រាជធានីភ្នំពេញ ៖ បុរសម្នាក់ស្រវឹងធ្លាក់ភ្នែកជិះម៉ូតូមួយគ្រឿងបោះពួយយ៉ាងលឿនរួចក៏រ៉េចង្កូតទៅបុកបង្គោលភ្លើងដែលនៅលើខឿនតាមចិញ្ចើមផ្លូវបណ្ដាលឲ្យរងរបួសធ្ងន់ធ្ងរត្រូវបានរថយន្ដសង្គ្រោះបន្ទាន់ដឹកទៅសង្គ្រោះភ្លាមៗ ហេតុការណ៍នេះកើតឡើងកាលពីវេលាម៉ោង១០និង១០នាទីយប់ ថ្ងៃទី១៣ ខែមិថុនា ឆ្នាំ២០១៨ ត្រង់ចំណុចខាងលិចផ្សារដើម.គ ប្រមាណ២០០ម៉ែត្រ តាមបណ្ដោយផ្លូវ៣៣៦ ស្ថិតក្នុងសង្កាត់បឹងសាឡាង ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់ស្រវឹងជោកជាំជិះម៉ូតូមួយគ្រឿងម៉ាក ហុងដាឌ្រីម ស៊េរីឆ្នាំ២០១៨ ពណ៌ខ្មៅ អត់មានស្លាកលេខ ធ្វើដំណើរតាមបណ្ដោយផ្លូវ៣៣៦ ទិសដៅពីលិចទៅកើត ក្នុងល្បឿនយ៉ាងលឿន លុះមកដល់ចំណុចកើតហេតុស្រាប់តែម៉ូតូខាងលើរ៉េចង្កូតទៅខាងស្ដាំឡើងខឿនជ្រុលទៅបុកបង្គោលភ្លើងបណ្ដាលឲ្យអ្នកបើកបរម៉ូតូរងរបួសបែកក្បាលសន្លប់ស្ដូកស្ដឹងត្រូវបានរថយន្ដសង្គ្រោះបន្ទាន់ដឹកយកទៅសង្គ្រោះនៅគ្លីនិកឯកជន ។
ដោយឡែកម៉ូតូបែកក្បាំងខាងស្តាំត្រូវបានសមត្ថកិច្ចមូលដ្ឋានយកទៅរក្សាទុកនៅអធិការដ្ឋាននគរបាលខណ្ឌទួលគោកដើម្បីរងចាំសាច់ញាតិយកឯកសារពាក់ព័ន្ធមកម៉ូតូត្រលប់ទៅវិញនៅពេលក្រោយ ៕
ផ្សាយផ្ទាល់ ៖ (ព័ត៌មានបឋម) ករណីគ្រោះថ្នាក់ចរាចរណ៍ ស្រវឹងស្រាសម្ពោធម៉ូតូថ្មីជាមួយបង្កោលភ្លើង
បានបង្ហោះដោយ FireBuzz នៅ 13 មិថុនា 2018
ចែករំលែកព័តមាននេះ