រាជធានីភ្នំពេញ ៖ គណៈប្រតិភូចិនមួយក្រុមបានមកទស្សនៈកិច្ចកម្ពុជាធ្វើការស្វែងយល់អំពីតំបន់ឧស្សាហកម្ម និងតំបន់សេដ្ឋកិច្ចពិសេសរបស់ប្រទេសកម្ពុជា ដើម្បីជួយជំរុញតំបន់ទាំងនេះក្នុងអភិវឌ្ឍន៍ប្រទេសកម្ពុជា ។ ក្នុងជំនួបគួរសមជាមួយលោកទេព ងន អនុប្រធានទី២ ព្រឹទ្ធកាលពីថ្ងៃទី១១…
រាជធានីភ្នំពេញ ៖ គណៈប្រតិភូចិនមួយក្រុមបានមកទស្សនៈកិច្ចកម្ពុជាធ្វើការស្វែងយល់អំពីតំបន់ឧស្សាហកម្ម និងតំបន់សេដ្ឋកិច្ចពិសេសរបស់ប្រទេសកម្ពុជា ដើម្បីជួយជំរុញតំបន់ទាំងនេះក្នុងអភិវឌ្ឍន៍ប្រទេសកម្ពុជា ។ ក្នុងជំនួបគួរសមជាមួយលោកទេព ងន អនុប្រធានទី២ ព្រឹទ្ធកាលពីថ្ងៃទី១១ មិថុនានេះ នៅវិមានព្រឹទ្ធសភាលោក Shang Fulin សមាជិកគណៈកម្មាធិការអចិន្ត្រៃយ៍ និងជាប្រធានគណៈកម្មាធិការកិច្ចការសេដ្ឋកិច្ច នៃសភាប្រឹក្សានយោបាយប្រជាជនចិនជាអ្នកដឹកនាំគណៈប្រតិភូបានលើកឡើងថា ក្នុងដំណើរទស្សនកិច្ចរបស់គណៈប្រតិភូនាពេលនេះ គឺដើម្បីសិក្សា និងស្វែងយល់អំពីតំបន់ឧស្សាហកម្ម និងតំបន់សេដ្ឋកិច្ចពិសេសរបស់ប្រទេសកម្ពុជា ដើម្បីជួយជំរុញតំបន់ទាំងនេះក្នុងអភិវឌ្ឍប្រទេសកម្ពុជា ។
លោកបានវាយតម្លៃខ្ពស់ចំពោះទំនាក់ទំនងមិត្តភាព និងកិច្ចសហប្រតិបត្តិការជាប្រពៃណីរវាងប្រទេសទាំងពីរ ដែលមានតាំងពីរយូរលង់ណាស់មកហើយ ។ រហូតដល់ពេលបច្ចុប្បន្ននេះទំនាក់ទំនង និងកិច្ចសហប្រតិបត្តិការប្រទេសទាំងពីរកាន់តែត្រូវបានពង្រឹងបន្ថែមទៀត តាមរយៈការផ្លាស់ប្តូរទស្សនកិច្ចរបស់ថ្នាក់ដឹកនាំជាន់ខ្ពស់នៃប្រទេសទាំងពីរ ។ លោកក៏បានសម្តែងនូវការអបអរសាទរ និងវាយតម្លៃខ្ពស់ចំពោះការរីកចម្រើនសេដ្ឋកិច្ចរបស់កម្ពុជាដែលរក្សាបានក្នុងរង្វង់៧%ក្នុងមួយឆ្នាំ ហើយប្រទេសកម្ពុជា និងប្រទេសចិនបានបំពេញឱ្យគ្នាទៅវិញទៅមកលើផ្នែកសេដ្ឋកិច្ចនេះ ។ ជាមួយគ្នានេះឯកឧត្តមប្រធានគណៈប្រតិភូបានជម្រាបអំពីការកកើត និងការរៀបចំប្រព្រឹត្តទៅនៃសភាក្រុមប្រឹក្សានយោបាយប្រជាជនចិន ។
