រាជ​ធានីភ្នំពេញ ៖ យោងតាមពាក្យ​បណ្តឹង​ចំនួន៥ទំព័រ របស់លោកប៊ុន ថា ចាង​ហ្វាង ការ​ផ្សាយរបស់កាសែតខ្មែរអមតៈ ដែលផ្ញើ​ជូន​លោកឱម យ៉ីនទៀង ​ប្រធានអង្គភាពប្រឆាំង​អំពើ​​ពុក​រលួយ កាលពីថ្ងៃទី១៥ មីនា ដែលកោះ​សន្តិភាព​ទទួលបានឲ្យដឹងថាលោកញ៉ឹក ​ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច​ថាបាន​ពាក់ព័ន្ធនឹងឯកសារប័ណ្ណទទួលប្រាក់សែសិបលានយន់ចិន ស្មើនឹង៦លានដុល្លារអាមេរិក​ពីក្រុម​ហ៊ុន Speedy Best Technology។

ទោះបីយ៉ាង​ណា លោកឧប​នាយក​រដ្ឋ​មន្ត្រី ញឹក ប៊ុនឆៃ បានបដិសេធចំពោះការ​ចោទ​ប្រកាន់របស់លោកប៊ុនថា ដែលពាក់ពន្ធ័នឹងការ​ចោទ​ប្រកាន់នេះ ហើយ​លោក​ក៏​បាន​ប្តឹង​​ពីបទ​ផ្សាយ​ព័ត៌មាន​មិនពិត និង​ក្លែង​ឯកសារ​រួចហើយ​ដែរ។ លោកប៊ុន ថា បានសរសេរក្នុងបណ្តឹង​នោះ​​ថា លោកញឹក ប៊ុនឆៃ បានប្រើប្រាស់តួ​នាទី​ជា​អគ្គ​លេខាធិការគណបក្សហ៊្វុនស៊ិនប៉ិច​ក្នុង​ការ​ទទួលប្រាក់ទាំងនេះពីក្រុមហ៊ុន Speedy Best Technologyដែលអាចជាមូលដ្ឋាន​សំរាប់អង្គ ភាពប្រឆាំងអំពើពុករលួយតាមដានស៊ើបអង្គត ត្រួតពិនិត្យ និងធ្វើការស្រាវជ្រាវ ព្រមទាំង ចាត់វិធានការនានាពាក់ពន្ធ័នឹងបទល្មើសពុក រលួយនៅតាមក្រសួងស្ថាប័នសាធាសរណៈ និង​ឯកជនទាំងអស់ស្របតាមនីតិវិធីជា​ធរមាន។

គួរបញ្ជាក់ថា ការដាក់ពាក្យប្តឹងរបស់លោក ប៊ុនថា ទៅអង្គភាពប្រឆាំងអំពើពុករលួយ​បន្ទាប់ ពីលោកញឹក ប៊ុនឆៃ បានដាក់ពាក្យប្តឹងលោក​ប៊ុនថា ពីបទផ្សាយព័ត៌មានមិនពិត​ និងក្លែង​ឯក​សារទៅសាលាដំបូងរាជធានីភ្នំពេញនៅពេល​ដែលកាសែតខ្មែរអមតៈបានចុះផ្សាយព័តមាននេះ​ជាច្រើនលេខកន្លងមក ។ ព្រះរាជអាជ្ញារង​សាលាដំបូង​​រាជធានីភ្នំពេញ លោកហ៊ឺង ប៊ុនជា កាលពី​ថ្ងៃទី១៣ មីនា ២០១១បានចេញដីកា​កោះហៅ​​លោក​ប៊ុនថា ឲ្យចូលខ្លួនទៅសាលា​ដំបូង​រាជ​​ធានី​​ភ្នំពេញ​ដើម្បីឆ្លើយដោះ​បន្ទុក​តាម​ការចោទ​ប្រកាន់របស់លោកញឹក ប៊ុនឆៃ ។

លោកប៊ុនថា និយាយថា លោកកំពុងតែពឹង​ពាក់រកមេធាវីការពារក្តីនៅក្នុងរឿងនេះ ។ នៅពេលនេះគាត់នៅមិនទាន់មានមេធាវីនៅឡើយ​ទេ ។ ចំពោះករណីនេះ លោកនឹងឲ្យមេធាវី​របស់​លោកចូលទៅបំភ្លឺនៅសាលាដំបូងតាមការ
កំណត់ ។ លោកប៊ុនថា​បន្តថា លោកបានទទួល​ដីកា​កោះពីព្រះរាជអាជ្ញាហ៊ឺង ប៊ុនជា កោះហៅ​រូប​លោកឲ្យចូលទៅតុលាការនៅថ្ងៃទី១៨ មីនា​ឆ្នាំ២០១១ខាងមុខនេះ វេលាម៉ោង៨ព្រឹក ។

