ខេត្តបាត់ដំបង ៖ កិច្ចប្រជុំកែសម្រួលការហ្វឹកហ្វឺនត្រៀមព្យុះហយាត្រាអបអរសាទររំលឹកថ្ងៃកំណើតគំរប់លើកទី៣០ឆ្នាំ របស់អង្គភាពយោធភូមិភាគទី៥ បានចាប់ផ្តើមប្រមូលផ្តុំហ្វឹកហាត់ពីថ្ងៃទី១០ ខែមិថុនា ឆ្នាំ២០១៨ និងត្រូវធ្វើនៅថ្ងៃទី២៨ ខែមិថុនា ឆ្នាំ២០១៨ នៅទីបញ្ជាការយោធភូមិភាគទី៥ ការហ្វឹកហ្វឺនរបស់កងកម្លាំងមានចំនួន១៦០៥នាក់ បែងចែកជា៣០ផែន ដោយមានផែនថ្មើរជើងចំនួន១៥ផែន និងផ្នែកគ្រឿងចក្រចំនួន១៥ផែន ចំណុះឲ្យយោធភូមិភាគទី៥ បានហ្វឹកហ្វឺន លំហាត់របៀបក្នុងយុទ្ធដំណើរទ័ព ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ដោយមានការជួយសម្រួលពីលោកឧត្តមសេនីយ៍ទោ អួន សារឿន មេបញ្ជាការរងកងទ័ពជើងគោក នាយការិយាល័យហ្វឹកហ្វឺនកងទ័ពជើងគោក និងលោកឧត្តមសេនីយ៍ទោ ឯក សំអូន មេបញ្ជាការរង នាយសេនាធិការយោធភូមិភាគទី៥ ដែលជាមេបញ្ជាការកងកម្លាំងព្យុះហយាត្រា ។
លោកឧត្តមសេនីយ៍ទោ ឯក សំអូន បានរាយការណ៍ថា ក្នុងការហ្វឹកហាត់លើកទី១បានធ្វើកាលពីម្សិលមិញគឺជាការត្រួតពិនិត្យមើលរកភាពត្រឹមត្រូវតាមក្បួនយុទ្ធសាស្ត្ររបស់កងទ័ព ហើយយើងបានខិតខំនេះគឺជាការរំលឹកដឹងគុណដែលពលី ពិការ និងនិវត្តជន ដល់អតីតយុទ្ធជនយើងកាលពីសម័យមានសង្គ្រាម ហើយឆ្នាំនេះជាឆ្នាំលើកទី៣០ ដែលលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានរំលឹកជាប្រវត្តិសាស្ត្រសម្រាប់ទឹកដីតំបន់នេះជាតំបន់ក្តៅផ្នែកសង្គ្រាមពីអតីតកាលយូរលង់ណាស់មកហើយ ។
លោកបន្តថា កម្លាំងកំពុងហ្វឹកហ្វឺនទាំងអស់នេះគឺមកពីតំបន់សឹករងបាត់ដំបង ពោធិសាត់ ប៉ៃលិន និងបន្ទាយមានជ័យ និងកងរាជអាវុធហត្ថ កងកម្លាំងនគរបាល កងពលតូចថ្មើរជើងលេខ៥១-៥២ និង៥៣ ព្រមទាំងកងការពារព្រំដែនទាំងអស់ ទាំងផ្នែករថពាសដែក កងកាំភ្លើងធំ កងការពារអាកាស កងវិស្វកម្ម អង្គភាពអភិវឌ្ឍន៍ វរស៊ើបការណ៍ អង្គភាពមន្ទីពេទ្យយោធា ដែលទាំងអស់នេះចំណុះឲ្យយោធភូមិភាគទី៥ទាំងអស់បានមកចូលរួម ។
លោកឧត្តមសេនីយ៍ទោ អួន សារឿន មេបញ្ជាការរងនាយកហ្វឹកហ្វឺនកងទ័ពជើងគោកបានគាំទ្ររាល់សកម្មភាពនៃការហ្វឹកហ្វឺន ហាត់របៀបនេះពិតជាអាចទទួលយកបាន ព្រោះត្រឹមត្រូវតាមក្បួនយុទ្ធសាស្ត្រយោធា ហើយរាល់ការកែសម្រួលបន្ថែមទៀតគឺសុំធ្វើទៅតាមរបស់លទ្ធភាពរបស់យោធភូមិភាគទី៥ចុះ ព្រោះកន្លងមកយោធភូមិភាគទី៥ គឺជាអង្គភាពគំរូល្អលើសគេក្នុងការអនុវត្តន៍កាតព្វកិច្ចយោធាបានយ៉ាងល្អប្រសើរលើទូទាំងយោធភូមិភាគដ៏ទៃៗទៀតក្នុងព្រះរាជាណាចក្រកម្ពុជា ៕
ចែករំលែកព័តមាននេះ