រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា ការប្រកាសថាបរទេសមិនទទួលស្គាល់ការបោះឆ្នោតជ្រើសតាំងតំណាងរាស្ត្រអាណត្តិទី៦ ដែលនឹងប្រព្រឹត្តិទៅនៅថ្ងៃទី២៩ ខែកក្កដា ខាងមុខនេះគឺជាការឧបាយកលបំភាន់មតិរណៈរបស់ជនមួយក្តាប់ប៉ុណ្ណោះ ។ ការលើកឡើងរបស់អ្នកនាំពាក្យរូបនេះធ្វើបន្ទាប់ពីក្រុមអ្នកគាំទ្រអតីតគណបក្សសង្គ្រោះជាតិបានអះអាងការបោះឆ្នោតនៅពេលខាងមុខនេះគ្មានបរទេសទទួលស្គាល់នោះទេ ពិសេសនោះក្រុមអ្នកវិភាគដែលមានទំនោរគាំទ្រអតីតបក្សប្រឆាំងតែម្តង ។
យ៉ាងណាក្តីអ្នកនាំពាក្យគណបក្សកាន់អំណាចលោក សុខ ឥសាន បានបញ្ជាក់ថា «ការលើកឡើងនេះជា ទស្សនៈភ្លើណាស់ដែលមិនមានបរទេសណាសោះ បានប្រកាសមិនទទួលស្គាល់ការបោះឆ្នោតនៅកម្ពុជានាចុងខែកក្កដាខាងមុខនេះ ។ មានតែខ្មែរអគតិមួយចំនួនតូចដែលជាក្រុមប្រឆាំងប៉ុណ្ណោះ ដែលខំស្រែកជំនួសបរទេសថាមិនទទួលស្គាល់ការបោះឆ្នោតនោះ» ។ លោក សុខ ឥសាន បានឲ្យដឹងនៅថ្ងៃទី១៣ មិថុនា យ៉ាងដូច្នេះថា ការស្រែកនេះគ្រាន់តែជាឧបាយកលបំភាន់មតិសាធារណៈប៉ុណ្ណោះ ដើម្បីបិទបាំងការបរាជ័យរបស់ខ្លួន ។
ជាមួយគ្នានោះដែរអ្នកនាំពាក្យដដែលក៏បានលើកឡើងថា សកម្មភាពរបស់លោក សម រង្ស៊ី អតីតប្រធានគណបក្សសង្គ្រោះជាតិតែងតែធ្វើការញុះញង់ឲ្យពលរដ្ឋមិនទទូលស្គាល់ការបោះឆ្នោត ។ ជាងនេះមិនឲ្យពលរដ្ឋទៅបោះឆ្នោត រហូតដល់ព្រះមហាក្សត្រចេញព្រះរាជសារមានព្រះរាជឱង្កាឲ្យពលរដ្ឋដែលមានឈ្មោះក្នុងបញ្ជីបោះឆ្នោតទៅឆ្នោតឲ្យបានគ្រប់គ្នាដោយកុំមានការភ័យខ្លាច និងព្រួយបារម្មណ៍ ។ ប៉ុន្តែលោក សម រង្ស៊ី បានអះអាងថា ព្រះរាជាសាររបស់ព្រះមហាក្សត្រជាព្រះរាជសារក្លែងក្លាយ ។ មិនបានប៉ុន្មានថ្ងៃផងក្រសួងព្រះបរមរាជវាំងបានចេញប្រកាសព័ត៌មានបំភ្លឺថា ព្រះរាជាសារព្រះមហាក្សត្រគឺជាព្រះរាជសារពិតប្រាកដ មិនក្លែងក្លាយដូចអ្វីដែលលោក សម រង្ស៊ី លើកឡើងនោះទេ ។
លោក សុខ ឥសាន បានគូសបញ្ជាក់ថា«កន្លងទៅទណ្ឌិត សម រង្ស ញុះញង់ឲ្យប្រជា ជន និងកងទ័ពងើបបះបោរប្រឆាំងការបោះឆ្នោត ។ ប៉ុន្តែដើម្បីយករួចខ្លួនទណ្ឌិត សម រង្ស៊ី បាន ប្រែក្រឡាស់ថា គ្រាន់តែនិយាយឲ្យប្រជាជនកុំទៅបោះឆ្នោតប៉ុណ្ណោះ ។ ការនិយាយកែបែបនេះរបស់ សម រង្ស៊ី បញ្ជាក់ច្បាស់ថា ទណ្ឌិត សម រង្ស៊ី ជាមនុស្សក្រឡិចក្រឡុចតាំងពីដើមមកគ្រប់បញ្ហា ទណ្ឌិត សម រង្ស៊ី តែងតែបន្លំប្រជាជនជានិច្ច» ។
គួរឮកថាការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦នឹងប្រព្រឹត្តិទៅនាថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០បានចូលរួមប្រកួតប្រជែង សន្លឹកឆ្នោត ។ គណៈកម្មាធិការជាតិរៀបចំការបោះឆ្នោតបានអំពាវនាវឲ្យពលរដ្ឋទាំងអស់ដែលមានឈ្មោះក្នុងបញ្ជីបោះឆ្នោតអញ្ជើញទៅបោះឆ្នោតឲ្យបានគ្រប់គ្នាព្រោះថា ការសម្រេចនេះមានរយៈពេល៥ឆ្នាំម្តងក្នុងការជ្រើសមេដឹកនាំប្រទេសដែលខ្លួនស្រឡាញ់ពេញចិត្ត ៕
ចែករំលែកព័តមាននេះ