រាជធានីភ្នំពេញ ៖ បុរសចំណាស់ម្នាក់បានដើរលេងផឹកស៊ីយប់រហូតស្រវឹងធ្លាក់ភ្នែក លុះដល់មិនស្រួលខ្លួនក៏មិនត្រឡប់ទៅផ្ទះឱ្យប្រពន្ធកូនកោសខ្យល់ឱ្យទេ តែបានចូលទៅក្នុងហាងម៉ាស្សាកោសជប់មួយកន្លែង នៅក្នុងភូមិជាមួយគ្នានោះដែរ ដើម្បីឱ្យម្ចាស់ហាងម៉ាស្សានិងកោស
ខ្យល់ឱ្យទៅវិញ ។
ខណៈនោះស្ត្រីជាប្រពន្ធដែលមានអាយុប្រហែលជាង៥០ឆ្នាំ ដឹងថាប្ដីចូលទៅក្នុងហាងម៉ាស្សាដែលទំនងជាមានគេប្រាប់ ក៏កើតការប្រចណ្ឌនិងក្ដៅចិត្តឆ្អិតទ្រូងយ៉ាងខ្លាំង រួចនាំកូន២នាក់រួមជាមួយបុរសម្នាក់ទៀត សម្រុកចូលទៅវាយស្ត្រីម្ចាស់ហាងបណ្ដាលឱ្យរងរបួសជាំមុខជាំភ្នែក ដោយចោទប្រកាន់ថា ស្ត្រីរូបនេះលួចសហាយស្មន់ជាមួយប្តីរបស់ខ្លួន ។ ហេតុការណ៍នេះ កើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី១១ ខែមិថុនា នៅក្នុងហាងម៉ាស្សាកោសជប់មួយ ស្ថិតនៅជិតផ្សារបុរីញូវថោន ក្នុងភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ ។
ស្ត្រីជាម្ចាស់ហាងម៉ាស្សាកោសជប់នោះ មិនត្រូវបានស្គាល់ឈ្មោះទេ មានអាយុប្រហែល៣០ឆ្នាំ រងរបួសជាំភ្នែកនិងផ្ទៃមុខខាងស្តាំ ។ នាងបានធ្វើដំណើរទៅកាន់ប៉ុស្ដិ៍ចោមចៅ៣ ដាក់ពាក្យប្ដឹង
សុំឱ្យនគរបាលជួយរកយុត្តិធម៌ កាលពីវេលាល្ងាចថ្ងៃទី១២ ខែមិថុនា ហើយក៏ទទួលបានសំណងចំនួន៨០០ដុល្លារពីខាងភាគីបង្កហេតុ ។ ចំណែកស្ត្រីដៃដល់ និងប្ដីដែលចូលទៅម៉ាស្សាកោសជប់ ព្រមទាំងកូនៗនិងបក្សពួក មិនត្រូវបានបង្ហាញអត្តសញ្ញាណឲ្យដឹងទេ ប៉ុន្តែគឺជាអ្នករស់នៅក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។
ម្ចាស់ហាងម៉ាស្សាកោសជប់ខាងលើនិយាយថា មុនពេលកើតហេតុមានបុរសស្រវឹងស្រាម្នាក់ ជិះម៉ូតូ១គ្រឿងទៅឈប់នៅមុខហាងរបស់នាង ដែលខណៈនោះនាងបានបិទទ្វារសម្រាកទៅហើយ។ បុរសនោះបានស្រែកហៅឲ្យនាងបើកទ្វារ ម៉ាស្សាកោសជប់ឱ្យ ពេលនោះក៏មានការរារែកក្នុងចិត្តមិនចង់បើកទ្វារទេ ប៉ុន្តែនឹកឃើញថា មុខរបរតែប៉ុណ្ណឹងបើម៉ូយមករកហើយមិនធ្វើក៏មិនកើតដែរ ក៏បើកទ្វារម៉ាស្សាកោសខ្យល់ឱ្យបុរសនោះក្នុងតម្លៃ១ម៉ឺនរៀល ។ ប៉ុន្តែអ្វីដែលនឹកស្មានមិនដល់នោះ គឺក្នុងពេលកំពុងម៉ាស្សា ស្រាប់តែប្រពន្ធរួមទាំងកូនរបស់បុរសនោះ ព្រមទាំងបុរសម្នាក់ទៀតបានទៅគោះទ្វារហៅ ។ ពេលនាងទៅបើកទ្វារ ក៏ត្រូវស្ត្រីនោះរួមទាំងកូនៗព្រួតគ្នាវាយនាងឥតប្រណីបណ្ដាលឱ្យរងរបួសតែម្ដង ។ ពួកគេចោទប្រកាន់ថា នាងលួចសហាយស្មន់ជាមួយប្ដីរបស់គេ ទោះបីមើលឃើញច្បាស់នឹងភ្នែកនូវស្លាកយីហោម៉ាស្សាកោសជប់ហើយក៏ដោយ ។ បន្ទាប់មកស្ត្រីដៃដល់ក៏បាននាំប្ដីរួមទាំងកូននិងបក្សពួក ចេញទៅវិញបាត់អស់ទៅ ។
មន្ត្រីនគរបាលនិយាយថា ក្រោយពេលកើតហេតុ ជនរងគ្រោះមិនបានប្ដឹងភ្លាមៗទេ គឺរហូតដល់ល្ងាចថ្ងៃទី១២ ខែមិថុនា ទើបទៅដាក់ពាក្យប្ដឹងនៅប៉ុស្តិ៍ចោមចៅ៣ ហើយនគរបាលប៉ុស្តិ៍បានហៅភាគីដៃដល់ទៅជួបដោះស្រាយគ្នា ប៉ុន្តែមិនឃើញបុរសជាប្ដីទៅឡើយ ។ ខណៈនោះជនរងគ្រោះបានទាមទារសំណងជំងឺចិត្តចំនួន១ពាន់ដុល្លារ ហើយក៏មានការចរចាគ្នា តែស្ត្រីជាប្រពន្ធនៅតែចោទប្រកាន់នាងម៉ាស្សានោះថាជាសហាយស្មន់របស់ប្ដីខ្លួនដដែល ។ ទោះជាយ៉ាងណា ទីបំផុតក៏សុខចិត្តសងទៅជនរងគ្រោះចំនួន៨០០ដុល្លារ ជាការបញ្ចប់រឿង ៕
ចែករំលែកព័តមាននេះ