ខេត្តបាត់ដំបង ៖ បុរសអាយុ៥៥ឆ្នាំម្នាក់រងរបួសធ្ងន់ និងកូនប្រុស២នាក់រងរបួសស្រាល ដោយសារការផ្ទុះគ្រាប់ B40 មួយគ្រាប់កាលពីវេលាម៉ោង២ និង៣០នាទីរសៀល ថ្ងៃទី៨ មីនា ក្នុងពេលកាប់ដីដាំដំណាំក្នុងចំការស្ថិតនៅភូមិអូរតាកឹងលើ ឃុំសំឡូត ស្រុកសំឡូត។ នេះមិនមែនជាករណីផ្ទុះគ្រាប់លើកទី១ទេ សំរាប់តំបន់ដែលជាអតីតសមរភូមិក្នុងទសវត្សទី៨០ ។
លោកស សាវឿន នាយនគរបាលប៉ុស្តិ៍សំឡូតប្រាប់កោះសន្តិភាពក្រោយពេលកើតហេតុបន្តិចថា ការផ្ទុះគ្រាប់ដែលសេសសល់ពី សម័យសង្គ្រាមនេះបណ្តាលឱ្យមនុស្ស៣នាក់ឪពុក និងកូនរងរបួស។ បុរសជាឪពុកឈ្មោះ ជា សាន់ អាយុ៥៥ឆ្នាំ របួសធ្ងន់ និងកូនប្រុសរបស់គាត់២នាក់ ឈ្មោះស៊ឹម វិត អាយុ១៥ឆ្នាំ និងឈ្មោះស៊ឹម ណុល អាយុ១៧ឆ្នាំ របួសស្រាល។
បើតាមការបំភ្លឺពីកូនប្រុសដែលស្រង់សំដីដោយសមត្ថកិច្ចថា ឪពុករបស់គេបានកាប់ដីដាំពោត និងដំឡូង ហើយប៉ះចំគ្រាប់B៤០ដែលកប់ក្នុងដី ។ គ្រាប់នោះផ្ទុះ ខណៈពួកគេទាំង២នាក់ជាកូនកំពុងដាំពោតនៅក្បែរឪពុក។ ឪពុករបស់គេរងរបួសដាច់ម្រាមដៃ និងរបួសត្រង់ពោះ រីឯពួកគេជាកូនគ្រាន់តែរបួសតិចតួចប៉ុណ្ណោះ។
សូមបញ្ជាក់ថា កាលពីថ្ងៃទី៦ មីនា មានការផ្ទុះគ្រាប់កាំភ្លើងត្បាល់ធុន៨០មិល្លីម៉ែត្រម្តងមកហើយនៅភូមិវាលរលឹម ឃុំតាតោក ស្រុកសំឡូតដដែល។ ការផ្ទុះនោះបណ្តាលឱ្យកសិករឈ្មោះអោម គឹម ភេទប្រុស អាយុ៥៥ឆ្នាំ ស្លាប់នៅកន្លែងកើតហេតុដោយសារតែគាត់កាប់ព្រៃចំការប៉ះចំគ្រាប់ដែលគេកែច្នៃសំរាប់ធ្វើសង្គ្រាមក្នុងទសវត្សឆ្នាំ៨០ ។
អាជ្ញាធរស្រុកសំឡូតធ្លាប់បានប្រាប់ភ្នាក់ងារកោះសន្តិភាពថា នៅតាមតំបន់ព្រៃភ្នំភាគច្រើនក្នុងស្រុកសំឡូតនៅតែមានគ្រាប់មិនទាន់ផ្ទុះគ្រប់ប្រភេទសេសសល់ពីសម័យសង្គ្រាម ហើយប្រកបដោយគ្រោះថ្នាក់បំផុតសំរាប់ប្រជាកសិករ ប៉ុន្តែកន្លែងខ្លះបានបោសសំអាតដោយក្រុមកំចាត់មីនរួចហើយ ៕
ចែករំលែកព័តមាននេះ