រាជធានីភ្នំពេញ ៖ ស្ត្រី២នាក់បានសាងស្នេហ៍ និងរស់នៅជាមួយគ្នាជាប្ដីប្រពន្ធក្រោមដំបូលផ្ទះតែមួយ តែក្រុមគ្រួសារខាងតួអង្គស្រីមិនពេញចិត្ត និងជំទាស់អស់រយៈពេល៧ឆ្នាំមកហើយ ទីបំផុត ក៏ឈានដល់ការចាប់បំបែក និងបង្កឱ្យមានការភ្ញាក់ផ្អើលឡើង ។…
រាជធានីភ្នំពេញ ៖ ស្ត្រី២នាក់បានសាងស្នេហ៍ និងរស់នៅជាមួយគ្នាជាប្ដីប្រពន្ធក្រោមដំបូលផ្ទះតែមួយ តែក្រុមគ្រួសារខាងតួអង្គស្រីមិនពេញចិត្ត និងជំទាស់អស់រយៈពេល៧ឆ្នាំមកហើយ ទីបំផុត ក៏ឈានដល់ការចាប់បំបែក និងបង្កឱ្យមានការភ្ញាក់ផ្អើលឡើង ។ ខណៈនោះ ដោយសារកូនស្រីមិនព្រមទៅតាមសម្រួល ក៏នាំគ្នាចាប់សែងលើកដាក់បញ្ចូលក្នុងរថយន្តតែម្ដង រួចបើកចេញទៅផ្ទះនៅឯខេត្តកំពង់ស្ពឺបាត់ស្រមោលទៅ ដោយទុកឱ្យតួអង្គប្រុសអង្គុយយំដោយសារព្រាត់ពីប្រពន្ធជាទីស្រឡាញ់ ។ ហេតុការណ៍នេះ បានកើតឡើងកាលពីវេលាម៉ោង០៤ និង១៥នាទីល្ងាចថ្ងៃទី១៣ មិថុនា នៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ ។
តាមប្រភពព័ត៌មានឱ្យដឹងថា តួអង្គប្រពន្ធឈ្មោះ ឈាង វី អាយុ២៥ឆ្នាំ ជាកម្មការិនីរោងចក្រកាត់ដេរ មានស្រុកកំណើតនៅភូមិស្តុក ឃុំស្វាយចចឹប ស្រុកបរសេដ្ឋ ខេត្តកំពង់ស្ពឺ ។ ចំណែកតួអង្គប្ដីឈ្មោះ វ៉ាត់ សុខន អាយុ៣៥ឆ្នាំ ជាកម្មការិនីនៅរោងចក្រកាត់ដេរជាមួយគ្នា និងមានទីលំនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ ។
ប្រភពដដែលឲ្យដឹងទៀតថា គូស្នេហ៍ភេទដូចគ្នានេះ មានមនោសញ្ចេតនានិងភាពស្មោះត្រង់រវាងគ្នានឹងគ្នាមិនចាញ់ប្ដីប្រពន្ធផ្ទុយភេទប្រុសនិងស្រីនោះឡើយ ។ អ្នកទាំងពីរបានសច្ចាយកគ្នាជាប្ដីប្រពន្ធ និងរស់នៅជាមួយគ្នាអស់មួយជីវិតក្រោមដំបូលផ្ទះខាងតួអង្គប្រុស ។ ចំពោះគូស្នេហ៍ភេទដូចគ្នានេះដែរ សម្រាប់ឪពុកម្ដាយនិងក្រុមគ្រួសារខាងតួអង្គប្រុសមិនបានបំបែកបំបាក់កូនទេ ហើយបានចាត់ទុកថា ជាកម្មពៀរនិងនិស្ស័យគូព្រេងរបស់កូនដែលស្រឡាញ់ភេទដូចគ្នាបែបនេះទៅចុះ ។
