រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសានបានអះអាងមន្ត្រីជាន់ខ្ពស់សិទ្ធិមនុស្សអាមេរិកកំពុងតែលូកដៃចូលក្នុងកិច្ចផ្ទៃក្នុងរបស់កម្ពុជាជាការរំលោភរដ្ឋធម្មនុញ្ញអង្កការសហប្រជាជាតិ (អ.ស.ប) ។ លោកសុខ ឥសានបានឲ្យដឹងតាមប្រព័ន្ធតេឡេក្រាមនៅថ្ងៃទី១៤ មិថុនា ថា ជនបរទេសចេះតែចង់លូកដៃចូលកិច្ចការផ្ទៃក្នុងរបស់ប្រទេសកម្ពុជាដែលជារដ្ឋឯករាជ្យ និងមា នអធិបតេយ្យ ។
លោកបញ្ជាក់ថា «ធម្មនុញ្ញ អ.ស.ប បានកំណត់មិនឲ្យមានការលូកដៃចូលកិច្ចការផ្ទៃក្នុងផងគ្នា ។ ប៉ុន្តែជនបរទេសខ្លះនៅតែរំលោភធម្មនុញ្ញនេះដែលមានអ្នកខ្លះតាំងខ្លួនថា ជាមេសិទ្ធិមនុស្ស ក៏នៅតែរំលោភធម្មនុញ្ញ អ.ស.ប ដោយមិនគិតពីការរំលោភដែនឯករាជ្យ និងអធិបតេយ្យតភាពរបស់ប្រទេសដទៃ ។ ជាការគួរឲ្យខ្មាស់អៀនណាស់ដែលមេសិទ្ធិមនុស្ស ប៉ុន្តែរំលោភសិទ្ធិមនុស្សនោះ»។
សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីមន្ត្រីសិទ្ធិមនុស្សរបស់សហរដ្ឋអាមេរិកបានបញ្ជាក់ថា មន្ត្រីយោធាជាន់ខ្ពស់ខ្មែរជាច្រើនរូបទៀត នឹងចូលបញ្ជីខ្មៅរបស់អាមេរិកនៅពេលឆាប់ៗ ខាងមុខនេះ ។
លោក ប្រ៊ែដ អាដាម (Brad Adams)នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស អន្តរជាតិយូមែនរ៉ៃត៍វ៉ច្ឆ (Human Rights Watch) ត្រូវបានវិទ្យុអាស៊ីសេរីស្រង់សំដីផ្សាយកាលពី ថ្ងៃទី១៣ ខែមិថុនាថា មន្ត្រីយោធាជាន់ខ្ពស់ដែលលេចធ្លោក្នុងការរំលោភសិទ្ធិមនុស្សធ្ងន់ធ្ងរដែលអាមេរិក ត្រូវដាក់ទណ្ឌកម្មជាបន្តបន្ទាប់ គឺគ្មាននរណាក្រៅពីមនុស្សជំនិតរបស់សម្តេចតេជោហ៊ុន សែនរួមមាន លោកគន់ គីម គឺជាអគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទលោក សៅ សុខាបច្ចុប្បន្នជាមេបញ្ជាការនៃកងរាជអាវុធហត្ថលើផ្ទៃប្រទេស និងអគ្គមេបញ្ជាការរងនៃកងយោធពលខេមរភូមិន្ទទើបតែត្រូវបានតែងតាំងឲ្យឡើងទៅជាអគ្គមេបញ្ជាការស្តីទីនៃកងយោធពលខេមរភូមិន្ទ ជំនួសលោកប៉ុល សារឿនដែលជាអគ្គមេបញ្ជាការនៃកងយោធពលខេមរភូមិន្ទ និងមន្ត្រីជាច្រើនទៀត ។
សូមជម្រាបថា បានសម្រេចដាក់លោកឧត្តមសេនីយ៍ ហ៊ីង ប៊ុនហៀងចូលក្នុងបញ្ជីខ្មៅដោយត្រូវបាន ការិយាល័យកិច្ចការសាធារណៈនៃនាយកដ្ឋានរតនាគារអាមេរិកប្រកាសដាក់បញ្ចូល ទៅក្នុងបញ្ជីខ្មៅនៃបុគ្គលដែលត្រូវរងទណ្ឌកម្មក្រោមច្បាប់ហ្គ្លោប៊លម៉ែកនីតស្គី (GLOBAL MAGNITSKY) ដោយសារតែការចូលដៃក្នុងការរំលោភសិទ្ធិមនុស្ស និងប្រជាធិបតេយ្យនៅកម្ពុជា ។ សហរដ្ឋអាមេរិករកឃើញថា លោកហ៊ីង ប៊ុនហៀងរំលោភសិទ្ធិមនុស្សធ្ងន់ធ្ងរក្នុងរយៈពេលជាច្រើនឆ្នាំចុងក្រោយនេះរួមទាំងអំពើហិង្សានៅឆ្នាំ២០១៣នៅក្បែរវត្តភ្នំ និងអំពើ ហិង្សាវាយដំតំណាងរាស្ត្របក្សប្រឆាំងពីររូបនៅមុខរដ្ឋសភានៅឆ្នាំ២០១៥ ។ រតនាគារអាមេរិកនឹងចាត់វិធានការទាំងឡាយ ដើម្បីបង្កទ្រព្យសម្បត្តិឬផលប្រយោជន៍ ផ្សេងទៀតដែលពាក់ព័ន្ធនឹងលោកហ៊ីង ប៊ុនហៀង ។ មិនត្រឹមតែបង្កទ្រព្យសម្បត្តិ លោក ហ៊ីង ប៊ុនហៀងប៉ុណ្ណោះទេ សហរដ្ឋអាមេរិកក៏នឹងហាមឃាត់ជនជាតិអាមេរិក ឯទៀតមិនឲ្យរកស៊ី ឬទាក់ទងជាមួយលោក ហ៊ីង ប៊ុនហៀងនោះឡើយ ៕
ចែករំលែកព័តមាននេះ