ខេត្តកំពត ៖ ស្ត្រីចំណាស់ម្នាក់បានរងរបួសយ៉ាងធ្ងន់ធ្ងរ ខណៈកំពុងតែធ្វើដំណើរ ដោយថ្មើរជើងនៅលើចិញ្ចើមផ្លូវជាតិលេខ៣៣កំពត – កំពង់ត្រាច ហើយត្រូវបានម៉ូតូបើកបរដោយក្មេងប្រុសជំទង់ម្នាក់បុកទាំងកំរោល កាលពីល្ងាចថ្ងៃទី១២ ខែមិថុនា ឆ្នាំ២០១៨ ស្ថិតក្នុងចំណុចភូមិត្រពាំងធំ ឃុំត្រពាំងសង្កែ ស្រុកទឹកឈូ ក្នុងទិសដៅផ្ទុយគ្នា ។
សមត្ថកិច្ចមូលដ្ឋានបានឲ្យដឹងថា ម៉ូតូបង្កម៉ាកសេ១២៥ ពណ៌ខ្មៅសេរី (២០១៨) ពាក់ស្លាកលេខកំពត 1 N0750 អ្នកបើកបរឈ្មោះ អេង រ៉ូហ្សា ភេទប្រុស អាយុ១៥ឆ្នាំ (ជនជាតិខ្មែរ) បានរងរបួសធ្ងន់ រស់នៅភូមិអង្គ ឃុំត្រពាំងព្រីង ស្រុកទឹកឈូ និងអ្នករួមដំណើរម្នាក់ភេទប្រុសរបួសស្រាល រស់នៅភូមិឃុំជាមួយគ្នាខាងលើ ម៉ូតូក្នុងទិសដៅពីកើតទៅលិច ។
អ្នកថ្មើរជើងឈ្មោះ នាក់ សន្ធា ភេទស្រី អាយុ៣៨ឆ្នាំ មានទីលំនៅភូមិត្រពាំងធំ ឃុំត្រពាំង សង្កែ ស្រុកទឹកឈូបានរងរបួសយ៉ាងធ្ងន់ធ្ងរ ។ ក្រោយពីកើតហេតុជនរងគ្រោះត្រូវបានក្រុមគ្រួសារសាច់ញាតិដឹកទៅសង្គ្រោះនៅមន្ទីរពេទ្យបង្អែកខេត្ត ។
ចំណែកម៉ូតូបង្កសមត្ថកិច្ចបាននាំទៅរក្សាទុកនៅអធិការដ្ឋាននគរបាលស្រុកទឹកឈូ រង់ចាំការដោះស្រាយតាមផ្លូវច្បាប់នៅពេលក្រោយ ៕
ចែករំលែកព័តមាននេះ