ខេត្តព្រះសីហនុ ៖ គ្រោះថ្នាក់ចរាចរណ៍មួយបានកើតឡើងរវាងរថយន្តមួយគ្រឿងបានបុកជាមួយម៉ូតូមួយគ្រឿង បណ្តាលឱ្យដួលម៉ូតូ ចំណែកអ្នកបើកបរម៉ូតូបានរងរបួសធ្ងន់ កាលពីវេលាម៉ោង១រសៀលថ្ងៃទី១២ ខែមិថុនា ឆ្នាំ២០១៨ លើដងផ្លូវជាតិលេខ៤ ស្ថិតនៅត្រង់ចំណុចមុខស្ថានីយប្រេងឥន្ធនៈមួយកន្លែង ភូមិវាលមាស ឃុំវាលរេញ ស្រុកព្រៃនប់ ។
ប្រភពព័ត៌មានបានឱ្យដឹងថា រថយន្តមួយគ្រឿង ម៉ាកហាយឡែនឌ័រ ពណ៌ត្រួយចេកចាស់ ពាក់ស្លាកលេខ ភ្នំពេញ ២L-៣៦៨៦ បើកបរដោយបុរសម្នាក់ ក្នុងទិសដៅពីខេត្តព្រះសីហនុទៅភ្នំពេញ លុះមកដល់ចំណុចកើតហេតុខាងលើរថយន្តបត់ឆ្វេងចូលចាក់សាំងក៏បានបុកជាមួយម៉ូតូមួយគ្រឿងម៉ាកហុងដា ពណ៌ក្រហម ពាក់ស្លាកលេខ ព្រះសីហនុ ១E-៣៦៩០ បើកបរក្នុងទិសដៅស្របគ្នា បណ្តាលឲ្យអ្នកបើកបរម៉ូតូឈ្មោះ ទ្រី ធីរម្យ ភេទប្រុស អាយុ១៨ឆ្នាំ មុខរបរកម្មកររោងចក្រ ទីលំនៅភូមិតាពៅ ឃុំតានៃ ស្រុកព្រៃនប់ បានរងរបួសធ្ងន់ ត្រូវបានបញ្ជូនមកសង្គ្រោះនៅគ្លីនិកឯកជនមួយកន្លែង។
ចំណែកអ្នកបើកបររថយន្តបានរត់គេចខ្លួនបាត់ ។ បច្ចុប្បន្ន វត្ថុតាងត្រូវបាននាំយកទៅរក្សាទុកនៅអធិការដ្ឋាននគរបាលស្រុក៕
ចែករំលែកព័តមាននេះ