ប៉ុន្តែចំពោះឪពុកម្ដាយក្រុមគ្រួសារខាងតួអង្គស្រីវិញ មិនដូច្នោះឡើយ តែងតែស្ដីប្រដៅកុំឱ្យកូនធ្វើបែបនេះ ព្រោះនាំឱ្យវង្សត្រកូលគ្រួសារទទួលរងភាពអាម៉ាស់ និងតែងអូសទាញយកកូនស្រីត្រឡប់ទៅផ្ទះវិញជារឿយៗ ។ ប៉ុន្តែទោះជាខំប្រឹងយ៉ាងណា ក៏កូនស្រីមិនតាមឡើយ ព្រោះនាងបានសម្រេចចិត្តរស់នៅជាប្ដីប្រពន្ធជាមួយស្ត្រីតួអង្គប្រុសរហូតចាស់កោងខ្នងរួចទៅហើយ និងមិនយកបុរសណាធ្វើជាប្តីឡើយ ។
ប្រភពដដែលបន្តថា ការស់នៅរួមសុខរួមទុក្ខជាមួយគ្នារយៈពេល៧ឆ្នាំ ពិតជាមិនធម្មតានោះទេ មានអនុស្សាវរីយ៍គ្រប់រសជាតិមិនអាចបំភ្លេចបាន រហូតធ្វើឱ្យអ្នកទាំង២ស្រឡាញ់គ្នាកាន់តែខ្លាំងឡើងៗ ។ ដោយឡែក ឪពុកម្ដាយខាងតួអង្គស្រី ដោយអត់ទ្រាំនឹងភាពអាម៉ាស់លែងបាន ទើបសម្រេចចិត្តលើកគ្នាទៅនាំកូនស្រីត្រឡប់ទៅផ្ទះវិញ ធ្វើយ៉ាងណាត្រូវតែនាំទៅឱ្យខាងតែបាន ។នៅពេលទៅដល់ ឪពុកម្ដាយបាននាំកូនស្រីរួមទាំងតួអង្គប្រុសទៅកាន់ប៉ុស្តិ៍នគរបាល ដើម្បីសម្របសម្រួលគ្នា សុំយកកូនស្រីត្រឡប់ទៅផ្ទះវិញ ប៉ុន្តែពេលនោះកូនស្រីបានប្រកែកដាច់អហង្ការថា មិនទៅចោលប្ដីសំណព្វចិត្តនាងឡើយ ។ ដោយគ្មានជម្រើស ទើបឪពុកម្ដាយក្រុមគ្រួសារសម្រេចចិត្តចាប់សែងកូនស្រីលើកដាក់បញ្ចូលទៅក្នុងរថយន្ត១គ្រឿង ដឹកចេញទៅបាត់ ។
ខណៈនោះដែរ តួអង្គប្រុសបានស្រែកឱ្យនគរបាលជួយឃាត់ កុំឱ្យឪពុកម្ដាយខាងតួអង្គស្រីនាំយកកូនត្រឡប់វិញ តែនគរបាលគ្មានសិទ្ធិហាមឃាត់ឡើយ ហើយទីបំផុតតួអង្គប្រុស បានត្រឹមអង្គុយសោកាទាំងក្ដីអស់សង្ឃឹម ។ នេះជារឿងរ៉ាវមួយ ដែលច្បាប់ស្តីពីអាពាហ៍ពិពាហ៍ និងគ្រួសារដែលមានជាធរមាន មិនបានចែងពីការស្រឡាញ់ភេទដូចគ្នានេះទេ គឺមានន័យថា មិនមានគតិច្បាប់ណាមួយ សម្រាប់គាំពារដល់មនុស្សភេទដូចគ្នា អាចមានសិទ្ធិយកគ្នាជាគូស្នេហ៍ស្របច្បាប់ឡើយ ។ ទោះបីជាបែបណា ពួកគេគួរតែមានសិទ្ធិរបស់ខ្លួន ដោយមិនស្ថិតនៅក្នុងការបង្ខិតបង្ខំឡើយ ។ គេបានមើលឃើញថា ប្រសិនបើពួកគេជាបុរសនិងស្ត្រី នោះក្រុមគ្រួសារមិនមានសិទ្ធិធ្វើបែបនេះឡើយ ផ្ទុយទៅវិញពួកគេជានារីភេទដូចគ្នា ៕
ចែករំលែកព័តមាននេះ