រាជធានីភ្នំពេញ ៖ ស្ត្រី២នាក់ បានបើករថយន្តម៉ាកឡង់គ្រីស័រ ខ្វះការប្រុងប្រយ័ត្ន និងមិនគោរពស្លាកសញ្ញាចរាចរណ៍ នៅផ្លូវកែងអក្សរតេ ត្រូវបុរសម្នាក់ជិះម៉ូតូក្នុងស្ថានភាពស្រវឹងបានជ្រុលទៅបុក បណ្តាលឲ្យរងការខូចខាតរថយន្ត និងម៉ូតូ…
រាជធានីភ្នំពេញ ៖ ស្ត្រី២នាក់ បានបើករថយន្តម៉ាកឡង់គ្រីស័រ ខ្វះការប្រុងប្រយ័ត្ន និងមិនគោរពស្លាកសញ្ញាចរាចរណ៍ នៅផ្លូវកែងអក្សរតេ ត្រូវបុរសម្នាក់ជិះម៉ូតូក្នុងស្ថានភាពស្រវឹងបានជ្រុលទៅបុក បណ្តាលឲ្យរងការខូចខាតរថយន្ត និងម៉ូតូ តែមិនមានគ្រោះថ្នាក់ដល់មនុស្សទេ ហេតុការណ៍នេះបានកើតឡើងនៅវេលាម៉ោង ១១យប់ ថ្ងៃទី១១ ខែមិថុនា ឆ្នាំ២០១៨ ចំណុចផ្លូវ ៤៨០ កែង និងផ្លូវ២៧១ សង្កាត់ផ្សារដើមថ្កូវ ខណ្ឌចំការមន ។
តាមប្រភពព័ត៌មានពីកន្លែងកើតបានឲ្យដឹងថា មុនពេលកើតហេតុ គេបានឃើញស្ត្រី២នាក់ រួមទាំងអ្នកបើកបរបានបើករថយន្តម៉ាកឡង់គ្រីស័រ ពណ៌សំបកឪឡឹក ពាក់ស្លាកលេខ ភ្នំពេញ2AJ-6095 ធ្វើដំណើរតាមផ្លូវ ៤៨០ក្នុងទិសដៅពីកើតទៅលិច លុះមកដល់ចំណុចកើតហេតុអ្នកបើកបរមិនបានគោរពស្លាកសញ្ញាចរាចរណ៍បានបើកឆ្លងកាត់ទទឹងផ្លូវទាំងបំពាន ហើយស្របពេលនោះដែរក៏ស្រាប់តែយុវជនម្នាក់អាយុជាង៣០ឆ្នាំ មិនដឹងថា ចេញពីផឹកស៊ីវិញនៅកន្លែងណានោះទេ គឺបានជិះម៉ូតូម៉ាកហុងដាគុបជ្រុងសេ៥០ ពណ៌ទឹកប៊ិច ពាក់ស្លាកលេខ ប១៥៥៣ ភព១ បានធ្វើដំណើរតាមផ្លូវ២៧១ ក្នុងទិសដៅពីត្បូងទៅជើង ក្នុងលឿនលឿន និងស្រវឹងផងនោះ បានជ្រុលទៅបុក និងគូទក្រោយរថយន្តចំហៀងខាងឆ្វេងពេញទំហឹង បណ្តាលឲ្យរថយន្តរងការខូចខាតក្រពឹតកាងក្រោយចំហៀងខាងឆ្វេង តែមិនមានគ្រោះថ្នាក់ដល់មនុស្សនោះទេ ។
ដោយឡែកខាងម៉ូតូវិញរងការខូចខាត ផ្នែកខាងបន្តិចបន្តួច ចំណែកមនុស្សរងរបួសរលាត់ដៃរលាត់ជើងតិចតួច មិនបានទៅមន្ទីពេទ្យ ។ ភ្លាមៗនោះដែរភាគីខាងរថយន្ត បានទាមទារឲ្យខាងម៉ូតូសងសំណង តែពេលនោះដែរ ខាងម៉ូតូអត់មានដំណោះស្រាយនោះទេ គឺរង់ចាំសាច់ញាតិមកជួយដោះស្រាយ ។
ក្រោយពេលកើតហេតុ សមត្ថកិច្ចជំនាញបានចុះទៅកន្លែងកើតហេតុ រួចហើយភាគីសាច់ញាតិខាងម៉ូតូក៏បានមកដល់ និងបានធ្វើការសម្របសម្រួលជាមួយ និងខាងរថយន្តម្ខាងទៀត ដោយខាងរថយន្តទាមទារសំណង១០០ដុល្លារ តែពេលនោះខាងម៉ូតូបានសុំសង៧០ដុល្លារ ដើម្បីបញ្ចប់រឿង ៕
ចែករំលែកព័តមាននេះ