រាជធានីភ្នំពេញ ៖ បុរសចំណាស់ម្នាក់បានដើរលេងផឹកស៊ីយប់រហូតស្រវឹងធ្លាក់ភ្នែក ហើយនៅមិនព្រម ត្រលប់ទៅផ្ទះឲ្យប្រពន្ធកូនរបស់ខ្លួនគក់ច្របាច់ ឬកោសខ្យល់ឲ្យទេ។ ផ្ទុយទៅវិញបែរជាចូលទៅ ហាងម៉ាស្សា កោសជប់ មួយកន្លែង…
រាជធានីភ្នំពេញ ៖ បុរសចំណាស់ម្នាក់បានដើរលេងផឹកស៊ីយប់រហូតស្រវឹងធ្លាក់ភ្នែក ហើយនៅមិនព្រម ត្រលប់ទៅផ្ទះឲ្យប្រពន្ធកូនរបស់ខ្លួនគក់ច្របាច់ ឬកោសខ្យល់ឲ្យទេ។ ផ្ទុយទៅវិញបែរជាចូលទៅ ហាងម៉ាស្សា កោសជប់ មួយកន្លែង ហើយឲ្យម្ចាស់ហាង ម៉ាស្សា និងកោសខ្យល់ឲ្យទៅវិញ។ ខណៈនោះស្ត្រីជាប្រពន្ធរបស់បុរសនេះដែលមានអាយុប្រហែល៥០ឆ្នាំប្លាយទៅហើយនោះ បានដឹងថាប្ដីចូលទៅក្នុងហាងម៉ាស្សាបែបនេះ កើតការប្រចណ្ឌ និងក្ដៅចិត្តស្អិតទ្រូងយ៉ាងខ្លាំង ក៏បាននាំកូន២នាក់ រួមជាមួយបុរសម្នាក់ទៀត លើកគ្នាសម្រុកចូលទៅវាយស្ត្រីម្ចាស់ហាង បណ្ដាលឲ្យរងរបួសជាំមុខជាំភ្នែក ដោយចោទប្រកាន់ថា ស្ត្រីរូបនេះជាសហាស្មន់របស់ប្តីខ្លួន។ ហេតុការណ៍នោះបានកើតឡើង កាលពីវេលាម៉ោង៣ និង៣០នាទី ទៀបភ្លឺ ថ្ងៃទី១១ ខែមិថុនា ឆ្នាំ២០១៨ នៅក្នុងហាងម៉ាស្សា កោសជប់ ដែលមានទីតាំងស្ថិតនៅជិតផ្សារបុរីញូវថោន ក្នុងភូមិព្រៃទា១ សង្កាត់ ចោមចៅ៣ ខណ្ឌពោធិសែនជ័យ រាជធានីភ្នពេញ។
ស្ត្រីរងគ្រោះដែលជាម្ចាស់ហាងម៉ាស្សា កោសជប់ មិនត្រូវបានស្គាល់អត្តសញ្ញាណទេ នាងមានអាយុប្រហែល៣០ឆ្នាំ រងរបួសជាំភ្នែក និងមុខខាងស្តាំ។ នាងបានធ្វើដំណើរទៅកាន់ប៉ុស្ដិ៍ចោមចៅ៣ ដាក់ពាក្យប្ដឹងសុំឲ្យនគរបាលជួយរកយុត្តិធម៌ កាលពីវេលាល្ងាច ថ្ងៃទី១២ ខែមិថុនា ឆ្នាំ២០១៨ ហើយក៏ទទួលបានសំណងចំនួន៨០០ដុល្លារ ពីខាងភាគីបង្កផងដែរ។ ចំណែកស្ត្រីដៃដល់រួមជាមួយប្ដីដែលចូលទៅម៉ាស្សាកោសជប់ និងកូនៗព្រមទាំងបក្ខពួកក៏មិនត្រូវបង្ហាញពីអត្តសញ្ញាណដែរ ប៉ុន្តែគឺជាអ្នករស់នៅក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។ ម្ចាស់ហាងម៉ាស្សា កោសជប់ ខាងលើបានឲ្យដឹងថា នៅមុនពេលកើតហេតុមានបុរសស្រវឹងស្រាម្នាក់ បានជិះម៉ូតូ១គ្រឿងទៅឈប់នៅមុខហាងរបស់នាង ខណៈនោះនាងបានបិទទ្វារដរកទៅហើយ។
បុរសនោះបានស្រែកហៅដាស់ឲ្យនាងបើកទ្វារ ម៉ាស្សា កោសជប់ឲ្យ ពេលនោះនាងមានការរារែកចិត្តមិនចង់បើកទ្វារទេ ប៉ុន្តែនឹកឃើញថាមុខរបរតែប៉ុណ្ណឹងហើយ ក៏ទ្រាំបើកទ្វារម៉ាស្សាកោសខ្យល់ឲ្យបុរសនោះ និងត្រូវរ៉ូវគ្នាក្នុងតម្លៃ១ម៉ឺនរៀល។ ប៉ុន្តែអ្វីដែលនឹកស្មានមិនដល់នោះគឺក្នុងពេលកំពុងម៉ាស្សាស្រាប់តែប្រពន្ធរួមទាំងកូនរបស់បុរសនោះព្រមទាំងបុរសម្នាក់ផ្សេងទៀតបានទៅដល់គោះទ្វារហៅ ហើយពេលនាងបើកទ្វារ ក៏ត្រូវស្ត្រីនោះរួមទាំងកូនៗ របស់គាត់បានព្រួតគ្នាវាយនាងឥតប្រណីបណ្ដាលឲ្យរងរបួសតែម្ដង។ ដោយបានចោទប្រកាន់ថា នាងជាសហាយស្មន់ជាមួយប្ដីគាត់ ទោះមើលឃើញច្បាស់នឹងភ្នែកនូវស្លាកយីហោម៉ាស្សាកោសជប់ ហើយក៏ដោយ បន្ទាប់មកស្ត្រីដៃដល់ក៏បាននាំប្ដីរួមទាំងកូន និងបក្ខពួកចាកចេញទៅបាត់អស់។
នគរបាលបាននិយាយថា ក្រោយពេលកើតហេតុជនរងគ្រោះមិនបានប្ដឹងភ្លាមៗទេ គឺរហូតដល់វេលាល្ងាច ថ្ងៃទី១២ ខែមិថុនា ទើបធ្វើដំណើរទៅដាក់ពាក្យប្ដឹងនៅប៉ុស្ដិ៍ចោមចៅ៣ ហើយនគរបាលប៉ុស្តិ៍បានហៅ ខាងភាគីជនដៃដល់ទៅជួបដោះស្រាយគ្នា ប៉ុន្តែមិនបានឃើញបុរសជាប្ដីទៅឡើយ។ ខណៈនោះជនរងគ្រោះបានទាមទារសំណងជំងឺចិត្តចំនួន១ពាន់ដុល្លារ ហើយក៏មានការចរចាគ្នា ហើយស្ត្រីបង្កនៅតែចោទប្រកាន់នាងម៉ាស្សានោះថាជាសហាយស្មន់របស់ប្ដីខ្លួនដដែល ប៉ុន្តែទីបំផុតក៏សុខចិត្តសងទៅខាងជនរងគ្រោះចំនួន៨០០ដុល្លារជាការបញ្ចប់រឿង៕
ចែករំលែកព័តមាននេះ