ទីបំផុត ព្រឹត្តិការណ៍ប្រកួតដណ្តើមពានរង្វាន់ពិភពលោក World Cup ដែលអ្នកស្នេហាវិស័យកីឡាបាល់ទាត់រង់ចាំយ៉ាងអន្ទះសានោះបានចាប់ផ្តើមពីរាត្រីនេះទៅហើយ ។ សម្រាប់គូពិសេសដំបូងគេនេះ គឺជាការប៉ះគ្នារវាងក្រុមម្ចាស់ផ្ទះរុស្ស៊ី និងក្រុមអារ៉ាប៊ីសាអូឌីត ក្នុងពហុកីឡដ្ឋាន Luzhniki ទីក្រុងម៉ូស្គូ ។
រុស្ស៊ី ៖ ក្នុងនាមជាម្ចាស់ផ្ទះនៃការប្រកួតពានរង្វាន់លំដាប់ពិភពលោកឆ្នាំនេះ រុស្ស៊ី មានទំនុកចិត្តខ្ពស់ជាងរដូវកាលមុនៗច្រើន ប៉ុន្តែប្រទេសមហាអំណាចសេដ្ឋកិច្ចយោធាមួយនេះ ចំពោះវិស័យកីឡាបាល់ទាត់របស់ពួកគេហាក់មានកម្រិតនៅឡើយ ។ ជាក់ស្ដែងប្រវត្តិនៃការប្រកួតនៅ World Cup ទាំង១០រដូវកាលនាពេលកន្លងទៅ រុស្ស៊ីធ្វើមិនបានល្អនោះទេ គិតចាប់តាំងពីការបង្ហាញខ្លួនលើកដំបូងឆ្នាំ១៩៥៨ ។
យ៉ាងណាមិញ កំណត់ត្រាល្អបំផុតនៅ World Cup ឆ្នាំ១៩៦៦ រុស្ស៊ី មានឱកាសឡើងដល់វគ្គពាក់កណ្តាលផ្តាច់ព្រ័ត្រម្តង ប៉ុន្តែត្រូវហាលអាវក្រោមថ្វីជើងអាល្លឺម៉ង់ ។ រីឯវត្តមានចុងក្រោយនៅ World Cup រដូវកាល ២០១៤ រុស្ស៊ីមិនបានឆ្លងផុតវគ្គជម្រុះតាមពូលនោះទេ ។
អារ៉ាប៊ីសាអូឌីត ៖ ប្រទេសទៅពីទ្វីបអាស៊ីយើងនេះ បានឆ្លងកាត់ឧបសគ្គជាច្រើនរួចមកហើយទម្រាំមានកៅអីលេងនៅវគ្គចែកពូល៣២ក្រុម ។ បើនិយាយពីវត្តមាននៅ World Cup អារ៉ាប៊ីសាអូឌីតធ្លាប់បានបង្ហាញខ្លួនចំនួន៤លើកមកហើយគឺនៅឆ្នាំ១៩៩៤, ១៩៩៨, ២០០២ និង២០០៦ ។
ចំពោះលទ្ធផលគាប់ប្រសើរដែលក្រុមជម្រើសជាតិមួយនេះទទួលបាន គឺឡើងដល់វគ្គ១៦ក្រុមចុងក្រោយម្តងកាលពីឆ្នាំ១៩៩៤ ដោយប្រកួតចាញ់ស៊ុយអែត ។ រីឯការបង្ហាញខ្លួន៣លើកផ្សេងទៀតពួកគេបានធ្លាក់ចេញតាំងពីវគ្គជម្រុះក្នុងពូលមកម្ល៉េះ ។ គួររំលឹកថា ការប្រកួត៥លើកចុងក្រោយវគ្គជម្រុះ World Cup ទ្វីបអាស៊ីកន្លងទៅ អារ៉ាប៊ីសាអូឌីតឈ្នះ៣ និងចាញ់២ ។
*ពួកគេធ្លាប់ជួបគ្នាតែម្តងប៉ុណ្ណោះក្នុងជំនួបមិត្តភាពកាលពីឆ្នាំ១៩៩៣ ដែលអារ៉ាប៊ីសាអូឌីត
បានយកឈ្នះក្នុងលទ្ធផល៤ទល់២ ។ យ៉ាងណាមិញជំនួបដំបូងគេក្នុងពូល A ខាងលើនេះ គេសង្កេតឃើញថា បច្ចុប្បន្នរនាំងការពារ និងកម្លាំងប្រយុទ្ធ គួបផ្សំនឹងបទពិសោធន៍ប្រកួតរបស់ក្រុមទាំងពីរគឺមានប្រហាក់ប្រហែលគ្នា ។
យ៉ាងណាក៏ដោយ រុស្ស៊ីត្រូវការឈ្នះដាច់ខាតក្នុងការប្រកួតបើកឆាកនារាត្រីនេះ ដ្បិតថាពួកគេជាម្ចាស់ផ្ទះ និងមានអ្នកគាំទ្រជាច្រើនជាកម្លាំងចិត្ត ដែលធ្វើឱ្យសន្ទុះប្រយុទ្ធពួកគេ កាន់តែខ្លាំងក្លា ។ ម្យ៉ាងទៀត គេហទំព័រទស្សន៍ទាយកីឡា ក៏បានទាយថារុស្ស៊ីនឹងអាចយកឈ្នះក្នុងលទ្ធផល ២ទល់១ ៕
ចែករំលែកព័តមាននេះ