្លែមួយប្រភេទ អាចហូបស្រស់ ឬយកទៅឆា ស្ល និងស្ងោរក៏បាន ។ ក្រៅពីនេះ…
ខេត្តកំពង់ឆ្នាំង ៖ ទំពាំងបារាំង ជាបន្លែមួយប្រភេទ អាចហូបស្រស់ ឬយកទៅឆា ស្ល និងស្ងោរក៏បាន ។ ក្រៅពីនេះ…
ខេត្តកំពង់ឆ្នាំង ៖ ទំពាំងបារាំង ជាបន្លែមួយប្រភេទ អាចហូបស្រស់ ឬយកទៅឆា ស្ល និងស្ងោរក៏បាន ។ ក្រៅពីនេះ ទំពាំងបារាំងនៅអាចព្យាបាលជំងឺដូចជា ខ្លាញ់រុំបេះដូង សម្ពាធសរសៃឈាម និងធ្វើឲ្យសាច់ចាំទៀតផង ។ បច្ចុប្បន្ននេះ គេលក់នៅលើទីផ្សារតម្លៃ១ម៉ឺនរៀលក្នុង១គីឡូក្រាម ។ វាជាដំណាំងាយស្រួលដាំ និងមានអាយុកាលយូរអង្វែង ដូច្នេះកសិករដាំបន្លែគួរសាកល្បងដើម្បីពង្រីករបរបន្ថែម ។
បើតាមកសិកររស់នៅភូមិត្រពាំងស្បូវ ឃុំស្រែថ្មី ស្រុករលាប្អៀរ អ្នកស្រី ទេព វ៉ាន់ថុន ដែលធ្លាប់ដាំដំណាំ និងបន្លែបង្ការផ្សេងៗ បានរៀបរាប់ថា ដោយសារតែអ្នកស្រីបានទទួលព័ត៌មានពីអត្ថប្រយោជន៍ជាច្រើននៃដើមទំពាំងបារាំងនេះ ទើបអ្នកស្រីសម្រេចចិត្តដាំជាការសាកល្បង ដោយបានទៅរៀនបច្ចេកទេសដាំដុះពីខេត្តបាត់ដំបង ។ អ្នកស្រីបន្ដថា បានទទួលយកចំណេះដឹងបង្ហាត់បង្ហាញពីលោកគ្រូនៅទីនោះ អំពីវិធីសាស្ត្រដាំដុះ ការថែទាំ ការដាក់ជី និងពីគុណប្រយោជន៍យ៉ាងច្រើនរបស់ដើមទំពាំងបារាំងនេះ ទើបអ្នកស្រីសម្រេចចិត្តទិញពូជមកដាំដុះដោយខ្លួនឯង រួមជាមួយកូនប្រុស។
អ្នកស្រីបញ្ជាក់ថា ៖« សារប្រយោជន៍នៃដើមទំពាំងបារាំងនេះ គឺអាចធ្វើជាបន្លែហូបស្រស់ក៏បាន ជាបន្លែសម្រាប់ឆា ស្ល និងស្ងោរក៏បានដែរ។ ក្រៅពីនេះ ទំពាំងបារាំងនៅអាចព្យាបាលជំងឺដូចជា ខ្លាញ់រុំបេះដូង សម្ពាធសរសៃឈាម និងធ្វើឲ្យសាច់ចាំទៀតផង។ ចំណែកការដាំដុះរហូតដល់ទទួលផល គឺមានរយៈពេល៦ខែ ប៉ុន្តែរយៈពេលត្រឹម៤ខែ យើងអាចទទួលផលបណ្តើរៗហើយ តែត្រឹមដល់រយៈពេល៦ខែ គឺដើមទំពាំងធំ និងថ្លោសល្អជាង »។ អ្នកស្រីលើកឡើងថា ៖« ដើមទំពាំងបារាំងមានអាយុកាលច្រើនឆាំ្នណាស់សម្រាប់ការប្រមូលផល គឺរហូតដល់១៥ឆ្នាំឯណោះ គ្រាន់តែយើងថែទាំនិងកាត់ដើមចាស់ចេញ ទុកឲ្យដើមថ្មីដុះជាបន្តបបន្ទាប់ »។
អ្នកស្រីបន្ដថា សព្វថ្ងៃមានក្រុមហ៊ុនចាំទទួលទិញយកទៅប្រទេសថៃ ក្នុង១គីឡូក្រាមតម្លៃ៣ពាន់រៀល ប៉ុន្តែអ្នកស្រីមិនលក់ឲ្យ ព្រោះថា បើយកទៅលក់នៅផ្សារដោយខ្លួនឯង យ៉ាងហោចណាស់ ក៏១គីឡូក្រាមបាន១ម៉ឺនរៀលដែរ ។ អ្នកស្រី ទេព វ៉ាន់ថុន អះអាងថា ៖« ខ្ញុំធ្លាប់គេដាក់តម្លៃនៅតាមផ្សារទំនើប ដោយចងជាដុំត្រឹមប៉ុនកំភួនដៃ មានទម្ងន់ពីប្រហែល៣ឬ៤ខាំ តម្លៃ១ម៉ឺន៥ពាន់រៀល ។ ចំណែកនៅផ្សារអុីអន ថ្លៃដល់១០ដុល្លារឯណោះ »។
សូមបញ្ជាក់ថា ពូជទំពាំងបារាំងត្រូវបាននាំចូលពីប្រទេសថៃ ។ ទំពាំងបារាំង ឬតាថុកទេស មានឈ្មោះបច្ចេកទេស ASPARAQUS គឺជាបន្លែដែលគ្មានសារជាតិពុល គ្មានអាស៊ីត គ្មានសារធាតុខ្លាញ់ដូចទំពាំងស្រុកទេ ប៉ុន្តែទំពាំងបារាំង គឺជាប្រភេទចំណីអាហារដែលមានផ្ទុកសារធាតុ និងវីតាមីនអាចថែទាំសុខភាពបានល្អ។ នេះបើយោងតាមឯកសារសហគមន៍កសិកម្មខេត្តប៉ៃលិន ៕
ចែករំលែកព័តមាននេះ