ខេត្តកំពង់ឆ្នាំង ៖ រទេះគោស្ទើរតែបាត់ស្រមោលទៅហើយ ដោយសារកត្តាច្រើនយ៉ាង ដូចជា ប្រជាពលរដ្ឋងាកទៅប្រើរទេះកង់ឡាន និងប្រើគោយន្តជំនួសរទេះគោបុរាណរបស់បុព្វបុរសខ្មែរយើងពីជំនាន់ដើម ។ មិនតែប៉ុណ្ណោះគ្មានការផលិតទៀតផង ។ ទោះជាយ៉ាងណាក្តីកសិកររស់នៅភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរបានប្រមូលទិញរទេះគោ ចាស់ៗ ពីតាមមូលដ្ឋានជនបទយកទៅជួសជុលដាក់តាំងលក់ឱ្យអតិថិជន ដែលភាគច្រើនគឺជាអ្នកទីក្រុង ដើម្បីយកទៅតាំងលម្អនៅក្នុងភូមិឋានរបស់ខ្លួន ប្រៀបដូចជាការរួមចំណែកថែរក្សាសម្បត្តិវប្បធម៌របស់ជាតិ ទុកឱ្យក្មេងជំនាន់ក្រោយបានស្គាល់ ។
លោកមាស សុវណ្ណារី អាយុ២៧ឆ្នាំ ជាអ្នកប្រមូលទិញរទេះគោ ចាស់ៗនៅតាមមូលដ្ឋានជនបទយកទៅជួសជុលលក់បានឱ្យដឹងកាលពីពេល ថ្មីៗកន្លងមកថា៖ ដោយសារតែស្រឡាញ់រទេះគោខ្មែរដែលធ្វើឡើងអំពីឈើប្រណីត ល្អៗ មានឈើបេង ធ្នង់ នាងនួន សុក្រំ និងខ្លះគ្រញូង ។ លោកចាប់ផ្តើមប្រមូលទិញរទេះគោ ចាស់ៗ ទាំងនោះពីកសិករតាមមូលដ្ឋានឆ្ងាយជិត ដើម្បីយកជួសជុលកែលំអឡើងវិញ ដើម្បីដាក់លក់ ប៉ុន្តែលោកទើបតែចាប់យកមុខរបរនេះក្នុងឆ្នាំ២០១៨នេះ ។ កន្លងទៅមានអ្នកនៅទីក្រុងមួយចំនួនបានកុម្ម៉ង់ទិញរទេះគោខ្មែរ ដើម្បីយកទៅដាក់តាំងលំអនៅក្នុងភូមិដ្ឋានទុកឱ្យកូនចៅបានស្គាល់ ព្រោះមកដល់ពេលនេះប្រជាពលរដ្ឋភាគច្រើនលែងប្រើរទេះគោទៀតហើយ គឺពួកគាត់នាំគ្នាមកប្រើប្រាស់គោយន្ត ឬរទេះកង់ឡានជំនួសវិញ ។
លោកមាស សុវណ្ណារី ឱ្យដឹងថា រទេះគោចាស់ៗដែលលោកទិញក្នុង១គ្រឿងតម្លៃពី២០ម៉ឺនទៅ៤០ម៉ឺនរៀល តាមការខូចតិច ឬខូចច្រើន ហើយបានជួលជាងមកជួលជុលដំឡើងឱ្យល្អឡើងវិញ ដោយអស់ថ្លៃឈ្នួលពី៣០ម៉ឺនទៅ៤០ម៉ឺនរៀលទើបលក់ចេញបាន ។ ពេលលក់ចេញទៅវិញក្នុង ១គ្រឿងៗមានតម្លៃពី៣០០ទៅ៤៥០ដុល្លាតាមប្រភេទឈើធ្នង់ ឬឈើគ្រញូង ដែលភាគច្រើនគឺបានលក់ដាច់នៅមុនថ្ងៃចូលឆ្នាំខ្មែរតែប៉ុណ្ណោះ ។
ជាងជួសជុលរទេះគោគឺលោកសំ ប៊ុនលី ឱ្យដឹងថា លោកបានស៊ីឈ្នួលជួសជុលរទេះគោខាងលើនេះជិត១ឆ្នាំហើយ ដោយក្នុងមួយគ្រឿងប្រើរយៈពេលពី៥ថ្ងៃទៅ១សប្តាហ៍ តាមរទេះគោខូចតិច ឬខូចច្រើន ។
លោកសុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងឱ្យដឹងថា រទេះគោខ្មែរ គឺជាសម្បត្តិបេតិកភណ្ឌជាតិ ដែលបានកើតមានតាំងពីមុនសម័យអង្គររាប់ពាន់ឆ្នាំមកហើយ គឺជាស្នាដៃបុព្វបុរសខ្មែរយើង ជាក់ស្តែងដូចរូបចម្លាក់នៅលើប្រាសាទអង្គរវត្តមាន រទេះគោ រទេះសាឡីដឹកស្តេច រទេះសេះចម្បាំង និងរទេះដឹកកាំភ្លើងធំជាដើម គឺជាស្នាដៃរបស់ដូនតាខ្មែរ គប្បីកូនខ្មែរយើងនាំគ្នារក្សាទុកស្នាដៃនេះកុំឱ្យបាត់បង់ គឺដើម្បីឱ្យប្រពៃណី វប្បធម៌ជាតិពិតជារុងរឿងឡើងវិញ ។
រទេះគោខ្មែរបច្ចុប្បន្ននេះអ្នកមានជីវភាពធូធារ ក្រៅពីទិញដាក់តាំងនៅតាមគេហដ្ឋាន នៅមានផ្នែកខ្លះនៃរទេះគោត្រូវបានគេទិញយកទៅតាំងដូចជាកង់រទេះគោយកធ្វើជារបងភូមិឋាន ឬធ្វើជាទោង សម្រាប់អង្គុយលេង និងធ្វើជាអ្វី ផ្សេងៗច្រើនយ៉ាងទៀត តាមដែលពួកគេចង់ជាដើម ៕
ចែករំលែកព័តមាននេះ