ទីក្រុងញូវយ៉ក ៖ កាលពីថ្ងៃចន្ទកន្លងមក តម្លៃប្រេងបានធ្លាក់ចុះ ព្រោះតែកំណើនផលិតកម្មនៅក្នុងប្រទេសរុស្ស៊ី និងកំណើនសកម្មភាពបូមប្រេងនៅសហរដ្ឋអាមេរិកផងដែរ ។ អ្នកវិភាគគិតថា កំណើនទិន្នផលនៅអាមេរិកទូទាត់ជាមួយនឹងការកាត់បន្ថយផលិតកម្មរបស់ប្រទេសជាសមាជិកអង្គការនាំចេញប្រេង (OPEC)…
ទីក្រុងញូវយ៉ក ៖ កាលពីថ្ងៃចន្ទកន្លងមក តម្លៃប្រេងបានធ្លាក់ចុះ ព្រោះតែកំណើនផលិតកម្មនៅក្នុងប្រទេសរុស្ស៊ី និងកំណើនសកម្មភាពបូមប្រេងនៅសហរដ្ឋអាមេរិកផងដែរ ។
អ្នកវិភាគគិតថា កំណើនទិន្នផលនៅអាមេរិកទូទាត់ជាមួយនឹងការកាត់បន្ថយផលិតកម្មរបស់ប្រទេសជាសមាជិកអង្គការនាំចេញប្រេង (OPEC) ដែលបានអនុម័តអស់រយៈពេល១៨ខែមកហើយ និងជួយជំរុញដល់តម្លៃប្រេងយ៉ាងខ្លាំង ។ តាមទិន្នន័យពីក្រុមហ៊ុនផ្តល់សេវាកម្មថាមពល Baker Hughes ថា ចំនួនអណ្តូងប្រេងកាតថ្មីៗដែលកំពុងបូមនៅសហរដ្ឋអាមេរិក បានកើនឡើងមួយទៀតកាលពីសប្តាហ៍មុន មកស្មើនឹង៨៦២អណ្តូង។ នេះជាចំនួនខ្ពស់ជាងគេតាំងពីខែមីនា ឆ្នាំ២០១៥មក មានន័យថា ទិន្នផលប្រេងអាមេរិកដែលស្មើនឹង១០,៨លានធុងក្នុង១ថ្ងៃ នឹងបន្តកើនឡើងបន្ថែមទៀត ។
សារព័ត៌មានក្នុងស្រុករបស់ប្រទេសរុស្ស៊ីបានឲ្យដឹងកាលពីថ្ងៃសៅរ៍ដែរថា ទិន្នផលប្រេងរបស់រុស្ស៊ីបានកើនឡើងមកស្មើនឹង១១,១លានធុងក្នុង១ថ្ងៃកាលពីដើមខែមិថុនា ច្រើនជាងចំនួន១១លានធុងក្នុង១ថ្ងៃកាលពីខែឧសភា ។ ប៉ុន្តែទីផ្សារព្រួយបារម្ភពីការផ្គត់ផ្គង់ធ្លាក់ចុះក្នុងប្រទេសវ៉េណេស៊ុយអេឡា និងលទ្ធភាពនៃការធ្លាក់ចុះរបស់ប្រទេសអ៊ីរ៉ង់ផងដែរ ។ ផលិតកម្មនៅក្នុងប្រទេសវ៉េណេស៊ុយអេឡាកំពុងតែធ្លាក់ចុះ ដោយសារការដាក់ទណ្ឌកម្មសេដ្ឋកិច្ច វិបត្តិសេដ្ឋកិច្ច និងការគ្រប់គ្រងមិនបានដិតដល់ ខណៈប្រទេសអ៊ីរ៉ង់ ជួបប្រទះនឹងទណ្ឌកម្មសេដ្ឋកិច្ចពីអាមេរិក ដោយសារកម្មវិធីផលិតអាវុធនុយក្លេអ៊ែររបស់ប្រទេសនេះ ។
ធនាគារ JPMorgan នៅសហរដ្ឋអាមេរិកបានឲ្យដឹងដែរថា ៖« ការផ្គត់ផ្គង់ប្រេងពីប្រទេសមិនមែនជាសមាជិក OPEC នឹងកើនឡើងយ៉ាងខ្លាំងនៅឆ្នាំ២០១៩ ដែលនាំមុខដោយកំណើនប្រេងថ្មរបស់អាមេរិក រួមជាមួយប្រទេសផ្សេងទៀតដូចជា រុស្ស៊ី ប្រេស៊ីល កាណាដា និងកាហ្សាក់ស្ថាន ជាដើម » ៕
ចែករំលែកព័តមាននេះ