រាជធានីភ្នំពេញ ៖ បឹងកក់ដែលពីមុនជាបឹងដ៏ធំមួយនៅកណ្ដាលរាជធានីភ្នំពេញ តែពេលនេះ បានក្លាយជាតំបន់ពាណិជ្ជកម្មដ៏មានសក្ដានុពលមួយដែលកំពុងទាក់ទាញវិនិយោគិនជាតិ និងអន្តរជាតិមកបោះទុនវិនិយោគយ៉ាងខ្លាំង ពិសេសទៅលើភោជនីយដ្ឋាន និងហាងភេសជ្ជៈ ។ បើតាមលោក…
រាជធានីភ្នំពេញ ៖ បឹងកក់ដែលពីមុនជាបឹងដ៏ធំមួយនៅកណ្ដាលរាជធានីភ្នំពេញ តែពេលនេះ បានក្លាយជាតំបន់ពាណិជ្ជកម្មដ៏មានសក្ដានុពលមួយដែលកំពុងទាក់ទាញវិនិយោគិនជាតិ និងអន្តរជាតិមកបោះទុនវិនិយោគយ៉ាងខ្លាំង ពិសេសទៅលើភោជនីយដ្ឋាន និងហាងភេសជ្ជៈ ។
បើតាមលោក សែ វិចត្រ ប្រធានផ្នែកការអភិវឌ្ឍអាជីវកម្ម នៃមជ្ឈមណ្ឌលកម្សាន្តអេដិនហ្កាដិន បានឲ្យដឹងថា បឹងកក់ជាតំបន់មួយស្ថិតនៅចំណុចកណ្ដាលនៃទីប្រជុំជនរវាងអ្នកមានចំណូលខ្ពស់ និងអ្នកមានចំណូលមធ្យម ហើយវាជាចំណុចប្រសព្វរវាងខណ្ឌទាំង៣ គឺខណ្ឌទួលគោក ខណ្ឌដូនពេញ និងខណ្ឌ៧មករា ដែលសុទ្ធសឹងតែជាបណ្ដុំអ្នកមានជីវភាពធូរធារ។ ម្យ៉ាងទៀត នៅតំបន់នោះ ក៏សម្បូរទៅដោយបណ្ដុំការិយាល័យក្រុមហ៊ុនឯកជន និងស្ថាប័នរដ្ឋផងដែរ ។ លោកបន្តថា ៖« បច្ចុប្បន្ននេះ យើងមើលឃើញថា តំបន់នោះកំពុងអភិវឌ្ឍន៍ទៅជាកន្លែងភោជនីយដ្ឋាន និងភេសជ្ជៈ ហើយនៅពេលអនាគត វានឹងក្លាយជាមជ្ឈមណ្ឌលកម្សាន្តមួយបន្ថែមពីលើកន្លែងផ្ដល់សេវាកម្ម និងម្ហូបអាហារ ជាដើម ។ ជាក់ស្ដែង នៅតំបន់បឹងកក់បាននិងកំពុងត្រៀមជាក្លិបកម្សាន្ត និងរោងភាពយន្តសម្រាប់បម្រើឲ្យសេចក្តីត្រូវការរបស់ប្រជាពលរដ្ឋក្នុងរាជធានីភ្នំពេញ និងទូទាំងប្រទេស ដែលមកកម្សាន្តនៅភ្នំពេញ » ។ បើតាមអ្នកជំនាញសេដ្ឋកិច្ច និងវាយតម្លៃអចលនទ្រព្យ ក៏បានលើកឡើងផងដែរថា បឹងកក់នឹងក្លាយជាមជ្ឈមណ្ឌលពាណិជ្ជកម្មដ៏សំខាន់មួយនៅរាជធានីភ្នំពេញ ។
លោក ឌឹត ចណ្ណា អ្នកជំនាញរូបនេះបានឲ្យដឹងថា នៅថ្ងៃអនាគត បឹងកក់នឹងក្លាយជាមជ្ឈមណ្ឌលពាណិជ្ជកម្មមួយដ៏សំខាន់ ក្នុងនោះបណ្ដាធនាគារ ការិយាល័យ នឹងអាចលេចវត្តមាននៅតំបន់នោះ ។
លោកបន្តថា តំបន់នេះជាចំណុចកណ្ដាលមួយនៅក្នុងរាជធានីភ្នំពេញ ហើយវាក៏ជាប់នឹងស្ថាប័នកំពូលរបស់រាជរដ្ឋាភិបាលកម្ពុជាដែរ ដូចជា ទីស្ដីការគណៈរដ្ឋមន្ត្រី និងសាលារាជធានីភ្នំពេញ ជាដើម ។ ម្យ៉ាងទៀត តំបន់នោះក៏ជាកន្លែងដែលមនុស្សជាច្រើនឆ្លងកាត់ និងស្ថិតនៅជាប់មហាវិថីសំខាន់ៗផងដែរ ។
គួរបញ្ជាក់ថា នៅតំបន់បឹងកក់នេះមានភោជនីយដ្ឋាន និងភេសជ្ជៈប្រមាណជាង៣០ហាង ក្នុងនោះមានហាងល្បីៗមកពីអាមេរិក ជប៉ុន ចិន ថៃ សិង្ហបុរី តៃវ៉ាន់ និងហាងអាហារ-ភេសជ្ជៈក្នុងស្រុកជាច្រើនទៀត ៕
ចែករំលែកព័តមាននេះ