ថៃ ៖ តាមប្រភពព័ត៌មាន Oddity Central បានឲ្យដឹងថា ម្ចាស់ភោជនីយដ្ឋានលក់អាហារសមុទ្រមួយកន្លែងក្នុងទីក្រុងបាំងកក ប្រាប់ពីគន្លឹះអាជីវកម្មដែលធ្វើឲ្យលោកជោគជ័យមកដល់សព្វថ្ងៃនេះ។
លោក Veerasak Maesa អាយុ៣៤ឆ្នាំ ដែលជាម្ចាស់ហាងគ្រឿងសមុទ្រ Staneemeehoi បានប្រាប់ថា ហាងរបស់លោកមានមុខមកដល់សព្វថ្ងៃនេះ ដោយសារតែមានអ្នករត់តុជាខ្ទើយសាច់ដុំ។ តាមពិតទៅពួកគេមិនមែនជាខ្ទើយទេ គេគ្រាន់តែស្លៀកពាក់ជាស្រី ដើម្បីឲ្យអតិថិជនមានភាពសប្បាយរីករាយតែប៉ុណ្ណោះ។
លោកប្រាប់ថា កាលពីមុនលោកមិនដែលគិតថា ចង់បើកហាងនោះទេ។ លោកគិតថា បើបើកហាងទាល់តែមានអ្វីខុសគេ ទើបអាចទាក់អតិថិជនបាន។ ក្រោយមកលោកក៏គិតឃើញថា នឹងដាក់ឲ្យមានអ្នករត់តុជាប្រុសសាច់ដុំ ហើយស្លៀកពាក់ជាស្រី ដើម្បីឲ្យភ្ញៀវសើចសប្បាយពេលមកហាងរបស់លោក។ ដោយសារតែគំនិតនេះ ទើបហាងលោកមានភ្ញៀវច្រើនបែបនេះ ដល់ថ្នាក់ថា មានអ្នកចង់មកសុំទិញឈ្មោះទៅបើកនៅកន្លែងផ្សេងទៀត។ ពេលនេះ លោកនៅស្ទាក់ស្ទើរនៅឡើយ ព្រោះខ្លាចគេធ្វើមិនដូចលោកគ្រប់គ្រងខ្លួនឯង។
គួរបញ្ជាក់ផងដែរថា ហាងខាងលើទើបតែបើកបាន២ឆ្នាំតែប៉ុណ្ណោះ។ ដំបូងឡើយ លោក Maesa ប្រុងនឹងបិទហាង ព្រោះតែភ្លៀងធ្វើឲ្យគ្មានភ្ញៀវមកទទួលទាន។ តែក្រោយពីភ្លៀងមក ហាងលោកក៏ចាប់មានមនុស្សជាច្រើន ហើយល្បីដល់ថ្នាក់អន្តរជាតិតាមបណ្តាញសង្គម៕ វីដេអូឃ្លីបដកស្រង់ចេញពី ៖Toff Meister
ចែករំលែកព័តមាននេះ