ខេត្តត្បូងឃ្មុំ ៖ ដំណោះស្រាយអ្នកបំរើរការនៅហាងខារ៉ាអូខេ «វិមានទ្រព្យ» ចំនួន២នាក់ គឺនៅតែទាមទារយកត្រូវរៀងៗខ្លួន លើរង្វាន់ធំបានរថយន្តម៉ាកFord ដែលមានតម្លៃជាង៤ម៉ឺនដុល្លារពីគម្របដបទឹកតែ OISHI ដោយនារសៀលថ្ងៃទី១៣ មិថុនា នេះ សមត្ថកិច្ចនឹងបញ្ជូនសំណុំរឿងទៅស្នងការដ្ឋាននគរបាលខេត្ត ដើម្បីឱ្យជំនាញចាត់ការបន្តទៀត ។ ប្រសិនបើនៅមិនត្រូវរ៉ូវគ្នាទៀតនោះ អាចនឹងទៅឱ្យអយ្យការអមសាលាដំបូងខេត្ត ដើម្បីសម្រេចជាលើកចុងក្រោយថា «តើអ្នកណាដែលមានសំណាងនេះ?» ។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្តមានប្រសាសន៍ថា អ្នកដែលត្រូវរង្វាន់ទាំង២នាក់ខាងលើ ដែលបម្រើការនៅហាងខារ៉ាអូខេ នៅមិនទាន់ចរចាគ្នានៅឡើយ ដោយកំពុងតែដេកគិតរៀងៗខ្លួន ។ ក្នុងនោះមានម្នាក់ពិការជើង និងម្នាក់ទៀតជាអ្នកបង្ហោះ Facebook ។ ជាមួយគ្នានោះតំណាងក្រុមហ៊ុនតែ OIHSI បានមកពិនិត្យទទួលស្គាល់ការពិតហើយ នៅអធិការដ្ឋាននគរបាលស្រុកមេមត់ ខណៈសមត្ថកិច្ចកំពុងតែថែរក្សាគម្របដបនោះ ដើម្បីចៀសវាងកុំឱ្យភាគីទាំងពីរនាក់ទាស់គ្នា បើពុំនោះទេ អាចនឹងកើតទៅជាបទល្មើសព្រហ្មទណ្ឌមួយទៀត ។
ហើយនៅពេលណាមួយដែលភាគីទាំង២នាក់ ស្រុះស្រួលគ្នាហើយ សមត្ថកិច្ចនឹងប្រគល់គម្របឱ្យទៅវិញ ។ឈ្មោះ សែន កាណាន់ ហៅតាន់ ភេទប្រុស អាយុ២៦ឆ្នាំ បានប្រាប់ឱ្យដឹងទៀតថា រូបគេបានមកបម្រើការនៅហាងខារាអូខេ «វិមានទ្រព្យ» រយៈពេល៦ ទៅ៧ឆ្នាំមកហើយ ដោយសារតែថៅកែឈ្មោះ ម៉ៅ ជាមនុស្សល្អ មិនចេះរករឿងកូនចៅ ទើបចេះតែបន្តមកដល់សព្វថ្ងៃនេះ ។ កន្លងទៅ មានពេលមួយនៅយប់ថ្ងៃទី២៦ ឧសភា មានភ្ញៀវមកចូលច្រៀង ហើយបានឱ្យលុយធីបចំនួន៥ពាន់រៀល ក៏រូបគេនិងឈ្មោះនិមល បានមកទិញតែ OISHI ចំនួន២ដប ដោយបានចែកម្នាក់មួយដប ។ លុះពេលបើកគម្របដបផឹក មិត្តរបស់គេ មិនត្រូវរង្វាន់នោះទេ ចំណែកគម្របដបរបស់ខ្លួន បានត្រូវរង្វាន់ធំរថយន្តមួយគ្រឿងនោះ ធ្វើឱ្យខ្លួនអរសប្បាយលោតកញ្ឆែងជើង ។
