ខេត្តក្រចេះ ៖ មន្ត្រីខណ្ឌរដ្ឋបាលខេត្តនិយាយថា ទូកនេសាទយ៉ាងហោចមានចំនួន ៤គ្រឿងដែលបានលួចការធ្វើនេសាទនៅក្នុងទន្លេមេគង្គតាមតំបន់អភិរក្សអន្លង់ផ្សោត និងត្រូវមេពូជត្រូវបានក្រុមមន្ត្រីឆ្មាំចុះធ្វើការចាប់បង្ក្រាប់ ។
នាយរងខណ្ឌរដ្ឋបាលជលផល និងជាប្រធានឆ្មាំអភិរក្សលោក ម៉ុក ពន្លក បានប្រាប់ឲ្យ ដឹងថា ទូកនេសាទចំនួន៤គ្រឿងដែលប្រើដែលប្រើសុទ្ធតែឧបករណ៍នេសាទមងបណ្តែត ក្រលាធំៗនៅក្នុងតំបន់អភិរក្សហាមឃាត់តាមទន្លេមេគង្គក្នុងឃុំជ្រោយបន្ទាយ ស្រុកព្រែក ប្រសព្វ គឺត្រូវបានចាប់បង្ក្រាបកាលពីយប់ថ្ងៃទី១២ មិថុនា ។
លោកប្រធានឆ្មាំទន្លេរូបនេះបានអះអាងថា សកម្មភាពល្បាត និងការត្រួតពិនិត្យ បង្ក្រាបបទល្មើសក្នុងដែនអភិរក្សសត្វផ្សោត និងអន្លង់ត្រីមេពូជគឺក្រុមការងាររបស់មន្ត្រីជល ផលរួមនឹងមន្ត្រីឆ្មាំសហការជាមួយសហគមន៍នេសាទក្នុងដែននេសាទ និងត្រូវបង្កើនសកម្មភាពល្បាតបង្ក្រាបឲ្យជាប់ជាប្រចាំនៅក្នុងរដូវទឹកតម្លើងក៏ដូចជារដូវបិទនេសាទ ។
បើទោះបីជាសកម្មភាពការចាប់បង្ក្រាបនេះមិនត្រូវបានឃាត់ខ្លួនមនុស្សយ៉ាងណាក្តីតែក្នុងនោះមានទូកម៉ាស៊ីនចំនួន០៤គ្រឿង មងបណ្តែតចំនួន០៤ត្បូងមានប្រវែងជិត២ពាន់ម៉ែត្រគឺត្រូវសមត្ថកិច្ចចាប់រឹបអូសទាំងស្រុង ។
ជាមួយនឹងសកម្មភាពការលួចធ្វើនេសាទដោយខុសច្បាប់នៅតែមានការលបលួចធ្វើសកម្មភាពតាមតំបន់អន្លង់អភិរក្សគឺនៅតែកើតមានគួរឲ្យព្រួយបារម្ភ ខណៈសកម្មភាពការចុះ បង្ក្រាបពីកម្លាំងជំនាញហាក់នៅមានកម្រិតនៅឡើយនោះ ។
លោក ម៉ុក ពន្លក នាយរងខណ្ឌ រដ្ឋបាលជលផល និងជាប្រធានឆ្មាំអភិរក្សក៏បានអំពាវនាវជូនដល់ប្រជានេសាទទាំងអស់មិន ត្រូវចូលមកនេសាទក្នុងតំបន់ហាមឃាត់ ព្រោះជាតំបន់អភិរក្សសត្វផ្សោតកាំពី និងអន្លង់ត្រី មេពូជ ដែលការហាមឃាត់ត្រូវបានរឹតបន្តឹងទាំងគ្រប់រដូវ ៕
ចែករំលែកព័តមាននេះ