រាជធានីភ្នំពេញ ៖ ក្រសួងពាណិជ្ជកម្មដែលជាសេនាធិការរបស់រាជរដ្ឋាភិបាល បានបង្ហាញនូវសុទិដ្ឋិនិយមខ្ពស់ចំពោះទំនាក់ទំនងពាណិជ្ជកម្មទ្វេភាគីរវាងកម្ពុជា និងថៃ នៅឆ្នាំ២០២០ខាងមុខ ក្នុងទំហំទឹកប្រាក់១៥ប៊ីលានដុល្លារអាមេរិក ដែលជាការប្ដេជ្ញាចិត្តរបស់ប្រមុខថ្នាក់ដឹកនាំនៃប្រទេសទាំងពីរកាលពីឆ្នាំ២០១៥ ។ ក្នុងជំនួបរវាងរដ្ឋមន្ត្រីពាណិជ្ជកម្មកម្ពុជា និងរដ្ឋមន្ត្រីពាណិជ្ជកម្មថៃ កាលពីពេលថ្មីៗនេះ លោក ប៉ាន សូរស័ក្តិ បានឲ្យដឹងថា ទំហំពាណិជ្ជកម្មទ្វេភាគីរវាងកម្ពុជា និងថៃ នឹងសម្រេចបានក្នុងទំហំទឹកប្រាក់១៥ប៊ីលានដុល្លារអាមេរិកក្នុងឆ្នាំ២០២០ តាមផែនការដែលបានគ្រោងទុក ខណៈឆ្នាំ២០១៧កន្លងទៅនេះ ទំហំពាណិជ្ជកម្មរវាងប្រទេសទាំងពីរបានសម្រេចរួចហើយក្នុងទំហំជាង៦ប៊ីលានដុល្លារអាមេរិក ។
លោករដ្ឋមន្ត្រីបានបង្ហាញពីកត្តាមួយចំនួន ដែលអាចធ្វើឲ្យទំហំពាណិជ្ជកម្មរវាងប្រទេសពីរ សម្រេចទៅតាមផែនការដែលបានគ្រោង ទុក ក្នុងនោះមានដូចជា ការតភ្ជាប់ហេដ្ឋារចនាសម្ព័ន្ធ និងការបើកច្រកព្រំដែនថ្មីរវាងប្រទេសទាំងពីរ ដូចជា ច្រកព្រំដែនភ្នំដី ក្នុងខេត្តបាត់ដំបង និងច្រកបានខៅឌីន ក្នុងខេត្តស្រះកែវ ជាដើម ។ លោករដ្ឋមន្ត្រីថ្លែងថា ៖« ការបើកច្រកព្រំដែនថ្មីៗរវាងប្រទេសទាំងពីរនេះ វាមិនត្រឹមតែសម្រួលដល់ការដឹកជញ្ជូនទំនិញទៅវិញទៅមករវាងប្រទេសពីរនោះទេ ក៏ប៉ុន្តែវានឹងធ្វើឲ្យភ្ញៀវទេសចរកម្ពុជា និងថៃ អាចចេញចូលកម្សាន្តនៅតំបន់រមណីយដ្ឋានល្បីៗនៅកម្ពុជា និងថៃបានផងដែរ » ។
ទន្ទឹមនឹងទំនាក់ទំនងល្អរវាងប្រទេសទាំងពីរ ទាំងនយោបាយ សេដ្ឋកិច្ច និងសង្គម លោករដ្ឋមន្ត្រី ប៉ាន សូរស័ក្ដិ ក៏បានសំណូមពរដល់ភាគីថៃ ចាត់វិធានការឲ្យបានម៉ឺងម៉ាត់ចំពោះករណីប្រើប្រាស់និមិត្តសញ្ញាជាតិរបស់កម្ពុជា គឺប្រាសាទអង្គរវត្តនៅលើបាវអង្កររបស់ថៃផងដែរ ដែលកំពុងធ្វើចរាចរណ៍លក់នៅលើទីផ្សារមួយចំនួនក្នុងទីក្រុងម៉ុងរេអាល់នៃប្រទេសកាណាដា ។ ជាការឆ្លើយតបនឹងការសំណូមពរនេះ លោក ប៉ាន់យ៉ារ៉ាក់ ពលទ័ព (Panyarak Pool thup) ឯកអគ្គរាជទូតថៃថ្មីប្រចាំកម្ពុជា បានលើកឡើងអំពីចំណាត់ការរបស់អាជ្ញាធរថៃ ក្នុងការជូនដំណឹងដល់ភាគីពាក់ព័ន្ធ តាមរយៈកិច្ចសហការជាមួយតំណាងពាណិជ្ជកម្មនៃប្រទេសកាណាដា ដើម្បីទប់ស្កាត់មិនឲ្យទំនិញអង្ករថៃដាក់ស្លាកអង្គរវត្ត មានវត្តមានតទៅទៀតនៅតាមទីផ្សារក្នុងទីក្រុងម៉ុងរេអាល់ ។
លោកបានថ្លែងអំណរគុណរដ្ឋមន្ត្រីពាណិជ្ជកម្ម ដែលកន្លងមក បានជួយសម្របសម្រួលពាណិជ្ជករថៃ ក្នុងការធ្វើធុរកិច្ច និងការរៀបចំព្រឹត្តិការណ៍ពិព័រណ៍ពាណិជ្ជកម្មផ្សេងៗនៅក្នុងប្រទេសកម្ពុជាផងដែរ ។
ពាក់ព័ន្ធនឹងទំហំពាណិជ្ជកម្មរវាងកម្ពុជា និងថៃនេះដែរ ភាគីស្ថានទូតថៃប្រចាំព្រះរាជាណាចក្រកម្ពុជា បានលើកឡើងថា ភាគីថៃនឹងប្រឹងប្រែងរៀបចំព្រឹត្តិការណ៍ពិព័រណ៍ថៃបន្ថែមទៀតនៅកម្ពុជា ដើម្បីផ្សព្វផ្សាយទំនិញថៃនៅកម្ពុជា។ ក្រៅពីនោះ ភាគីថៃនឹងអញ្ជើញអាជីវករ និងពាណិជ្ជករកម្ពុជាទៅចូលរួមព្រឹត្តិការណ៍ពាណិជ្ជកម្មនៅប្រទេសថៃ ដើម្បីចាប់ដៃបង្កើនធុរកិច្ចរវាងគ្នាបន្ថែមទៀត ។
គួរបញ្ជាក់ផងដែរថា នៅចុងត្រីមាសទី១ឆ្នាំ២០១៨កន្លងទៅនេះ ប្រទេសកម្ពុជា និងថៃ បានរៀបចំកិច្ចប្រជុំគណៈកម្មការចម្រុះផ្នែកពាណិជ្ជកម្ម លើកទី៦ (6th JTC) នៅសណ្ឋាគារសូហ្វីតែល ភ្នំពេញ ភូគីត្រា ដើម្បីពិភាក្សា និងផ្លាស់ប្តូរយោបល់លើបញ្ហាប្រឈមផ្សេងៗ សំដៅជំរុញទំហំពាណិជ្ជកម្មទ្វេភាគីឲ្យបាន១៥ប៊ីលានដុល្លារនៅឆ្នាំ២០២០។ ក្នុងនោះ ប្រទេសទាំងពីរបានព្រមព្រៀងពង្រឹងការអនុវត្តកិច្ចសម្រួលពាណិជ្ជកម្ម ការបើកច្រកព្រំដែនថ្មីៗបន្ថែម និងការរៀបចំឲ្យមានវេទិកាធុរកិច្ច និងវិនិយោគកាន់តែច្រើន ។
ក្នុងរយៈពេល៤ខែដើមឆ្នាំនេះ ទំហំពាណិជ្ជកម្មរវាងប្រទេសទាំងពីរកម្ពុជា-ថៃ គិតជាទឹកប្រាក់ស្មើ២.១៣៣លានដុល្លារ កើនឡើងជាង២៨% បើធៀបនឹងរយៈពេលដូចគ្នាឆ្នាំ២០១៧៕
ចែករំលែកព័តមាននេះ