រាជធានីភ្នំពេញ ៖ ប្រធានគណបក្សយុវជនកម្ពុជាបានអះអាងថា កូនស្រីលោកកឹម សុខា គឺកញ្ញាកឹម មនោវិទ្យាបានកំពុងធ្វើឲ្យឪពុកខ្លួនបន្តជាប់ឃុំគ្មានថ្ងៃចេញបន្ថែមទៀត ។ ការអះអាងរបស់មេបក្សយុវជននេះធ្វើឡើងបន្ទាប់ពីកញ្ញាកឹម មនោវិទ្យាបានជំរុញឲ្យសហរដ្ឋអាមេរិកមានចំណាត់ការមកលើការបំពានសិទ្ធិមនុស្សនៅកម្ពុជា…
រាជធានីភ្នំពេញ ៖ ប្រធានគណបក្សយុវជនកម្ពុជាបានអះអាងថា កូនស្រីលោកកឹម សុខា គឺកញ្ញាកឹម មនោវិទ្យាបានកំពុងធ្វើឲ្យឪពុកខ្លួនបន្តជាប់ឃុំគ្មានថ្ងៃចេញបន្ថែមទៀត ។ ការអះអាងរបស់មេបក្សយុវជននេះធ្វើឡើងបន្ទាប់ពីកញ្ញាកឹម មនោវិទ្យាបានជំរុញឲ្យសហរដ្ឋអាមេរិកមានចំណាត់ការមកលើការបំពានសិទ្ធិមនុស្សនៅកម្ពុជា បន្ថែមនូវចំណាត់ការផ្សេងៗទៀត ។
លោកពេជ្រ ស្រស់បានបញ្ជាក់ឲ្យដឹងនៅថ្ងៃទី១៤ មិថុនាថា «មិនមែនជាដំណោះស្រាយល្អទេនាងអើយ ហើយក៏មិនមែនជាដំណោះស្រាយរបស់នាង ដើម្បីឲ្យឪពុកនាងនៅក្រៅឃុំបាននោះដែរ គឺរឹតធ្វើឲ្យឪពុកនាងបន្តជាប់ឃុំគ្មានថ្ងៃចេញថែមទៀត ។ ខ្មែរឲ្យតែយ៉ាងនេះ គឺគ្មានថ្ងៃទៅមុខរួចនោះទេ គ្មាននរណាម្នាក់អាចដោះស្រាយបញ្ហាផ្ទៃក្នុងក្រៅពីខ្មែរគ្នាឯងនោះឡើយ» ។ ក្នុងជំនួបជាមួយជាមួយលោកស្កត់ បាស់ប៊ី (Scott Busby) ឧបការីរងក្រសួងការបរទេសសហរដ្ឋអាមេរិកទទួលបន្ទុកសិទ្ធិមនុស្ស កាលពីថ្ងៃទី១៣ មិថុនា កញ្ញាកឹម មនោវិទ្យាបានថ្លែងអំណរគុណដល់ក្រសួងការបរទេសសហរដ្ឋអាមេរិកដែលបានជំរុញឲ្យមានចំណាត់ការមកលើការបំពានសិទ្ធិមនុស្សនៅកម្ពុជា ។
កញ្ញាក៏បានស្នើរសហរដ្ឋអាមេរិកឲ្យបន្ត និងបន្ថែមនូវចំណាត់ការផ្សេងៗទៀតក្នុងគោលបំណងជម្រុញឲ្យប្រទេសកម្ពុជាត្រឡប់មកដើរលើគន្លងប្រជាធិបតេយ្យវិញ ដើម្បីឲ្យមានសន្តិភាព និងការបង្រួមបង្រួមជាតិយូរអង្វែងឈរលើមូលដ្ឋានគោរពគ្នាទៅវិញទៅមក ។ ជាមួយគ្នានោះដែរលោកពេជ្រ ស្រស់ក៏បានលើកឡើងថា ក្នុងកាលៈទេសៈនេះខ្មែរគ្រប់និន្នាការនយោបាយទាំងអស់គួរនាំគ្នាជ្រោងទង់ជាតិខ្មែរ ដើម្បីប្រឆាំងឥទ្ធិពលអាក្រក់របស់បរទេស ។
