រាជធានីភ្នំពេញ ៖ បុរសម្នាក់ស្រវឹងជោកបើករថយន្តលឿនដូចហោះរេចង្កូតបុកចូលកន្លែងអ្នកលក់គុយទាវ បាយឆា និងមីឆា ពេលយប់ បណ្តាលអោយរងការខូចខាតស្ទើរទាំងស្រុង ធ្វើអោយអ្នកលក់ និងភ្ញៀវដែលកំពុងតែអង្គុយហូបអាហារនៅទីនោះ ភ័យព្រលឹងចុងសក់…
រាជធានីភ្នំពេញ ៖ បុរសម្នាក់ស្រវឹងជោកបើករថយន្តលឿនដូចហោះរេចង្កូតបុកចូលកន្លែងអ្នកលក់គុយទាវ បាយឆា និងមីឆា ពេលយប់ បណ្តាលអោយរងការខូចខាតស្ទើរទាំងស្រុង ធ្វើអោយអ្នកលក់ និងភ្ញៀវដែលកំពុងតែអង្គុយហូបអាហារនៅទីនោះ ភ័យព្រលឹងចុងសក់ រត់បាតជើងសព្រាត ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី១៣ ខែមិថុនា នៅតាមបណ្តោយមហាវិថីព្រះនរោត្តម កែងនឹងផ្លូវ៣០២ ទល់មុខនឹងនាយកដ្ឋានតម្រង់ទិសវិជ្ជាជីវៈ សង្កាត់បឹងកេងកង១ ខណ្ឌចំការមន។
ប្រភពព័ត៌មានពីអ្នកលក់បានប្រាប់ទាំងភ័យញ័រខ្លួនថា មុនពេលកើតហេតុ នៅក្នុងតូបលក់មីឆា មានគ្នា៤នាក់ អ្នកលក់២នាក់ និងភ្ញៀវពីរនាក់ ពេលកំពុងតែអង្គុយហូបអាហារ ស្រាប់តែមានរថយន្តមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ ២AC-៥៦៣១ បើកបរដោយបុរសម្នាក់វ័យជាង៣០ឆ្នាំ ក្នុងស្ថានភាពស្រវឹង បើកបរតាមបណ្តោយមហាវិថីព្រះនរោត្តម ក្នុងទិសដៅពីត្បូងទៅជើង លុះមកដល់កន្លែងកើតហេតុស្រាប់តែរេចង្កូតទៅខាងស្តាំ បុកនឹងបង្គោលស្លាកបង្ហាញលេខផ្លូវមួយដើមដាច់ត្រឹមគល់ប៉ើងជាង១០ម៉ែត្រ ហើយរថយន្តក៏បន្តល្បឿនទៅបុកនឹងឆ្នាំងគុយទាវ បណ្តាលអោយប៉ើងទាំងឆ្នាំងស៊ុប និងធុងហ្គាសខ្ចាត់ខ្ចាយ ហើយរថយន្តបានជ្រុលទៅបុករះតុកៅអីថែមទៀត បណ្តាលអោយបាក់បែកខូចខាតរបស់របរលក់ដូរស្ទើរទាំងស្រុង ហើយខ្ទាតតុកៅអីទៅប៉ះអ្នកលក់មីឆាម្នាក់បណ្តាលអោយរងរបួសបែកចិញ្ចើម និងខ្ទាតទឹកស៊ុបរលាកតិចតួច ចំណែក៣នាក់ទៀតខ្ទាតទឹកជ្រលក់ ប្រឡាក់ពេញខ្លួន ប្រឹងរត់
បាតជើងសព្រាត គេចពីរថយន្តបង្កទាំងព្រលឹងចុងសក់ ។
ភ្លាមៗនោះម្ចាស់រថយន្តបានចេញពីរថយន្តមកសុំទោសទាំងស្ថានភាពស្រវឹង នឹងបម្រុងឡើងរថយន្តបើកគេចខ្លួន តែត្រូវប្រជាពលរដ្ធឃាត់ជាប់ប្រគល់អោយទៅសមត្ថកិច្ចនាំខ្លួនទៅប៉ុស្តិ៍នគរបាលបឹងកេងកង១ និងអោយម្ចាស់តូបរងគ្រោះទៅចរចា និងដោះស្រាយគ្នា។ ចំណែករថយន្តបង្កត្រូវបានសមត្ថកិច្ចជំនាញធ្វើការវាស់វែងយករថយន្តទៅរក្សានៅការិយាល័យនគរបាលចរាចរណ៍ជើងគោករង់ចាំការដោះស្រាយគ្នា និងសងការខូចខាតបង្គោលបង្ហាញលេខផ្លូវដែលបាក់នោះ ៕
ចែករំលែកព័តមាននេះ