រាជធានីភ្នំពេញ ៖ យុវជនជាង២០០នាក់ បានចាញ់បោកបុគ្គល២នាក់ អស់ប្រាក់ក្នុងម្នាក់ៗពី៥០ដុល្លារទៅជាង១០០ដុល្លារ បន្ទាប់ពីជន២នាក់នោះអះអាងថា ខ្លួនជារដ្ឋបាលនៅរោងចក្រកាត់ដេរមួយ ហើយថៅកែឱ្យប្រកាសជ្រើសរើសកម្មករ ។ ពេលបានឮបែបនេះ យុវជនទាំងនោះបានធ្វើទំនាក់ទំនងសុំចូលធ្វើការ ហើយត្រូវបុគ្គល២នាក់នោះប្រាប់ថា តាមលក្ខខណ្ឌការងារតម្រូវឱ្យបង់ប្រាក់ក្នុងម្នាក់៥០ដុល្លារឬជាង១០០ដុល្លារជាមុនសិន ។ ពេលនោះ ជនរងគ្រោះទាំងអស់ហេតុតែចង់បានការងារធ្វើក៏យល់ព្រមបង់ លុះដល់ថ្ងៃកំណត់ត្រូវចូលបម្រើការងារស្រាប់តែខាងរោងចក្រឆ្លើយថាមិនដឹង ហើយពេលទៅសួរនាំជនដែលអះអាងថាជារដ្ឋបាលបាននោះ គឺបានវេចបង្វេចយកលុយជិត២ម៉ឺនដុល្លាររត់បាត់ទៀត ។
ដោយដឹងថា ត្រូវចាញ់បោកជនខិលខូចទើបយុវជនចំនួន៤០នាក់តំណាងឱ្យជាង២០០នាក់បាននាំគ្នាទៅកាន់សាលាសង្កាត់ចោមចៅ៣ ខណ្ឌពោធិ៍សែនជ័យ កាលពីវេលាម៉ោង៤ល្ងាចថ្ងៃទី១១ ខែមិថុនា ដើម្បីសុំឱ្យអាជ្ញាធរជួយអន្តរាគមន៍រកយុត្តិធម៌ដល់ពួកគេ ។យុវជនទាំងនោះនិយាយថា ជនខិលខូចដែលអះអាងថាជារដ្ឋបាលរោងចក្រនោះ គឺម្នាក់ជាប្រុសឈ្មោះ តុលា និងម្នាក់ទៀតជាស្រីមិនស្គាល់អត្តសញ្ញាណឡើយ ។ ជន២នាក់នេះ បានបើកការិយាល័យក្លែងក្លាយមួយនៅក្នុងបុរីញូវថោន ស្ថិតក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។ ពួកគេបានបិទប្រកាសជ្រើសរើសកម្មករនៅតាមជញ្ជាំងរបង និងជញ្ជាំងផ្ទះ ឬបង្គោលភ្លើង នៅក្នុងបុរីញូវថោននោះ ដើម្បីចូលធ្វើការរោងចក្រមួយនៅក្នុងតំបន់សេដ្ឋកិច្ចពិសេសភ្នំពេញ ស្ថិតក្នុងសង្កាត់កន្ទោក ខណ្ឌពោធិ៍សែនជ័យ ដោយអះអាងថាទទួលបានប្រាក់ខែច្រើន ។
ប្រភពដដែលបន្តទៀតថា ចំណែកពួកខ្លួនកំពុងតែអត់ការងារធ្វើស្រាប់ផង ក៏បាននាំគ្នាទៅធ្វើទំនាក់ទំនងសុំចូលធ្វើការ ហើយត្រូវបានបុគ្គលទាំង២នាក់នោះបញ្ជាក់ថា ពួកគេគឺជារដ្ឋបាលរោងចក្រដែលត្រូវបានថៅកែបញ្ជាឱ្យជ្រើសរើសកម្មករ ។ មិនតែប៉ុណ្ណោះ បានប្រាប់ពីលក្ខខណ្ឌរបស់ក្រុមហ៊ុនដែលតម្រូវឱ្យបង់ប្រាក់មុន ក្នុងម្នាក់ៗចំនួន៥០ដុល្លារទៅជាង១០០ដុល្លារថែមទៀតផង ដែលសរុបជិត២ម៉ឺនដុល្លារឯណោះ ។ពួកគេប្រាប់ថា ឱ្យពួកខ្លួនទាំងអស់គ្នាចូលធ្វើការនៅថ្ងៃទី១១ ខែមិថុនា ឆ្នាំ២០១៨ ពេលនោះម្នាក់ៗមានការត្រេកអរខ្លាំងណាស់ បន់ឱ្យតែដល់ថ្ងៃចូលធ្វើការប៉ុណ្ណោះ នឹងបានប្រាក់ខែ ប៉ុន្តែដល់ថ្ងៃកំណត់បែរជាខកបំណងយ៉ាងខ្លាំង ។
នៅពេលពួកគេនាំគ្នាចូលទៅធ្វើការ ស្រាប់តែថៅកែរោងចក្រដេញចេញ និងប្រាប់ថាមិនដឹងនិងមិនបានឱ្យជ្រើសរើសកម្មករអ្វីឡើយ ។ ដោយសារតែបែបនេះ ទើបយុវជនទាំងនោះនាំគ្នាទៅសួរនាំបុគ្គល២នាក់នោះ ប៉ុន្តែពេលទៅដល់គឺការិយាល័យបិទទ្វារហើយបាត់ជន២នាក់នោះមិនឃើញ ទើបដឹងថាចាញ់បោក ក៏លើកគ្នាទៅកាន់សាលាសង្កាត់ចោមចៅ៣ សុំឱ្យអាជ្ញាធរសង្កាត់ជួយតែម្ដង ៕
ចែករំលែកព័តមាននេះ