រាជធានីភ្នំពេញ ៖ បុរសជនជាតិខ្មែរឥស្លាមម្នាក់ បានស្លាប់ភ្លាមៗនៅនឹងកន្លែង និង យុវជនដែលជាជនជាតិខ្មែរឥស្លាមដូចគ្នាបានរងរបួសធ្ងន់ ខណៈពេលដែលអ្នកទាំងពីរជិះម៉ូតូ ម៉ាកស៊ុយហ្ស៊ុយគីនិច១គ្រឿង ឌុបគ្នាចេញពីផ្ទះជួលប្រញាប់ទៅចូលរួមស្រាយបួសជាមួយក្រុមគ្រួសារ នៅផ្ទះឯខេត្តកំពង់ឆ្នាំង។ ខណៈនោះបានគេចម៉ូតូសណ្ដោងរ៉ឺម៉ក១គ្រឿង ដែលឈប់លើចិញ្ចើមផ្លូវក៏ត្រូវ បានរថយន្តដឹកកុងតឺន័រ១គ្រឿងទៅដល់បុកពីក្រោយពេញទំហឹងតែម្ដង។ បន្ទាប់មករថយន្តបង្កបាន បើករត់ចម្ងាយប្រហែល២គីឡូម៉ែត្រទើបឈប់ ហើយអ្នកបើកបរបានរត់គេចខ្លួនបាត់។
ឧប្បត្តិហេតុ គ្រោះថ្នាក់ចរាចរណ៍ដែលបណ្ដាលឲ្យមនុស្សស្លាប់ និងរងរបួសនោះបានកើតឡើងកាលពីវេលាម៉ោង ៤ និង៣០នាទីល្ងាច ថ្ងៃទី១៤ ខែមិថុនា ឆ្នាំ២០១៨ នៅលើកំណាត់ផ្លូវបេតុង៣០ម៉ែត្រ ស្ថិតនៅក្នុងភូមិព្រៃកំបុត សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។ តាមប្រភពព័ត៌មានបានឲ្យដឹងថា បុរសដែលស្លាប់នោះឈ្មោះ ទៀត លី អាយុ២៧ឆ្នាំ មានទីលំនៅក្នុងភូមិឈូកស ឃុំឈូកស ស្រុកំពង់ត្រឡាច ខេត្តកំពង់ឆ្នាំង។ ចំណែកអ្នករងរបួសឈ្មោះ សឹម អូស្មាន អាយុ១៨ឆ្នាំ ភូមិស្វាយបាកាវ ឃុំតាជេស ស្រុកកំពង់ត្រឡាច ខេត្តកំពង់ឆ្នាំង គឺជាអ្នកបើកបរម៉ូតូ។ ដោយឡែករថយន្តបង្កពាក់ស្លាកលេខ ភ្នំពេញ3A-1694 ហើយអ្នកបើកបររត់គេចខ្លួនបាត់ស្រមោល។
ប្រភពដដែលបានបន្តទៀតថា នៅមុនពេលកើតហេតុ ជនរងគ្រោះទាំង២នាក់បានជិះម៉ូតូម៉ាកស៊ុយហ្ស៊ុយគីនិច ពណ៌ទឹកប្រាក់ ពាក់ស្លាកលេខ កំពង់ឆ្នាំង1H-9230។ ធ្វើដំណើរក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ បានគេចម៉ូតូសណ្ដោងរ៉ឺម៉ក១គ្រឿង ដែលកំពុងឈប់លើចិញ្ចើមផ្លូវ ហើយក៏ត្រូវបានរថយន្តបង្កបើកបរស្របគ្នាទៅដល់បុកពីក្រោយបណ្ដាលឲ្យស្លាប់ និងរបួសបែបនេះតែម្ដង។ ក្រោយពេលកើតហេតុ សាកសពត្រូវក្រុមគ្រួសារនាំយកទៅធ្វើបុណ្យ តាមប្រពៃណី ចំណែករថយន្ត និងម៉ូតូត្រូវនគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញនាំយកទៅរក្សាទុករង់ចាំការដោះស្រាយនៅពេលក្រោយ៕
ចែករំលែកព័តមាននេះ