រាជធានីភ្នំពេញ ៖ អ្នកគ្រប់គ្រងផលិតកម្មសាស្តា សម្រេចលុបឈុតឆាកសម្តែងស្រើបស្រាលចេញពីបទចម្រៀងរបស់ខ្លួនដែលបានផលិតឡើង ។ ការសម្រេចចិត្តលុបចោលនេះបានធ្វើឡើងបន្ទាប់ពីមានការរិះគន់ខ្លាំងទៅលើបទចម្រៀងមួយបទមានចំណងជើងថា «ស្រីមុខលុយ»ដែលការសម្តែងមានឈុតឆាកស្នេហារោលរាល ។
បន្ទាប់ពីបទចម្រៀងនោះបានបង្ហោះតាមហ្វេសប៊ុកបានមួយថ្ងៃ អ្នកគ្រប់គ្រងផលិតកម្មសាស្តា លោកអ៊ុក រតនា បានសុំទោសទស្សនិកជនជាសាធារណៈចំពោះកំហុសឆ្គងមួយនេះ និងបានសម្រេចលុបចោលរូបភាពសិចស៊ីមួយចំនួនចេញ ។ តាមរយៈសារបង្ហោះតាមហ្វេសប៊ុកផ្លូវការរបស់ផលិតកម្មលោក អ៊ុក រតនា អ្នកគ្រប់គ្រងផលិតកម្មសាស្តាបានបញ្ជាក់ថា «សូមគោរពអរគុណដល់បងប្អូនពុកម៉ែដែលបានតាមដានទស្សនាក្នុងសង្គមហ្វេសប៊ុក យូធូប ព្រមទាំងគាំទ្របទចម្រៀង និងការខមិនរិះគន់ ដើម្បីកែប្រែក្នុងការផលិត MV ដែលមានឈុតឆាករូបភាពសិចស៊ី ហើយរូបខ្ញុំបាទគ្មានចេតនាធ្វើឲ្យប៉ះពាល់ដល់សិល្បៈវប្បធម៌ ប្រពៃណីជាតិខ្មែរយើងដ៏ផូរផង់នោះទេ ។
ខ្ញុំបាទ និងក្រុមការងាររបស់ផលិតកម្មសាស្តា ទាំងអស់ នឹងធ្វើការកែប្រែរូបភាពឆ្គាំឆ្គងណាដែលធ្វើឲ្យប៉ះពាល់ដល់សិល្បៈវប្បធម៌ប្រពៃណីជាតិខ្មែរយើងដ៏ផូរផង់នោះចេញ ដូច្នោះហើយសូមបងប្អូនពុកម៉ែមេត្តាអនុគ្រោះដល់ក្រុមហ៊ុន សាស្តា យើងខ្ញុំផង ។
សង្ឃឹមថា បងប្អូនពុកម៉ែនឹងជួយគាំទ្ររាល់ការផលិតMV លើកក្រោយៗ ក៏ដូចជាការរិះគន់ ដើម្បីស្ថាបនាកែប្រែរូបភាព ។ បទចម្រៀងដែលមានចំណងជើងថា «ស្រីមុខលុយ» ដែលបកស្រាយដោយតារាចម្រៀងថ្មីលោក ឈិត ធារ៉ាដេត ជាមួយនឹងការសម្តែងដោយតារាស្រីសិចស៊ីកញ្ញាវ៉ាន់ វល័ក្ខ និងលោកសុវណ្ណ ចាន់រត្តនា របស់ផលិតកម្មសាស្តា បានបង្កប់ដោយរូបភាពសិចស៊ីជាច្រើនឆាក ដែលអាចធ្វើអ្នកទស្សនាមានអារម្មណ៍ពុះកញ្ជ្រោល ។
អត្ថន័យនៃបទចម្រៀងមួយនេះគឺចង់បញ្ជាក់ពីនារីម្នាក់ដែលស្រឡាញ់លុយខ្លាំងរហូតហ៊ានក្បត់ចិត្តសង្សារខ្លួនឯង និងឈានទៅដល់ការដណ្តើមសង្សារគេជាថ្នូរ និងលះបង់ខ្លួនប្រាណគ្មានស្តាយស្រណោះ ។ អត្ថន័យនេះហើយដែលបានធ្វើឲ្យអ្នកដឹកនាំបានរៀបចំនូវឈុតឆាកស្នេហាក្តៅរោលរាលជាច្រើនប្លង់ជាមួយនឹងតួអង្គស្រីដែលចូលចិត្តសម្ញែងភាពសិចស៊ីផងនោះ ទើបការ សម្តែងមើលទៅពិតជាសក្តិសម »៕
ចែករំលែកព័តមាននេះ