រាជធានីភ្នំពេញ ៖ ក្មេងប្រុសជំទង់ម្នាក់ត្រូវបានសន្តិសុខបុរីពិភពថ្មីចាប់ខ្លួនបាន ចំណែកបក្ខពួកម្នាក់ទៀត ជិះម៉ូតូរត់គេចខ្លួនបាត់ បន្ទាប់ពីពួកគេធ្វើសកម្មភាពឆក់ទូរស័ព្ទដៃ ពីស្ត្រីជនជាតិចិនម្នាក់ ដែលកំពុងដើរ តាមផ្លូវរុញរទេះកូនតូចបណ្ដើរនិយាយទូរស័ព្ទបណ្ដើរ។ បន្ទាប់មកសន្តិសុខបានប្រគល់ជូននគរបាល…
រាជធានីភ្នំពេញ ៖ ក្មេងប្រុសជំទង់ម្នាក់ត្រូវបានសន្តិសុខបុរីពិភពថ្មីចាប់ខ្លួនបាន ចំណែកបក្ខពួកម្នាក់ទៀត ជិះម៉ូតូរត់គេចខ្លួនបាត់ បន្ទាប់ពីពួកគេធ្វើសកម្មភាពឆក់ទូរស័ព្ទដៃ ពីស្ត្រីជនជាតិចិនម្នាក់ ដែលកំពុងដើរ តាមផ្លូវរុញរទេះកូនតូចបណ្ដើរនិយាយទូរស័ព្ទបណ្ដើរ។ បន្ទាប់មកសន្តិសុខបានប្រគល់ជូននគរបាល ប៉ុស្ដិ៍ចោមចៅ១ នាំទៅសាកសួរដើម្បីចាត់ការតាមច្បាប់ ដោយឡែកបក្ខពួកដែលគេចខ្លួនរួចនោះ ត្រូវបាននគរបាលស្គាល់ស្លាកលេខម៉ូតូហើយ។ ហេតុការណ៍នោះបានកើតឡើង និងបង្កឲ្យមានការ ភ្ញាក់ផ្អើល កាលពីវេលាម៉ោង៦ និង៣៥នាទីល្ងាច ថ្ងៃទី១២ ខែមិថុនា ឆ្នាំ២០១៨នេះ នៅតាមផ្លូវស្ថិតនៅក្នុងបុរីពិភពថ្មី ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។ នគរបាលបានឲ្យដឹងថា ក្មេងប្រុសដែលជាជនសង្ស័យខាងលើនោះឈ្មោះ សាន លាងហុង អាយុ១៥ឆ្នាំ ជាសិស្សរៀននៅសាលាអាមេរិកកាំងប្រ៊ីត សាខាទី១៧ ចោមចៅ មានទីលំនៅក្នុង បុរីពិភពថ្មីចម្ការដូង សង្កាត់ដង្កោ ខណ្ឌដង្កោ។
ចំណែកគូកនម្នាក់ទៀត ឈ្មោះ រ៉ាវីត អាយុប្រហាក់ ប្រហែលគ្នា អ្នកទាំង២បានជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ 1GX-1067 ជាមធ្យោបាយធ្វើសកម្មភាព ហើយម៉ូតូនោះត្រូវបានឈ្មោះ រ៉ាវីត ជិះគេចខ្លួនបាត់។ ក្មេងប្រុសសង្ស័យទាំង២នាក់នេះបានធ្វើសកម្មភាពឆក់យកទូរស័ព្ទ១គ្រឿងម៉ាក IPhone 8plus ពីស្ត្រីរងគ្រោះ,ThingJifen អាយុ៣៨ឆ្នាំ ជាជនជាតិចិន មុខរបរបុគ្គលិករោងចក្រកាត់ដេរ ស្នាក់នៅក្នុងបុរីពីភពថ្មីនោះដែរ។ ប្រភពដដែលបានបន្តឲ្យដឹងថា នៅមុនពេលកើតហេតុ ស្ត្រីជនជាតិចិនខាងលើ បានដើរតាមផ្លូវរុញរទេះកូនស្រីតូចរបស់គាត់ដែលទើបបានអាយុ២ខួបប៉ុណ្ណោះ ដោយគាត់រុញបណ្ដើរ និងកាន់ទូរស័ព្ទនិយាយផងដែរ។
ខណៈនោះស្រាប់តែលេចមុខជនសង្ស័យ២នាក់ នោះជិះម៉ូតូ១គ្រឿងទៅដល់ធ្វើសកម្មភាពឆក់យកទូរស័ព្ទ និងបានជិះរត់គេចខ្លួនយ៉ាងលឿន ប៉ុន្តែភ្លាមៗនោះត្រូវបានជនស្រែកឆោរឡោជាភាសាចិន បង្កការភ្ញាក់ផ្អើល។ ហើយត្រូវបានសន្តិសុខ យាមនៅទីនោះចាប់ខ្លួនបានម្នាក់ភ្លាមៗ និងដកហូតបានទូរស័ព្ទមកវិញ ចំណែកគូកនម្នាក់ទៀត បានគេចខ្លួនបាត់ដោយសុវត្ថិភាព។ ក្រោយពេលកើតហេតុសន្តិសុខបុរីពិភពថ្មី បានបញ្ជូនជនសង្ស័យ ខាងលើទៅឲ្យនគរបាលនាំទៅសាកសួរនៅប៉ុស្តិ៍ចោមចៅ១ ដើម្បីកសាងសំណុំរឿងចាត់ការតាមច្បាប់ និងបន្តស្រាវជ្រាវរកបក្ខពួកម្នាក់ទៀតដែលកំពុងរត់គេចខ្លួនផងដែរ ព្រោះបានស្គាល់ស្លាកលេខម៉ូតូដែលជិះធ្វើដកម្មភាព និងអត្តសញ្ញាណខ្លះៗហើយ៕
https://youtu.be/0KYzANMbOVg
ចែករំលែកព័តមាននេះ