រាជធានីភ្នំពេញ ៖ គណបក្សប្រជាធិបតេយ្យមូលដ្ឋានបានអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតអញ្ជើញទៅបោះឆ្នោតឲ្យបានគ្រប់គ្នា ដោយកុំស្តាប់តាមការអំពាវនាវរបស់លោកសម រង្ស៊ីអតីតប្រធានគណបក្សសង្គ្រោះជាតិថា ដេកផ្ទះឈ្នះឯង ។ លោកសាម អ៊ីនអ្នកនាំពាក្យគណបក្សប្រជាធិបតេយ្យមូលដ្ឋានបានឲ្យដឹងនៅថ្ងៃទី១៤ ខែមិថុនា ឆ្នាំ២០១៨ថា «បើលោកអ្នកចង់ឈ្នះសម្តេចនាយករដ្ឋមន្ត្រីហ៊ុន សែន ហើយគិតថា ត្រូវដេកនៅផ្ទះដោយទុកចង្អុលដៃអ្នកឲ្យនៅស្អាត អ្នកកំពុងគិតខុសបែបភាន់ច្រឡុំហើយ ។
ផ្លូវឈ្នះគាត់មានតែមួយគត់ គឺនាំគ្នាទៅបោះឆ្នោតឲ្យភ្លូកទឹកភ្លូកដីគូសសន្លឹកឆ្នោតខុសពីបក្សប្រជាជន រួចហើយទម្លាក់សន្លឹកឆ្នោតរបស់អ្នកក្នុងហិបឆ្នោត ជួយតាមដានការរាប់សន្លឹកឆ្នោតរបស់អ្នក និងត្រៀមខ្លួនទទួលយកសិទ្ធិអំណាចចេញពីសន្លឹកឆ្នោតផ្លាស់ប្តូររបស់អ្នក» ។ គួររឮកថា ការលើកឡើងរបស់អ្នកនាំពាក្យគណបក្សមូលដ្ឋាននេះ បន្ទាប់ពីលោក សម រង្ស៊ីបានធ្វើការអំពាវនាវពលរដ្ឋកុំអញ្ជើញទៅបោះឆ្នោតនៅថ្ងៃទី២៩ ខែកក្កដា ឆ្នាំ ២០១៨ ខាងមុខនេះ ដោយដេកនៅផ្ទះឈ្នះឯង ។យ៉ាងណាក្តីការអំពាវនាវនេះត្រូវបានមន្ត្រីជាន់ខ្ពស់ក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោតថា ជាគំនិតបំបែកបំបាក់ជាតិ និងជាអំពើញុះញង់ដែលត្រូវទទួលទោសតាមច្បាប់ ។
សម្តេចក្រឡាហោម ស ខេងឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រកាស ថា ក្រសួងមហាផ្ទៃកំពុងតែរកវិធានការណ៍តាមផ្លូវច្បាប់ ចំពោះជនដែលធ្វើការអំពាវនាវពលរដ្ឋកុំទៅបោះឆ្នោតនៅពេលខាងមុខនេះព្រោះថា ការអំពាវានាវនេះជាអំពើល្មើសច្បាប់រដ្ឋធម្មនុញ្ញ និងច្បាប់ដែលមានធរមាន ។ លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោតធ្លាប់បានអះអា ថា គ.ជ.បនឹងមានចាត់វិធានការតាមច្បាប់ចំពោះជនដែលអំពាវនាវកុំឲ្យពលរដ្ឋទៅបោះឆ្នោតនៅពេលខាងមុខនេះផងដែរ ។ លោកថា អ្នកដែលអំពាវនាវនឹងត្រូវផាកពិន័យច្បាប់បោះឆ្នោតចំនួន៥លានរៀលទៅ២០លានរៀលដោយមិនគិតពីច្បាប់ព្រហ្មទណ្ឌ ។ ការបោះឆ្នោតជ្រើសតាំងតំណាងរាស្ត្រអាណត្តិទី៦នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះដោយការបោះឆ្នោតលើកនេះ មានគណបក្សនយោបាយចំនួន២០ បានឈរឈ្មោះប្រកួតប្រជែងសន្លឹកឆ្នោត ។ សម្រាប់ការបោះឆ្នោតអាណត្តិទី៦នេះ មានបេក្ខជនពេញសិទ្ធិមានចំនួន១៩៧២នាក់ និងបេក្ខជនបំរុងមានចំនួន២១៥៤នាក់ ៕
ចែករំលែកព័តមាននេះ