យោងតាមសេចក្តីបញ្ជាក់របស់នាយកក្រុមហ៊ុនកៅហួអ៊ីនដាស្រ្ទីអ៊ីនវេស៍មែន (Kahua Industry Investment Co.Ltd) ដែលកោះសន្តិភាពទទួលបានឲ្យដឹងថា ក្រុមហ៊ុនសូម បញ្ជាក់បំភ្លឺជុំវិញការចុះផ្សាយនៅក្នុងបណ្តាញ​សារព័ត៌មាននៅកម្ពុជាស្តីពីការផ្ទេរភាគហ៊ុនចំនួន៨០% ទៅក្រុមហ៊ុនស្ពីតឌីតិណូឡូជី (Speedy Best Techenology Limited Co,Ltd) ដែល មានតម្លៃ៥.៨៣៥.៦០០ដុល្លារអាមេរិកដូចតទៅ ៖

ទី១-ការផ្ទេរភាគហ៊ុន៨០%​ដែលមាន​តម្លៃ៥.៨៣៥.៦០០ដុល្លារអាមេរិក គឺជា​ធុរ​កិច្ចរវាងក្រុមហ៊ុន និងក្រុមហ៊ុនតែប៉ុណ្ណោះ ដោយ​មាន​ការចូលរួមធ្វើជាសាក្សីពីលោកញ៉ឹក ប៊ុនឆៃ អគ្គលេខាធិការគណបក្សហ៊្វុនស៊ិន​ប៉ិច​ដូចដែលមានលិខិតលេខ១៣៨ហសបចុះថ្ងៃទី១២ សីហា ២០០៨ ស្រាប់។

ទី២-ក្រុមហ៊ុន Kahua Industry Investment Co.Ltd បានផ្តល់កម្ចីឥណទាន ចំនួន២.៥០០.០០០ដុល្លារអាមេរិកជូនលោកញ៉ឹក ប៊ុនឆៃ តាមរយៈកិច្ចព្រមព្រៀងចុះថ្ងៃទី​១២​សីហា ២០០៨ រវាងលោកញ៉ឹក ប៊ុនឆៃ ​និង​លោកចាន បៃឈួន (Chan Bei Chuan) នាយកក្រុមហ៊ុននេះ។

ទី៣-ក្រុមហ៊ុន Kahua Industry Investment Co.,Ltd បានផ្ទេរប្រាក់ កម្ចីដែលបានព្រមព្រៀងនេះជូនលោកញ៉ឹក ប៊ុនឆៃ តាមរយៈគណនីរបស់ទីប្រឹក្សា​គាត់ពីរ​រូប គឺគណនីលោកហុង ឡុង នៃធនាគារ First Commercial Bank ចំនួន១.៥០០.០០០ ដុល្លារអាមេរិកនិងគណនីលោកអ៊ិត សារិ នៃ ធនាគារ First Commercial Bank ចំនួន ១.០០០.០០០ដុល្លារអាមេរិក ។

ទី៤-លោកញ៉ឹក ប៊ុនឆៃ បានទទួលប្រាក់​សុទ្ធពីលោកហុងឡុងចំនួន១.០០០.០០០ដុល្លារ​អាមេរិក និងប្រាក់សុទ្ធពីលោក​អ៊ិត សារិ ចំនួន​៥០០.០០០ដុល្លារអាមេរិកសរុបទាំងអស់ចំនួន​១៥.០០០.០០០ដុល្លារអាមេរិក ។
យោងតាមឯកសារនៃកិច្ចព្រមព្រៀងមួយដែលចុះហត្ថលេខាដោយលោកញ៉ឹក ប៊ុនឆៃ ភាគី «ក» និងលោក Chan Bei Chuan ភាគី«ខ» ព្រមទាំងមានការចុះហត្ថលេខា​របស់​មេធាវីតំណាងបានឲ្យដឹងថា៖
ប្រកា១-ចំពោះថវិកាចំនួន៥.៨៣៥.៦០០ ដុល្លារអាមេរិកដែលក្រុមហ៊ុន Speedy Best Techenology Limited Co.,Ltd ត្រូវផ្ទេរ ឱ្យ​លោកញ៉ឹក ប៊ុនឆៃ តាមរយៈលិខិតលេខ​១៣៨​ហសបចុះថ្ងៃទី១២សីហា២០០៨ត្រូវបែង​ចែក​ដូចតទៅ ៖ ១-ថវិកាចំនួន៣.៣៣៥.៦០០ដុល្លារ​អាមេរិកត្រូវប្រគល់ឲ្យលោក Chan Bei Chuan នាយកក្រុមហ៊ុន Kahua Industry Investment Co.,Ltd ។ ២-ថវិកាចំនួន ២.៥០០.០០០ដុល្លារអាមេរិកទៀត ត្រូវ ប្រគល់ឱ្យលោកញ៉ឹក ប៊ុនឆៃ អគ្គលេខាធិការ​គណបក្សហ៊្វុនស៊ិនប៉ិចជាប្រាក់កម្ចី។​ប្រាក់កម្ចី​នេះលោកញ៉ឹក ប៊ុនឆៃ ​ត្រូវសងវិញក្នុង​ប្រាក់​ចំណេញ៥%ដែលក្រុមហ៊ុនទូរស័ព្ទ 3GKahua Industry Investment Co.,Ltd ត្រូវប្រគល់ឱ្យ​លោកញ៉ឹក ប៊ុនឆៃ ៕