ខេត្តបន្ទាយមានជ័យ ៖ ជនសង្ស័យ១ក្រុមមានគ្នា៦នាក់បានធ្វើសកម្មភាពកាប់ជនរងគ្រោះជិតដាច់ប្រអប់ដៃឆ្វេង ហើយកម្លាំងកងរាជអាវុធហត្ថចាប់បាន៣នាក់ ដែលមានកាំបិត និងដំបងត្រូវបានបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី១៤ ខែមិថុនា ឆ្នាំ២០១៨ ។
លោកវរសេនីយ៍ឯក ម៉ែន ភិរម្យមេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា ជនសង្ស័យ៣នាក់ដែលត្រូវចាប់ខ្លួនមានទី១- ឈ្មោះ ទួន ស៊ីណៃ ភេទប្រុស អាយុ២៥ឆ្នាំ ទី២- ឈ្មោះ រ៉ង វីរៈ ភេទប្រុស អាយុ២២ឆ្នាំ ទី៣- ឈ្មោះ ទ្រី បឺតណយ ភេទប្រុស អាយុ១៧ឆ្នាំ ជនសង្ស័យស្នាក់នៅភូមិពីរ សង្កាត់កំពង់ស្វាយ ក្រុងសិរីសោភ័ណ ។
លោកបានបញ្ជាក់ថា តាមបណ្តឹងជនរងគ្រោះឈ្មោះ ម៉ឹក ស៊ីរ៉ា ហៅកន្ទឹម ភេទប្រុស អាយុ២៥ឆ្នាំ រស់នៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ បានប្តឹងជនសង្ស័យ១ក្រុមមានគ្នា៦នាក់ ដែលមានកាំបិត ខ្វែវ និងដំបងដំថ្មបានធ្វើសកម្មភាពសម្រុកចូលក្នុងផ្ទះចូលទៅកាប់ខ្លួន បណ្តាលរងរបួសប្រអប់ដៃឆ្វេងស្ទើរដាច់ ខណៈពេលខ្លួនកំពុងដេកមើលទូរទស្សន៍ក្នុងផ្ទះជាមួយម្តាយ និងក្មួយដែលធ្វើសកម្មភាពហើយ គេចខ្លួនបាត់អស់ដែលកើតឡើងនៅវេលាម៉ោង៩យប់កាលថ្ងៃទី១២ ខែមិថុនា ឆ្នាំ២០១៨ ស្ថិតក្នុងភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ។
លោកវរសេនីយ៍ឯកម៉ែន ភិរម្យបានបញ្ជាក់ថា ក្រោយពេលទទួលព័ត៌មានហើយ កម្លាំងកងរាជអាវុធហត្ថខេត្តបានចុះបង្ក្រាបឃាត់ខ្លួនជនសង្ស័យភ្លាមៗបាន៣នាក់ និងវត្ថុតាងមានកាំបិត ខ្វែវ១ ដំបងឈើជ្រុង២ ត្រូវបានបញ្ជូនទៅទីបញ្ជាការកងរាជអាវុធហត្ថខេត្តបន្ទាយមានជ័យ ដើម្បីសាកសួរ ។ តាមចម្លើយជនសង្ស័យប្រាប់ថា ខ្លួនមានបក្ខពួកចំនួន៦នាក់ ប្រដាប់ដោយកាំបិត និងដំបងគោលបំណងទៅកាប់ និងវាយឈ្មោះ ហួត និងបក្ខពួកបានឈ្លោះគ្នា ហើយណាត់មកវាយ ដែលក្រុមនេះធ្លាប់ចេញចូលផ្ទះនេះ ទើបចូលទៅកាប់ច្រឡំជនរងគ្រោះបណ្តាលរបួសធ្ងន់ ពេលនោះកម្លាំងចាប់បាន៣នាក់ ចំណែកបក្ខរបស់ខ្លួន៣នាក់ទៀតគេចខ្លួនបាត់ ហើយកម្លាំងកំពុងរកចាប់ឲ្យបាន ដើម្បីចាត់ការតាមច្បាប់ ៕
ចែករំលែកព័តមាននេះ