លោកទេព ងន បានលើកឡើងថា ទស្សនកិច្ចរបស់គណៈប្រតិភូបានរួមចំណែកដ៏សំខាន់ក្នុងការបន្តពង្រឹងពង្រីកចំណងមិត្តភាពសាមគ្គី-ភាព និងកិច្ចសហប្រតិបត្តិការដ៏ល្អរវាងប្រជាជន និងប្រទេសទាំងពីរ ។ ចំណងមិត្តភាព សាមគ្គីភាព និងកិច្ចសហប្រតិបត្តិការជាប្រពៃណីនេះបានកសាងឡើងមាន រយៈពេល៦០ឆ្នាំ ដោយករុណាព្រះបាទ សម្តេចព្រះនរោត្តមសីហនុ «ព្រះបរមរតនកោដ្ឋ» ជាមួយលោកប្រធានម៉ៅ សេងទុង និងលោកនាយករដ្ឋមន្ត្រីជូនអេនឡាយ ព្រមទាំងថ្នាក់ដឹកនាំចិនជំនាន់មុន ។ លោកអនុប្រធានទី២ ព្រឹទ្ធសភាបានបន្តថា សម្រាប់ទស្សនកិច្ចរបស់គណៈប្រតិភូនាឱកាសនេះស្របពេលដែលប្រទេសទាំងពីរប្រារព្ធខួបលើកទី៦០(១៩៥៨-២០១៨) ថ្ងៃបង្កើតទំនាក់ទំនងការទូតរវាងព្រះ រាជាណាចក្រកម្ពុជាជាមួយនឹងសាធារណរដ្ឋប្រជាមានិតចិន ។ បច្ចុប្បន្ននេះទំនាក់ទំនង និងកិច្ចសហប្រតិបត្តិការនៃប្រទេសទាំងពីរបានឈានដល់កម្រិតភាពជាដៃគូយុទ្ធសាស្ត្រគ្រប់ជ្រុងជ្រោយ ។
ក្នុងនាមប្រជាជនកម្ពុជាលោកអនុប្រធានទី២ព្រឹទ្ធសភាបានថ្លែងអំណរគុណដ៏ជ្រាលជ្រៅបំផុតចំពោះវិភាគទានដ៏ធំធេងរបស់រដ្ឋាភិបាល និងប្រជាជនចិនក្នុងការរួមចំណែកយ៉ាងសកម្មក្នុងការស្តារ និងអភិវឌ្ឍប្រទេសកម្ពុជា ។ ជំនួយរដ្ឋាភិបាលចិនការចូលរួមចំណែករបស់វិស័យឯកជនចិន និងអ្នកទេសចរចិនបានជួយអភិវឌ្ឍប្រទេសកម្ពុជា និងបានផ្លាស់ប្តូរជីវភាពរស់នៅរបស់ប្រជាជនកម្ពុជាជាលំដាប់ ។ បើគ្មានការគាំទ្រដោយសប្បុរស និងដោយគ្មានលក្ខខណ្ឌពីប្រទេសចិនទេនោះកិច្ចដំណើរការនៃការអភិវឌ្ឍសង្គម-សេដ្ឋកិច្ចរបស់ព្រះរាជាណាចក្រកម្ពុជាក្នុងរយៈពេល២ទសវត្សរ៍ចុងក្រោយនេះក៏មិនជោគជ័យដូចថ្ងៃនេះដែរ ហេតុនេះការរីកចម្រើនរបស់ព្រះរាជាណាចក្រកម្ពុជាទាំងពេលបច្ចុប្បន្ន និងពេលអនាគតមិនអាចកាត់ផ្តាច់បានពីការឧបត្ថម្ភគាំទ្រពីសាធារណៈរដ្ឋប្រជាមានិតចិនបានឡើយ ។
