រាជធានីភ្នំពេញ ៖តារាសម្តែងវ័យក្មេងកញ្ញាសាឡាត់ ស្រីឡាង បានសម្តែងការភ្ញាក់ផ្អើលខ្លាំងចំពោះព័ត៌មានដែលបានផ្សព្វផ្សាយថា នាងបានប្តូររថយន្តថ្មីតម្លៃរាប់ម៉ឺនដុល្លារ ខណៈការងារសិល្បៈកំពុងកាក់កប ។ ការភ្ញាក់ផ្អើលរបស់តារាសម្តែងរូបនេះកើតឡើង បន្ទាប់ពីសារព័ត៌មានក្នុងស្រុកមួយចុះផ្សាយព្រោះឃើញនាងបង្ហោះរូបដោយភ្ជាប់ជាមួយនឹងរថយន្តដ៏ទំនើបមួយគ្រឿង ។…
រាជធានីភ្នំពេញ ៖តារាសម្តែងវ័យក្មេងកញ្ញាសាឡាត់ ស្រីឡាង បានសម្តែងការភ្ញាក់ផ្អើលខ្លាំងចំពោះព័ត៌មានដែលបានផ្សព្វផ្សាយថា នាងបានប្តូររថយន្តថ្មីតម្លៃរាប់ម៉ឺនដុល្លារ ខណៈការងារសិល្បៈកំពុងកាក់កប ។ ការភ្ញាក់ផ្អើលរបស់តារាសម្តែងរូបនេះកើតឡើង បន្ទាប់ពីសារព័ត៌មានក្នុងស្រុកមួយចុះផ្សាយព្រោះឃើញនាងបង្ហោះរូបដោយភ្ជាប់ជាមួយនឹងរថយន្តដ៏ទំនើបមួយគ្រឿង ។
រូបភាពនោះត្រូវគេសង្ស័យថា ជារថយន្តថ្មីផ្ទាល់ខ្លួនរបស់សាឡាត់ ស្រីឡាង ម៉ាកLand Rover ដោយកន្លងមកនាងត្រូវគេដឹងថាប្រើប្រាស់រថយន្តម៉ាងToyota Pruis ។ ជាការកត់សម្គាល់មានការលើកឡើងថា ការប្តូររថយន្តថ្មីពីតារាសម្តែងវ័យក្មេងរូបនេះជាការពិត ឬមិនពិតនោះក៏មិនមែនជារឿងអ្វីចម្លែកដែរ ដោយសារតែសាឡាត់ ស្រីឡាង កំពុងតែមានហាងឆេងខ្ពស់ក្នុងអាជីពសិល្បៈនាពេលបច្ចុប្បន្ន បូករួមទាំងសម្រស់កាន់តែស្រស់ស្អាតផងនោះ។ ទោះជាយ៉ាងណាក្តីតួសម្តែងនៅក្នុងរឿង «មន្តស្នេហ៍ក្រមុំបាយឆា»សាឡាត់ ស្រីឡាង បានចេញបដិសេធចំពោះការយល់ខុសពីបញ្ហានេះ។ នាងបញ្ជាក់ថា រថយន្តដែលបានឃើញនេះមិនមែនជារបស់នាងឡើយ ពោលគឺជារថយន្តមិត្តភក្តិប្រុសម្នាក់របស់នាង ដែលបានខ្ចីថតប៉ុណ្ណោះ ។ សាឡាត់ ស្រីឡាង បានប្រើពាក្យបែបចំអកថា សព្វថ្ងៃនាង«រកលុយបង់ទឹក និងភ្លើងស្ទើរមិនបានផង» តើមានលុយឯណាប្តូររថយន្តដែលមានតម្លៃរាប់ម៉ឺនដុល្លារនោះ ។
សាឡាត់ ស្រីឡាង បានសាងកេរ្តិ៍ឈ្មោះក្នុងពិភពសិល្បៈយ៉ាងត្រដែត បន្ទាប់ពីនាងបានលេចមុខនៅក្នុងរឿង « មន្តស្នេហ៍ក្រមុំបាយឆា» ដែលបានដាក់បញ្ចាំង នៅលើកញ្ចក់ទូរទស្សន៍ PNN ។ តាមរយៈរឿងនេះបានធ្វើឱ្យនាងកាន់តែលេចធ្លោខ្លាំងនៅក្នុងវិស័យសិល្បៈសម្តែង រហូតធ្វើឱ្យបណ្តាផលិតកម្មជាច្រើនចាប់អារម្មណ៍ និង ពេញចិត្តលើរូបនាង ចង់បាននាងមកសម្តែងក្នុងរឿងជាបន្តបន្ទាប់ទៀត ។ ឱកាសដែលធ្វើឲ្យសាឡាត់ ស្រីឡាង ចាប់ផ្តើមក្នុងអាជីពសិល្បៈនេះ គឺក្រោយពេល ដែលនាងថតវីដេអូ កំប្លែងៗដាក់នៅលើហ្វេសប៊ុក ឱ្យទស្សនិកទស្សនា ។ បន្ទាប់មកនាងបានបន្សាត់ខ្លួនជាតារាសម្តែងអាជីពរហូតដល់សព្វថ្ងៃ ។
ក្រោយពីល្បីឈ្មោះក្នុងពិភពសិល្បៈមក សាឡាត់ ស្រីឡាង ក៏បានពើបប្រទះព័ត៌មានស្នេហាជាបន្តបន្ទាប់ ប៉ុន្តែរហូតមកដល់ពេលនេះនាងនៅមិនទាន់បង្ហាញមុខគូស្នេហ៍ណាមួយពិតប្រាកដនៅឡើយទេ ។ សាឡាត់ ស្រីឡាង ធ្លាប់អះអាងថា ធម្មតាអ្នកសិល្បៈតែងតែប្រឈមមុខនឹងរឿងអាស្រូវ តែសម្រាប់រូបនាងមិនខ្វល់អំពីព័ត៌មានទាំងនោះទេ ពីព្រោះការណ៍ពិតនាងពុំបានស្រឡាញ់ ឬពេញចិត្តលើបុរសណាម្នាក់នៅក្នុងពេលនេះទេ ដោយសារនាងចង់ទុកពេលវេលារកប្រាក់ចំណូលដើម្បីចិញ្ចឹមជីវិតសិន។ ស្រីឡាងបានសារភាពថា នាងពិតជាមានអ្នកតាមស្រឡាញ់មែន តែរកអ្នកស្មោះពុំទាន់ឃើញនៅឡើយទេ ៕
ចែករំលែកព័តមាននេះ