លុះដល់ព្រឹកឡើង ក៏បានយកគំរបដបត្រូវរង្វាន់ទៅជាមួយនឹងឈ្មោះនិមល ដើម្បីផ្ញើឱ្យថៅកែរបស់ខ្លួន ឈ្មោះម៉ៅ ជាអ្នកជួយថែរក្សាទុក ចៀសវាងបាត់ ដោយប្រការណាមួយ ។ ឈ្មោះកាណាន់ ហៅតាន់ ជាជនពិការជើងម្ខាង បានប្រាប់បន្តថា បានប៉ុន្មានថ្ងៃក្រោយមក ស្រាប់តែឈ្មោះនិមលនិងប្រពន្ធព្រមទាំងប្អូនថ្លៃ បាននាំគ្នាទៅទារយកគំរបដបនោះ ពីថៅកែរបស់ខ្លួន ដោយមិនឱ្យគេបានដឹង តែមិនត្រូវបានថៅកែឱ្យឡើយ ។ ហេតុតែខឹងពេក ក៏បានបង្ហោះតាម Facebook ដោយចោទប្រកាន់មកលើថៅកែថា ស៊ីដាច់រង្វាន់នោះ ហើយថែមទាំងអះអាងថា ខ្លួនជាអ្នកផឹកតែនោះត្រូវរង្វាន់ថែមទៀតផង ។
សាក្សីឈ្មោះសាំង រ៉ែន អាយុ៣៦ឆ្នាំ ជាមេការនៅខារាអូខេវិមានទ្រព្យថា នៅព្រឹកឡើង ឈ្មោះកាណាន ដែលបម្រើការនៅក្នុងហាងនោះ បានទិញតែម៉ាកOISHI មួយដបមកផឹក ពិតជាបានត្រូវរង្វាន់ធំរថយន្តមួយគ្រឿង នៅនឹងគំរបដបនោះមែន ដោយថែមទាំងបានកាន់មកបង្ហាញដល់អ្នកនៅដេកបន្ទប់ជាប់គ្នាថែមទាំងបានដឹងឮជាច្រើននាក់គាត់ ក៏បានឃើញផងដែរ។ ឈ្មោះ ហែម និមល ភេទប្រុស អាយុ២៥ឆ្នាំ អ្នកបង្ហោះ Facebook ប្រាប់ថា នៅយប់ថ្ងៃត្រូវរង្វាន់នោះប្អូនស្រីរបស់ខ្លួន បានឲ្យលុយចំនួន១ម៉ឺនរៀលទៅទិញតែមកផឹក២ដប និងទិញកាតទូរស័ព្ទ២ដុល្លារ។ពេលដែលកាណាន បើកគំរបដបផឹកត្រូវរង្វាន់ធំរថយន្ត១គ្រឿង ដោយមានការត្រេកអរពួកគេបានចាប់អោបថើបគ្នា និងបានសន្យាចែកគ្នាម្នាក់ពាក់កណ្តាល រហូតមកដល់ព្រឹកឡើង ឈ្មោះកាណាន បានប្រាប់ថា នឹងយកគំរបដបនោះ ដើម្បីទៅឲ្យបងថ្លៃនៅរាជធានីភ្នំពេញរក្សាទុក ។ តែរូបគេមិនឲ្យទៅនោះទេដោយថា ចាំបាច់មានអ្នកទី៣ធ្វើអី? បន្ទាប់មកទៀត ក៏បានដឹងដល់ថៅកែគាត់ ក៏ហៅមកសួរនាំនិងបានស្តីបន្ទោសឱ្យហើយ បានឱ្យជួយរក្សាទុកដាក់នឹងនៅនឹងថៅកែតែម្តង ។
បន្ទាប់មកទៀត ឈ្មោះតាន់ បានមកប្រាប់ថា ថៅកែគាត់បើករថយន្តទៅភ្នំពេញ គ្រានោះរូបគេបានទូរស័ព្ទទៅសួរនាំ ត្រូវបានថៅកែឆ្លើយប្រាប់ថា គ្រាន់តែទៅសួរនាំដើម្បីឱ្យដឹងថា តើពិតជាត្រូវរង្វាន់រថយន្តមែនក៏អី? ស្របពេលដែលថៅកែត្រឡប់មកវិញ បាន២ទៅ៣ថ្ងៃ ក៏ខ្ចីយកទូរស័ព្ទរបស់ខ្លួន