ខេត្តកណ្តាល ៖ បើតាមសេចក្តីរាយការណ៍បានឱ្យដឹងថា កម្លាំងសមត្ថកិច្ចនគរបាលស្រុកអង្គស្នួលសហការជាមួយនគរបាលប៉ុស្តិ៍រដ្ឋបាលមូលដ្ឋានបានធ្វើការបង្ក្រាប និងឃាត់ខ្លួនស្រី្តម្នាក់កំពុងអង្គុយលក់ថ្នាំញៀននៅមុខផ្សារត្រយឹង ហេតុការណ៍នេះកើតឡើងកាលពីម៉ោង៥និង៤៥នាទីល្ងាច ថ្ងៃទី១២ មិថុនា ២០១៨ នៅចំណុចមុខផ្សារត្រយឹង ស្ថិតក្នុងឃុំពើក ស្រុកអង្គស្នួល ខេត្តកណ្តាល ។
សេចក្តីរាយការណ៍បន្តថា ស្ត្រីសង្ស័យខាងលើឈ្មោះ ឆេង ប៊ុននី អាយុ៤២ឆ្នាំ មុខរបរជាកម្មកររោងចក្រ មានលំនៅក្នុងភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ ។
សេចក្តីរាយការណ៍បន្តទៀតថា មុនកើតហេតុកម្លាំងជំនាញបានទទួលព័ត៌មានពីមហាជនរាយការណ៍ថា មានស្ត្រីម្នាក់កំពុងអង្គុយលក់ថ្នាំញៀននៅចំណុចមុខផ្សារត្រយឹង ។ ក្រោយទទួល ព័ត៌មានបានភ្លាមនោះកម្លាំងជំនាញសហការជាមួយប៉ុស្តិ៍រដ្ឋបាលពើកចុះទៅឃាត់ខ្លួនស្ត្រីជាជនសង្ស័យម្នាក់កំពុងអង្គុយលក់ថ្នាំញៀននៅមុខផ្សារនោះតែម្នាក់ឯងធ្វើដូចគេលក់ត្រីសាច់អញ្ចឹង រួមទាំងដកហូតថ្នាំញៀនប្រភេទម៉ាទឹកកក២កញ្ចប់ធំ និងទូរស័ព្ទដៃម៉ាកអិនចុចពិល១គ្រឿង។
ក្រោយពីឃាត់ខ្លួនស្ត្រីសង្ស័យខាងលើសារភាពថា ថ្នាំញៀន២កញ្ចប់ធំនេះខ្លួនបានទិញពីប្រុសម្នាក់មិនស្គាល់អត្តសញ្ញាណនៅភូមិព្រៃគុយ ឃុំត្រពាំងគង ស្រុកសំរោងទង ខេត្តកំពង់ស្ពឺ និងបន្តយកមកលក់នៅមុខផ្សារត្រយឹងនេះ។ ក្រោយសួរនាំសមត្ថកិច្ចបានបញ្ជូនជនសង្ស័យ និងវត្ថុតាងទៅកាន់ស្នងការនគរបាលខេត្តកណ្តាល ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