ទីក្រុងហុងកុង ៖ ផ្សារភាគហ៊ុនសំខាន់ៗនៅអាស៊ី និងអឺរ៉ុបបានកើនឡើងស្រឺតៗកាលពីថ្ងៃទី១២ មិថុនា បន្ទាប់ពីលោកប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន បានចូលរួមកិច្ចប្រជុំជាប្រវត្តិសាស្ត្រនៅប្រទេសសិង្ហបុរី ខណៈដែលវិនិយោគិនបានសម្លឹងឆ្ពោះទៅលើគោលនយោបាយសំខាន់ៗនៅឯធនាគារបម្រុង និងធនាគារកណ្ដាលអឺរ៉ុបនៅសប្ដាហ៍នេះ ។ នេះបើតាមគេហទំព័រ channelnewsasia ។ ក្នុងនោះ ទីផ្សារភាគហ៊ុន Nikkei នៅក្រុងតូក្យូ កើនឡើង០,៣%, ភាគហ៊ុន Hang Seng របស់ហុងកុង កើនឡើង០,១%, ភាគហ៊ុន Composite នៅសៀងហៃ កើនឡើង០,៩% និងភាគហ៊ុន FTSE នៅទីក្រុងឡុងដ៍ កើនឡើង០,៣% ។
លោកប្រធានាធិបតី ដូណាល់ ត្រាំ បានថ្លែងថា លោកបានបង្កើតចំណងមិត្តភាពដ៏ពិសេសជាមួយមេដឹកនាំកូរ៉េខាងជើង និងជាការបញ្ជាក់សាជាថ្មីពីការប្ដេជ្ញាចិត្តរបស់លោក ក្នុងការរំសាយអាវុធនុយក្លេអ៊ែរនៅក្នុងឧបទ្វីបកូរ៉េ នៅក្នុងកិច្ចព្រមព្រៀងមួយដែលបានចុះហត្ថលេខាដោយភាគីទាំងពីរ ។ ខណៈពេលដែលកិច្ចប្រជុំនេះមិនត្រូវបានរំពឹងថា នឹងឃើញលទ្ធផលភ្លាមៗនោះ វាបានផ្តល់ក្តីសង្ឃឹមសម្រាប់សន្តិភាពនៅលើឧបទ្វីបកូរ៉េ ។
ទោះជាយ៉ាងណាក៏ដោយ វិនិយោគិននៅតែព្រួយបារម្ភអំពីសង្គ្រាមពាណិជ្ជកម្មពិភពលោកដែលអាចកើតមានឡើង បន្ទាប់ពីកិច្ចប្រជុំកំពូល G7 នៅចុងសប្តាហ៍នៅប្រទេសកាណាដា គ្រាដែលលោក ដូណាល់ ត្រាំ ដកការគាំទ្រចំពោះសេចក្តីថ្លែងការណ៍រួម និងចោទប្រកាន់នាយករដ្ឋមន្ត្រីកាណាដា លោក Justin Trudeau ថា មិនស្មោះត្រង់ ៕
ចែករំលែកព័តមាននេះ