និងបានទិញទូរស័ព្ទថ្មីម៉ាកអាយហ្វូន៥អេស១គ្រឿងថ្មីស្រឡាង មកឱ្យរូបគេ និងលុយចំនួន៥០ដុល្លារថែមទៀត ។ ក្រោយមកទៀតប្រពន្ធរបស់គេ បានទៅសុំពីថៅកែមកវិញ ទើបយល់ព្រមឲ្យមិនដឹងថា ថៅកែយកទូរស័ព្ទទៅធ្វើអ្វីទេ? ហើយថៅកែក៏បានហៅរូបគេមកសួរនាំនៅក្នុងបន្ទប់ ដោយបានស្តីបន្ទោសថា គ្រាន់តែរឿងប៉ុណ្ណឹងចាំ
បាច់ប្រាប់ប្រពន្ធធ្វើអ្វី និងបានបោះសំដីថា គំរបដបនោះនឹងបោះចោល និងបានស្តីបន្ទោសឲ្យជាច្រើន
ព្រមទាំងបានដេញរូបគេប្រពន្ធនិងបងប្អូនទាំងអស់៤នាក់ ចេញពីហាងឈប់ឲ្យនៅទាំងយប់ ។
ចំពោះរង្វាន់គំរបដបOISHI តំបូងគិតថា ចែកគ្នាពាក់កណ្តាលម្នាក់ តែដល់ពេលមានរឿងបែបនេះទៅហើយនោះ សូម្បីតែ១០០រៀល ក៏មិនចែកឱ្យឈ្មោះតាន់ដែរ គឺរូបគេសុំយករង្វាន់តែម្នាក់ឯង សូម្បីតែថៅកែក៏បានបដិសេធថា មិនបានទទួលគំរបដបពីពួកគេដែរ ។ ថៅកែហាងខារាអូខេវិមានទ្រព្យឈ្មោះ ស៊ិន ម៉ៅ ភេទប្រុស អាយុ៣៨ឆ្នាំ វិញបានប្រាប់ឲ្យដឹងដែរថា ឈ្មោះនិមល និងប្រពន្ធរបស់គេ បានមកសុំរូបលោកធ្វើការមិនទាន់បាន១ខែទេ ហើយថែមទាំងឧស្សាហ៍ឈ្លោះគ្នាថែមទៀតផង ។ ចំណែកឈ្មោះតាន់វិញ នៅ៦ទៅ៧ឆ្នាំមកហើយ ទោះបីជាគ្នាពិការជើងម្ខាងក៏ពិតមែន តែរូបលោកអាណិតឱ្យធ្វើការតែស្រាលៗ គ្រាន់តែមើលភ្ញៀវដែលមកចូលច្រៀង ។
នៅយប់ថ្ងៃទី២៦ ឧសភា នោះ ពួកគេបានទទួលលុយធីបពីភ្ញៀវឱ្យចំនួន៥ពាន់រៀល ក៏ទៅទិញតែមកផឹកហើយអ្នកដែលត្រូវរង្វាន់គឺឈ្មោះតាន់ មិនមែនឈ្មោះនិមល ទ្បើយ ។ ក្នុងពេលដែលត្រូវរង្វាន់ពួកគេ បានសន្យាចែកគ្នា ដោយឈ្មោះតាន់ កាន់គម្របដបមកឱ្យរូបលោកជួយរក្សាទុក ឱ្យបាន២ ទៅ៣ថ្ងៃក្រោយមក ស្រាប់តែឈ្មោះនិមល និងប្រពន្ធបានមកទាមទារយកគំរបដបនោះទៅវិញ តែរូបលោកមិនព្រមឲ្យដោយសំអាងថា ឈ្មោះតាន់ ដែលពិការជើងគ្នាជាអ្នកត្រូវ ។ បន្ទាប់មក ស្រាប់តែឈ្មោះ និមល បានបង្ហោះFacebook ដោយចោទប្រកាន់មកលើរូបលោកថា ជាអ្នកស៊ីដាច់រង្វាន់រថយន្តនោះទៅវិញ នេះជាការមួលបង្កាច់ ព្រោះលោកមិនមានចេតនាណាអាក្រក់ណាមួយនោះទេ ។
ចែករំលែកព័តមាននេះ