រាជធានីភ្នំពេញ ៖ បុរសម្នាក់ជិះម៉ូតូសណ្តោងរ៉ឺម៉កមួយគ្រឿងបត់ឆ្វេង ខ្វះការប្រុងប្រយត្ន័ ក៍ត្រូវបុរសម្នាក់ទៀតជិះម៉ូតូឌ្រីមសង់មួយគ្រឿងជ្រុលទៅបុកចំពាក់កណ្តាលពេញទំហឹង បណ្តាលអោយអ្នកទាំងពីររងរបួសទាំងសង្ខាង ហេតុការណ៍នេះបានកើតឡើងកាលពីវេលាម៉ោង៣និង១០នាទីឈានចូលថ្ងៃទី១៥ ខែមិថុនា ឆ្នាំ២០១៨ ស្ថិតនៅចំណុចផ្លូវវ៉េងស្រេង កែងនឹងផ្លូវ៣៧១សូឡា សង្កាត់ស្ទឹងមានជ័យ១ ខណ្ឌមានជ័យ ។
តាមប្រភពព័ត៌មានពីកន្លែងកើតបានអោយដឹងថា មុនពេលកើតហេតុ គេបានឃើញបុរសម្នាក់វ័យជាង២០ឆ្នាំ ជិះម៉ូតូសណ្តោងរ៉ឺម៉កមួយគ្រឿង ម៉ាកហុងដាវ៉េវ ពណ៌ខ្មៅ ធ្វើដំណើរតាមផ្លូវវ៉េងស្រេងក្នុងទិសដៅពីលិចទៅកើត លុះមកដល់ចំណុចកើតហេតុ បានបត់ឆ្វេងឡើងទៅផ្លូវ៣៧១សូឡា ពេលដែលម៉ូតូសណ្តោងរ៉ឺម៉កនោះបត់ឆ្លងបានពាក់កណ្ដាលផ្លូវ ក៏ស្រាប់តែមានបុរសម្នាក់វ័យជាង២០ឆ្នាំដូចគ្នា បានជិះម៉ូតូមួយគ្រឿង ម៉ាកឌ្រីមសង់ ស៊េរីឆ្នាំ ២០១២ ពណ៌ខ្មៅ ពាក់ស្លាកលេខ កំពង់ឆ្នាំង ១B-៣៥១៣ បានធ្វើដំណើរតាមផ្លូវ វ៉េងស្រេង ក្នុងទិសដៅ ពីកើតទៅលិច ក្នុងល្បឿនលឿន ព្រមទាំងខ្វះការប្រុងប្រយត្ន័ដូចគ្នា បានជ្រុលទៅបុកនិងម៉ូតូសណ្តោងរ៉ឺម៉កចំពាក់កណ្តាលពេញទំហឹង បណ្តាលឱ្យម៉ូតូសណ្តោងរ៉ឺម៉កក្រឡាប់ផ្ងារជើងមួយចំហៀង និងធ្វើអោយអ្នកបើកបររងរបួស បែកមុខ និងប៉ោងភ្នែកខាងស្តាំ ចំណែកម៉ូតូសណ្តោងរ៉ឺម៉កនោះរងការខូចខាតបែកចំហៀងខាងស្តាំ។ ដោយឡែកភាគីខាងម៉ូតូឌ្រីមសង់វិញ រងការខូចខាត បាក់កាត់តាប៊ូ និងវៀចខ្នង រីឯអ្នកបើកម៉ូតូ រងរបួសបែកចិញ្ចើមចំហៀងខាងឆ្វេង ។
ភ្លាមៗនោះដែរ រថយន្តសង្គ្រោះបានមកដឹកជនរងគ្រោះដែរ តែជនរងគ្រោះមិនព្រមឡើងរថយន្តសង្គ្រោះនោះទេ គឺសុខចិត្តអង្គុយទាំងឈឺ ដើម្បីសម្របសម្រួលគ្នា ។
ក្រោយពេលកើតហេតុ ភាគីទាំសង្ខាងបានសម្របសម្រួលគ្នា ដោយសុខចិត្តយកម៉ូតូទៅជួលជុល និងព្យាបាលរបួស រៀងៗខ្លួនដើម្បីបញ្ចប់រឿង ៕
ចែករំលែកព័តមាននេះ