លោកទេព ងន បានគូសបានបញ្ជាក់ថា «ព្រះរាជាណាចក្រកម្ពុជាចាត់ទុកប្រទេសចិន និងប្រជាជនចិនជាអ្នកជិតខាងល្អ មិត្តភក្តិល្អ បងប្អូនល្អ និងជាដៃគូល្អ ។ កម្ពុជាបច្ចុប្បន្ន និងអនាគតគាំទ្រឥតងាករេនូវគោលនយោបាយចិនតែមួយ» ។
លោកក៏បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងសភាប្រឹក្សានយោបា យប្រជាជនចិន និងព្រឹទ្ធសភាកម្ពុជាដោយបានធ្វើការផ្លាស់ប្តូរទស្សនកិច្ចគ្នាទៅវិញទៅមកជារៀងរាល់ឆ្នាំ ។ សម្តេចវិបុលសេនាភក្តីសាយ ឈុំប្រធានព្រឹទ្ធសភាបានសម្រេចធ្វើទស្សនកិច្ចជាផ្លូវការនៅសាធារណៈរដ្ឋប្រជាមានិតចិនក្នុងខែតុលា ឆ្នាំ២០១៨នេះ ។
ជាមួយគ្នានេះលោកអនុប្រធានទី២ ព្រឹទ្ធសភាបានថ្លែងអំណរគុណដ៏ជ្រាលជ្រៅបំផុតចំពោះជំនួយចាំបាច់ដ៏ថ្លៃថ្លារបស់រដ្ឋាភិបាល និងសភាប្រឹក្សានយោបាយប្រជាជនចិនដែលបានជួយឧបត្ថម្ភគាំទ្រជាបន្តបន្ទាប់ដល់ព្រឹទ្ធសភាចាប់តាំងពីនីតិកាលទី១ រហូតមកដល់បច្ចុប្បន្នដែលមានទឹកប្រាក់សរុបជាង១៦លានដុល្លារអាមេរិក ។ ព្រឹទ្ធសភាបានប្រើប្រាស់ជំនួយរបស់មិត្តចិនដោយការទទួលខុសត្រូវខ្ពស់ និងមានប្រសិទ្ធភាពពិតប្រាកដ ។ សេដ្ឋកិច្ចរបស់កម្ពុជាដែលបន្តរីកចម្រើនរឹងមាំក្នុងអត្រាកំណើន៧% ។ កំរិតជីវភាពរបស់ប្រជាជនកាន់តែល្អប្រសើរដែលឆ្លុះបញ្ចាំងតាមសូចនាករសង្គម ក្នុងមនុស្សម្នាក់ទទួលបានជាមធ្យម១,០៤២ ដុល្លារអាមេរិកក្នុងឆ្នាំ២០១៣ នឹងកើនដល់ប្រមាណ១,៤៣៥ ដុល្លារអាមេរិកនៅឆ្នាំ២០១៧ ។
លោកក៏បានកើកឡើងថា នាថ្ងៃទី២៩ ខែកក្កដា ឆ្នាំ២០១៨ ខាងមុខនេះព្រះរាជាណាចក្រកម្ពុជានឹងធ្វើការបោះឆ្នោតជ្រើសរើសតំណាងរាស្ត្រនីតិកាលទី៦ ។ ឯកឧត្តមអនុប្រធានទី២ព្រឹទ្ធសភាសង្ឃឹមថា សាធារណៈរដ្ឋប្រជាមានិតចិន និងបញ្ចូនអ្នកសង្កេតការណ៍មកចូលរួមសង្កេតការណ៍ការបោះឆ្នោតនាពេលខាងមុខនេះ។ តាមរយៈគណៈប្រតិភូលោកទេព ងនក៏បានស្នើទៅរដ្ឋាភិបាលចិនជួយជំរុញអ្នកវិនិយោគ និងអ្នកទេសចរចិនមកកម្ពុជាឱ្យបានច្រើនថែមទៀតផងដែរ ៕
ចែករំលែកព័តមាននេះ