ខេត្តព្រៃវែង ៖ ដើមរាំងដ៏ធំមួយដើម ត្រូវនគរបាលសេដ្ឋកិច្ចខេត្តស្ទាក់ចាប់បាន ខណៈក្រុមឈ្មួញកំពុងដឹកតាមរថយន្តសាំយ៉ុងមួយគ្រឿង បម្រុងលោតឆត្រទៅប្រទេសវៀតណាម តាមច្រកព្រំដែនខេត្តស្វាយរៀង ។
ប្រភពព័ត៌មានពីសមត្ថកិច្ចបានឱ្យដឹងថា ដើមរាំងដ៏ធំនេះត្រូវចាប់ឃាត់បាននៅចំណុចក្រោមស្ពានត្សឹបាសាហៅស្ពានអ្នកលឿង ស្ថិតក្នុងភូមិព្រែកខ្សាយ ឃុំព្រែកខ្សាយ «ក» ស្រុកពាមរក៍កាលពីវេលាម៉ោងជិត៩យប់ថ្ងៃទី១១ ខែមិថុនា ។ក្រុមឈ្មួញបានរុំដើមរាំងទាំងមូល ដឹកតាមរថយន្តសាំយ៉ុងពណ៌ស ពាក់ផ្លាកលេខ កំពត២A-១១៩២ មកពីខាងជើងក្រុងព្រៃវែង មានគោលដៅឆ្ពោះទៅប្រទេសវៀតណាមតាមច្រកព្រំដែនក្នុងខេត្តស្វាយរៀង ។
ប្រភពដដែលបន្តថា ពេលស្ទាក់ចាប់បាន នៅលើរថយន្តមានកម្មករចំនួន៩នាក់ ជាអ្នកចាំលើកដើមរាំងចុះពីរថយន្តពេលដល់គោលដៅ ។ប៉ុន្តែ ក្រោយពេលសមត្ថកិច្ចចាប់ឃាត់និងសួរនាំដឹងថាជាកម្មករ ក៏អនុញ្ញាតឱ្យត្រឡប់ទៅផ្ទះវិញទាំងអស់ ដោយឡែកដើមរាំងនិងរថយន្តត្រូវបានសមត្ថកិច្ចអូសយកទៅរក្សាទុកនៅស្នាក់ការការិយាល័យសេដ្ឋកិច្ចខេត្ត ស្ថិតក្នុងឃុំព្រែកខ្សាយ«ខ» ស្រុកពាមរក៍ ។យោងតាមចម្លើយរបស់ក្រុមកម្មករនៅលើរថយន្តដឹកដើមរាំងនេះប្រាប់ថា មុនពេលត្រូវសមត្ថកិច្ចចាប់បាននេះ គឺក្រុមឈ្មួញបានលួចដឹកដើមរាំងនាំចេញទៅដល់ប្រទេសវៀតណាម៥ជើងរួចមកហើយ គឺទើបតែលើកទី៦នេះទេ ដែលត្រូវសមត្ថកិច្ចចាប់បាន ។
លោកឧត្តមសេនីយ៍ ស្រេង ជា ស្នងការនគរបាលខេត្តថ្លែងថា ក្រោយពីកសាងសំណុំរឿងរួច ក៏បានបញ្ជូនវត្ថុតាងទាំងដើមរាំងនិងរថយន្ត ប្រគល់ទៅឱ្យខាងរដ្ឋបាលជលផលចាត់ការបន្តទៅតាមនីតិវិធី ៕
ចែករំលែកព័តមាននេះ