រាជធានីភ្នំពេញ ៖ នារីជាបុគ្គលិកម្នាក់បានរត់មកដាក់ពាក្យបណ្តឹងនៅនគរបាលប៉ុស្តិ៍ទន្លេបាសាក់ឱ្យជួយរកយុត្តិធម៌ក្រោយពីរូបនាងត្រូវជនសង្ស័យម្នាក់បានណាត់នាងជួបគ្នានៅណាហ្គាក៏បោកយកម៉ូតូទៅបាត់ស្រមោល ហេតុការណ៍នេះកើតឡើងកាលពីម៉ោង២និង៤៥នាទីរសៀល ថ្ងៃទី១៣ មិថុនា ២០១៨ ។
នារីរងគ្រោះខាងលើឈ្មោះ កង ផល្លា អាយុ២៨ឆ្នាំ ជាបុគ្គលិកក្រុមហ៊ុនធានារ៉ាប់រងមួយ មានទីលំនៅស្នាក់នៅផ្ទះលេខ ៤៥ ភូមិស្ពានខ្ពស់ សង្កាត់គីឡូលេខ៦ ខណ្ឌឬស្សីកែវ។
បើតាមនារីរងគ្រោះបានប្រាប់ឱ្យដឹងថា មុនកើតហេតុកាលពីយប់ម៉ោង៩និង៣០នាទី ថ្ងៃទី១២ មិថុនានេះ មានបុរសម្នាក់បានប្រើលេខទូរស័ព្ទមួយខ្សែ គឺលេខ០៩៦ ៨២០ ៦១ ៧២ (ជាលេខមេ ) តេមកកាន់នាងដោយបហៅឈ្មោះមនុស្សម្នាក់ឱ្យទៅយកលុយ។ ពេលឮហៅឈ្មោះខុសនាងក៏ប្រាប់ថា «ច្រឡំលេខហើយ» បុរសម្នាក់នោះក៏ធ្វើជាសួរនាំនាងថា «រស់នៅទីណា?និងធ្វើការអ្វី?» នាងក៏ឆ្លើយតបថា «ខ្ញុំធ្វើការនៅក្រុមហ៊ុនធានារ៉ាប់រង» ហើយបុរសនោះក៏និយាយថា «ខ្លួនមានបំណងចង់សន្សំប្រាក់ និងទិញសេវាធានារ៉ាប់រងរបស់ក្រុមហ៊ុននេះដែរ» រូបនាង និងបុរសម្នាក់នោះក៏ធ្វើការណាត់ជួបគ្នាថ្ងៃស្អែកនៅណហ្គា២។
នាងបានប្រាប់បន្តទៀតថា លុះម៉ោង១២និង៥០នាទីថ្ងៃទី១៣នេះ បុរសម្នាក់ដែលតែងតាំង ខ្លួនជាមេនោះក៏ទូស័ព្ទលេខផ្សេងមួយទៀតគឺលេខ០៩៦ ៨១ ៣៥ ៥៧៧ មកប្រាប់នាងថា ឱ្យទៅជួបកូនចៅរបស់ខ្លួនម្នាក់ទៀត លុះបន្តិចក្រោយមកស្រាប់តែមានទូរស័ព្ទលេខ ០៧០ ៦៥៦៣០៦ មួយខ្សែទៀតតេមកប្រាប់ថា «មេរបស់គេឱ្យមកទទួលនាងខ្ញុំ ដើម្បីទៅជួបមេរបស់គេនៅណាហ្គា២ ដោយមេខ្ញុំមិនបានទៅទេ» ដោយមកជួបគ្នានៅចំណុចភ្លើងស្តុបផ្លូវព្រះមុនីវង្ស កែងនិងផ្លូវកម្ពុជាក្រោម។ ពេលនាងមកដល់ក៏ស្រាប់តែឃើញបុរសម្នាក់នៅឈរ នាងក៏សួរបុរសម្នាក់នោះថា « បានអីជិះមក» បុរសម្នាក់នោះឆ្លើយថា «ឡានមេខូចនិងយកទៅធ្វើការជួសជុលបាត់ហើយ» ពេលនោះនាងក៏ឱ្យម៉ូតូនាងម៉ាកស្គូពី ស៊េរីឆ្នាំ២០១៣ ពណ៌ស ពាក់ស្លាកលេខ ស្វាយរៀង ១D-៧៧៦៧ ឌុបនាងទៅជាមួយគ្នា។
នាងបានរៀបរាប់បន្តទៀតថា បុរសម្នាក់ខាងលើក៏ឌុបនាងមក ឈប់មកខាងមុខអគារវប្បធ៌មកូរ៉េ ផ្លូវព្រះសីហនុ សង្កាត់ទន្លេបាសាក់ ហើយរូបគេក៏ឱ្យនាងចុះពីលើម៉ូតូ ភ្លាមនោះនាងក៏ទូរស័ព្ទទៅកាន់បុរសម្នាក់ដែលតាំងខ្លួនជាមេនោះ ហើយគេក៏ប្រាប់នាងឱ្យដើរចូលមកខាងក្នុងមក និងប្រគល់ម៉ូតូឱ្យកូនចៅរបស់គេយកទៅទុកឱ្យចុះ។ ពេលនាងដើរឡើងចូលទៅក្នុងអគារនោះដោយស្មានតែណាហ្គា២ ហើយនាងសួរអ្នកនៅធ្វើការនៅទីនោះគេប្រាប់ថា ច្រឡំហើយ ដោយណាហ្គា២នៅខាងណោះទេ នាងក៏ដើរចេញមកវិញ និងដើរទៅកាន់ណាហ្គា២ ហើយក៏ទូរស័ព្ទទៅបុរសម្នាក់តាំងខ្លួនជាមេនោះតែតេមិនចូល រួចក៏តេទៅបុរសជាកូនចៅទៀតក៏តេមិនចូលទៀត។ ភ្លាមនោះនាងក៏ដើរមកកាន់អគារវប្បធ៌មកូរ៉េវិញដែលជាកន្លែងបុរសម្នាក់នោះឈប់ម៉ូតូ ស្រាប់តែបាត់ទាំងមនុស្ស និងម៉ូតូអស់មិនឃើញ ទើបរូបនាងដឹងថា ចាញ់បោកគេ និងរត់មកដាក់ពាក្យបណ្តឹងនៅនគរបាលប៉ុស្តិ៍ទន្លេបាសាក់ ឱ្យ ជួយធ្វើការស្រាវជ្រាវរកម៉ូតូរបស់នាងមកវិញ និងចាប់ឃាត់ខ្លួនក្រុមជនសង្ស័យទាំងនោះយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