រាជធានីភ្នំពេញ ៖ កម្លាំងនគរបាលខណ្ឌចំការមនជាច្រើនបានប្រដេញតាមចាប់យុវជនជាជនសង្ស័យ២នាក់ បន្ទាប់ពីឃាត់ឱ្យឈប់ដើម្បីឆែក តែមិនព្រមឈប់ ហើយយុវជនជាជនសង្ស័យនោះព្យាយាមបើកម៉ូតូគេចពីសមត្ថកិច្ច ទាំងភ័យស្លន់ស្លោ ដោយឃើញគួរឱ្យសង្ស័យ សមត្ថកិច្ចក៏ជិះដេញតាម និងឃាត់ខ្លួនបានយកទៅសួរនាំនៅអធិការដ្ឋានខណ្ឌចំការមន។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង២និង៣០នាទីឈានចូលថ្ងៃទី១២ ខែមិថុនា ឆ្នាំ២០១៨ នៅចំណុចមុខមជ្ឈមណ្ឌលរ៉ុក តាមបណ្តោយផ្លូវព្រះមុន្នីវង្ស ស្ថិតក្នុងសង្កាត់ទន្លេបាសាក់ ខណ្ឌចំការមន ។
តាមប្រភពពីសមត្ថកិច្ចបានឱ្យដឹងថា មុនពេលកើតហេតុ កម្លាំងខណ្ឌបានជិះម៉ូតូល្បាតក្នុងមូលដ្ឋាន ខណៈមកដល់ចំណុចមុខមជ្ឈមណ្ឌលរ៉ុក ស្រាប់តែឃើញយុវជន២នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៨ ពណ៌ខ្មៅ ធ្វើដំណើរបញ្ច្រាសទិសនឹងកម្លាំងនគរបាល ។ ដោយឃើញគួរឱ្យសង្ស័យ កម្លាំងខណ្ឌបានហៅឱ្យឈប់ដើម្បីសួរនាំ តែបែរជាយុវជនទាំង២នាក់នោះមិនព្រមឈប់ ហើយព្យាយាមបន្ថែមល្បឿនលឿនគេចពីកម្លាំងសមត្ថកិច្ច ធ្វើអោយសមត្ថកិច្ចរឹតតែមានការសង្ស័យថែមទៀត ក៏ជិះដេញតាមឃាត់ខ្លួនតាំងពីមុខមជ្ឈមណ្ឌលកំសាន្តរ៉ុក រហូតដល់ផ្សារដើមគរ សង្កាត់ផ្សារដើមគរ ខណ្ឌទួលគោក ទើបឃាត់ខ្លួនបាន។
ក្រោយពេលឃាត់ខ្លួនបាន យុវជនជាជនសង្ស័យទាំង២នាក់ត្រូវបានកម្លាំងសមត្ថកិច្ចនាំខ្លួនទៅសាកសួរនៅអធិការដ្ឋាននគរបាលខណ្ឌចំការមនបន្ត ៕
ចែករំលែកព័តមាននេះ