ការប្រកួតដែលនឹងធ្វើឱ្យកក្រើកក្នុងព្រឹត្តិការណ៍ World Cup នារាត្រីនេះ គឺការប៉ះគ្នារវាងសត្រូវចាស់វស្សាមកពីទ្វីបអឺរ៉ុបដូចគ្នានោះគឺ ក្រុមបញ្ចខែលព័រទុយហ្គាល់ ត្រូវតតាំងជាមួយក្រុមគោជល់អេស្ប៉ាញ ដើម្បីសន្សំពិន្ទុបន្តក្តីស្រមៃរៀងខ្លួនឡើងទៅវគ្គបន្ត ។ ព័រទុយហ្គាល់…
ការប្រកួតដែលនឹងធ្វើឱ្យកក្រើកក្នុងព្រឹត្តិការណ៍ World Cup នារាត្រីនេះ គឺការប៉ះគ្នារវាងសត្រូវចាស់វស្សាមកពីទ្វីបអឺរ៉ុបដូចគ្នានោះគឺ ក្រុមបញ្ចខែលព័រទុយហ្គាល់ ត្រូវតតាំងជាមួយក្រុមគោជល់អេស្ប៉ាញ ដើម្បីសន្សំពិន្ទុបន្តក្តីស្រមៃរៀងខ្លួនឡើងទៅវគ្គបន្ត ។
ព័រទុយហ្គាល់ ៖ តើអ្នកណាមិនធ្លាប់ស្គាល់ព័រទុយហ្គាល់? ហើយរឹតតែស្គាល់ច្បាស់ទៅទៀតនោះគឺ Christiano Ronaldo ដែលធ្វើឱ្យពិភពលោកស្គាល់ប្រទេសនេះរឹតតែច្បាស់ ។ ជាពិសេស គឺព័រទុយហ្គាល់ទើបតែលើកពានរង្វាន់បាល់ទាត់ទ្វីបអឺរ៉ុបក្តៅៗនេះឯង ។ បើនិយាយពីបទពិសោធន៍នៅ World Cup គឺជោកជាំមែនទែន ព្រោះពួកគេបានចូលរួមព្រឹត្តិការណ៍នេះ៦ដងមកហើយៗធ្វើបានល្អបំផុតនៅឆ្នាំ១៩៦៦ ដោយបានចំណាត់ថ្នាក់លេខ៣ បន្ទាប់មកនៅឆ្នាំ២០០៦បានចំណាត់ថ្នាក់លេខ៤ ។ យ៉ាងណាមិញ វត្តមានចុងក្រោយនៅ World Cup រដូវកាលមុន ព័រទុយហ្គាល់មិនបានឆ្លងផុតវគ្គចែកពូលនោះទេ ។
អេស្ប៉ាញ ៖ ក្រុមគោជល់មួយនេះ រឹតតែល្បីល្បាញថែមទៀតហើយ ដោយធ្លាប់ចូលរួម World Cup ដល់ទៅ១២ដង និងធ្លាប់ក្លាយជាជើងឯកម្តងផងដែរកាលពីឆ្នាំ២០១០ ។ ក្រុមមួយនេះ គឺជាបន្លាក្នុងកែវភ្នែកគ្រប់ក្រុមទាំងអស់ ហើយក៏ជាបេក្ខភាពមួយក្នុងចំណោមក្រុមឯទៀតដែលអាចលើកពានកំពូលនេះនៅរុស្ស៊ីទៀតផង ដោយសារតែពួកគេសំបូរកីឡាករឆ្នើមជាច្រើនរូប ។ យ៉ាងណាមិញ វត្តមាននៅ World Cup រដូវកាលមុន ក៏អេស្ប៉ាញធ្លាក់ត្រឹមវគ្គចែកពូលដូចព័រទុយហ្គាល់ដែរ ។
*ក្រុមខ្លាំងទាំងពីរនេះ ធ្លាប់ជួបគ្នាចំនួន៣៦លើកមកហើយ គឺអេស្ប៉ាញឈ្នះ១៨ ស្មើ១២ និងចាញ់៦លើក ។ រីឯប្រវត្តិប៉ះគ្នានៅ World Cup វិញ ពួកគេធ្លាប់ជួបគ្នាតែ៣ដងប៉ុណ្ណោះ គឺនៅវគ្គជម្រុះបឋមទ្វីបអឺរ៉ុប២ដងកាលឆ្នាំ១៩៣៤ ដែលអេស្ប៉ាញឈ្នះទាំងពីរលើក ខណៈមួយលើកចុងក្រោយនៅវគ្គ១៦ក្រុមឆ្នាំ២០១០ ក៏អេស្ប៉ាញយកឈ្នះផងដែរក្នុងលទ្ធផល១ទល់០ ។
ទន្ទឹមនឹងនេះ គេហទំព័រទស្សន៍ទាយកីឡាក៏បានទាយថា នារាត្រីនេះ អេស្ប៉ាញនឹងយកឈ្នះបន្តទៀតដោយលទ្ធផល២ទល់១បើទោះជាពេលនេះក្រុមគោជល់មួយនេះកំពុងជួបចលាចលរឿងផ្លាស់ប្ដូរគ្រូបង្វឹកភ្លាមៗបែបនេះក្ដី ៕
ចែករំលែកព័តមាននេះ