លោកបញ្ជាក់ថា «ខ្ញុំពេជ្រ ស្រស់សូមអំពាវនាវដល់បងប្អូនជនរួមជាតិខ្មែរនៅគ្រប់និន្នាការនយោបាយទាំងអស់គួរតែនាំគ្នាជ្រោងទង់ជាតិខ្មែរដើម្បីប្រឆាំងឥទ្ធិពលអាក្រក់របស់បរទេស ពីព្រោះថាវាមិនមានប្រយោជន៍ដល់ប្រជាជាតិខ្មែរនោះទេនៅពេលដែលប្រជាជាតិខ្មែរយើងបែកបាក់គ្នានោះ គឺធ្វើឲ្យបរទេសឆ្លៀតឳកាសបំផ្លាញខ្មែរទៅវិញ» ។ ការលើកឡើងរបស់លោកពេជ្រ ស្រស់ បន្ទាប់ពីសហរដ្ឋអាមេរិកបានដាក់លោកឧត្តមសេនីយ៍ហ៊ីង ប៊ុនហៀង មេបញ្ជាការ នៃកងអង្គរក្សរបស់សម្តេចនាយករដ្ឋមន្ត្រីហ៊ុន សែន បានដាក់បញ្ចូលទៅក្នុងបញ្ជីខ្មៅនៃបុគ្គលដែលត្រូវរងទណ្ឌកម្មក្រោមច្បាប់ ហ្គ្លោប៊ល ម៉ែកនីតស្គី (GLOBAL MAGNITSKY) ដោយសារតែការចូលដៃក្នុងការរំលោភសិទ្ធិមនុស្ស និងប្រជាធិបតេយ្យនៅកម្ពុជា ។ សហរដ្ឋអាមេរិករកឃើញថា លោកហ៊ីង ប៊ុនហៀងរំលោភសិទ្ធិមនុស្សធ្ងន់ធ្ងរក្នុងរយៈពេលជាច្រើនឆ្នាំចុងក្រោយនេះរួមទាំងអំពើ ហិង្សានៅឆ្នាំ២០១៣នៅក្បែរវត្តភ្នំ និងអំពើហិង្សាវាយដំ តំណាងរាស្ត្របក្សប្រឆាំងពីររូបនៅមុខរដ្ឋសភានៅឆ្នាំ២០១៥ ។
ចំពោះករណីនេះលោកសុខ ឥសានអ្នកនាំពាក្យគណបក្សប្រជាជនកម្ពុជាបានលើកឡើងថា ជនបរទេសចេះតែចង់លូកដៃចូលកិច្ចការផ្ទៃក្នុងរបស់ប្រទេសកម្ពុជាដែលជារដ្ឋឯករាជ្យ និងមានអធិបតេយ្យ ។ ធម្មនុញ្ញអង្កការសហប្រជាជាតិ( អសប )បានកំណត់មិនឲ្យមានការលូកដៃចូលកិច្ចការផ្ទៃក្នុងផងគ្នា ។ ប៉ុន្តែជនបរទេសខ្លះនៅតែរំលោភធម្មនុញ្ញដែលមានអ្នកខ្លះតាំងខ្លួនថា ជាមេសិទ្ធិមនុស្សក៏នៅតែរំលោភធម្មនុញ្ញ អសប ដដែលដោយមិនគិតពីការរំលោភដែនឯករាជ្យ និងអធិបតេយ្យភាពរបស់ប្រទេសដទៃ ។
លោកបញ្ជាក់ថា« ជាការគួរឲ្យខ្មាស់អៀនណាស់ដែលអ្នកមេសិទ្ធិមនុស្ស ប៉ុន្តែរំលោភសិទ្ធិមនុស្សនោះ ។ ប្រទេសធំមានប្រជាធិបតេយ្យ និងសិទ្ធិមនុស្សតែបែរជាមករំលោភសិទ្ធិមនុស្ស និងលទ្ធិប្រជាធិបតេយ្យរបស់ប្រទេសដទៃធ្វើខ្លួនឯងជាបងធំលើពិភពលោកដែលបណ្តាប្រទេសលើលោកមិនស្វាគមន៍» ៕
ចែករំលែកព័តមាននេះ