រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ចបានឲ្យដឹងថា ដោយការខិតខំប្រឹងប្រែងរបស់រាជរដ្ឋា ភិបាល ក្នុងការកៀរគររកចំណូលគ្រប់ប្រភេទក្នុងឆ្នាំ២០១៨នេះ កំណើននៃសមត្ថភាពខាងថវិការបស់កម្ពុជា បានកើនឡើងប្រមាណ១៩.០១៧ពាន់លានរៀល សមមូលនឹងជិត៥ពាន់លានដុល្លារអាមេរិក ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងនៅក្នុងការធ្វើបាឋកថាក្រោមប្រធានបទ « កាលានុវត្តភាព និងការប្រឈមក្នុងដំណើរការកសាងជាតិ » ជូនយុវជន ដែលជានិស្សិតមកពីគ្រឹះស្ថានឧត្តមសិក្សានានា នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) កាលពីថ្ងៃទី១០ ខែមិថុនា ឆ្នាំ២០១៨ កន្លងមកថា ដោយការខិតខំប្រឹងប្រែងរបស់រាជរដ្ឋាភិបាល កម្ពុជាបានកើនឡើងសមត្ថភាពខាងថវិកា ក្នុងការកៀរគរចំណូលគ្រប់ប្រភេទ ក៏ដូចជាប្រកាន់ខ្ជាប់នូវវិន័យថវិកាលើការចាយវាយ ចំណូលក្នុងប្រទេសមានការកើនឡើងពីប្រមាណត្រឹមតែ១.៤២៣ពាន់លានរៀលក្នុងឆ្នាំ២០០០ ដល់ប្រមាណ១៩.០១៧ពាន់លានរៀលសមមូលនឹងប្រមាណជិត៥ពាន់លានដុល្លារ ក្នុងឆ្នាំ២០១៨នេះ ។ លោកបន្តថា ៖« ចំណូលនេះគឺមួយផ្នែកបានពីអ្នកមានចំណូលខ្ពស់ និងមធ្យម ដោយត្រូវបានយកមកជួយដល់ការអភិវឌ្ឍវិស័យសង្គមកិច្ច ហេដ្ឋារចនាសម្ព័ន្ធនានា និងជួយដល់ប្រជាពលរដ្ឋក្រីក្រជាអ្នកមានចំណូលទាប ក្នុងគោលដៅកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាជនកម្ពុជាទាំងមូល » ។
លោកបន្តថា ៖« រាជរដ្ឋាភិបាលក៏បានបន្ធូរបន្ថយពន្ធ និងអនុគ្រោះពន្ធ ការមិនយកកម្រៃពីសេវាសាធារ ណៈ និងមូលដ្ឋានដែលចាំបាច់មួយចំនួន គឺការកាត់បន្ថយថ្លៃទឹកស្អាត និងអគ្គិសនី រួមទាំងការទទួលបាននូវសេវាសុខាភិបាលដោយឥតគិតថ្លៃ ចំពោះប្រជាជនដែលមានប្រាក់ចំណូលទាប » ។ ទាក់ទងនឹងការចំណាយរបស់រាជរដ្ឋា ភិបាល លោក វង្សី វិស្សុត បានថ្លែងឲ្យដឹងថា ការចំណាយថវិការដ្ឋសរុប ក៏ត្រូវបានបង្កើនយ៉ាងគំហុកផងដែរ ក្នុងគោលដៅដើម្បីលើកស្ទួយដល់ប្រតិបត្តិការរបស់រដ្ឋ ការដំឡើងប្រាក់បៀវត្សរ៍ជូនមន្ត្រីរាជការ ការពង្រីក និងកែលម្អគុណភាពសេវាសាធារណៈ ព្រមទាំងការវិនិយោគលើការកសាងហេដ្ឋារចនាសម្ព័ន្ធផ្សេងៗ ។ ទន្ទឹមនឹងនេះ កម្រិតបំណុលសាធារណៈរបស់កម្ពុជា ក៏ស្ថិតក្នុងក្រុមប្រទេសដែលមានអនុបាតបំណុលទាបបំផុតក្នុងតំបន់ ហើយស្ថានភាពបំណុលត្រូវបានវាយតម្លៃថា មានចីរភាព និងហានិភ័យកម្រិតទាប ។
លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ធ្លាប់មានប្រសាសន៍ថា រាជរដ្ឋា ភិបាលកាន់តែមានឯករាជ្យភាពខាងថវិកា ដោយសារចំណូលរបស់យើងបានកើនឡើងខ្ពស់លើសការរំពឹងទុក ដែលធ្វើឲ្យរាជរដ្ឋាភិបាលកម្ពុជាមានលទ្ធភាពចំណាយចរន្តបានដោយខ្លួនឯង និងមានលទ្ធភាពចំណាយវិនិយោគ២ភាគ៣ លើការវិនិយោគសាធារណៈ។ លោកបន្តថា ៖« លទ្ធភាពរបស់រាជរដ្ឋាភិបាលកាន់តែមានច្រើន ខណៈដែលទំហំនៃការចំណាយក៏កើនឡើងផងដែរ ប៉ុន្តែការគ្រប់គ្រងបំណុលរបស់កម្ពុជាគ្មានហានិភ័យណានោះទេ»។
ក្នុងឆ្នាំ២០១៨ និង២០១៩ សេដ្ឋកិច្ចកម្ពុជាត្រូវបានរំពឹងថា នឹងនៅបន្តកំណើនក្នុងរង្វង់ប្រមាណ៧,០% ដែលទ្រទ្រង់ដោយមូលដ្ឋានកំណើនស្រដៀងទៅនឹងឆ្នាំ២០១៧ដែរ ក្នុងនោះ វិស័យសំខាន់ៗដែលជំរុញកំណើនខ្លាំងជាងគេរួមមាន វិស័យកសិកម្ម, វិស័យឧស្សាហកម្ម, វិស័យសេវាកម្ម និងឧស្សាហកម្មកម្មន្ដសាល ។ ជាមួយគ្នានេះ អនុវិស័យដែលកំពុងរួមចំណែកដល់កំណើនសេដ្ឋកិច្ចខ្លាំងរួមមាន សំណង់, កាត់ដេរ, ការលក់ដុំនិងរាយ និងអចលនទ្រព្យ ជាដើម ៕
ចែករំលែកព័តមាននេះ