បើបុរសរូបណាបានសង្គ្រោះបុត្រនិងភរិយា រមែងបានគ្រប់គ្រងគ្រួសារដោយសុខសួស្តីឥតមានទាស់ទែងខ្វែងគំនិតគ្នារហូតដល់ទីបំផុតនៃជីវិតរៀងៗខ្លួន ទាំងបានសេចក្តីកោតសរសើរអំពីជនជាបណ្ឌិតទាំងឡាយ សូម្បីទេវតាក៏ខានសរសើរមិនបាន និងបានជាទីគោរពរាប់អានពីព្រះឥន្ទ្រាធិរាជផងដែរ ។
បុត្រដែលមាតាបិតាគួរសង្គ្រោះនោះមាន៣ពួកគឺ អតិជាតបុត្ត កូនជាន់ខ្ពស់មាននិស្ស័យវាសនាប្រសើរជាងមាតាបិតា អាចដឹកនាំមាតាបិតាជាអ្នកកំណាញ់ស្វិតឱ្យចេះធ្វើទាន នាំមាតាបិតាដែលជាអ្នកទ្រុស្តសីលឱ្យរក្សាសីល នាំមាតាបិតាដែលល្ងង់ខ្លៅឱ្យចេះដឹងមានបញ្ញាស្គាល់ទោសគុណបាបបុណ្យ ដែលលោកចាត់ថាជាកូនលើកមុខមាត់វង្សត្រកូលឪពុកម្តាយ ។ អនុជាតបុត្ត បុត្រជាន់មធ្យមមាននិស្ស័យវាសនាស្មើនឹងមាតាបិតា លុះក្នុងអំណាចនៃការទូន្មានប្រៀនប្រដៅ និងការដឹកនាំនៃមាតាបិតាគឺបុត្រនេះងាយប្រៀនប្រដៅឱ្យលុះក្នុងគន្លងដំបូន្មាន ។ ចំណែកឯអវជាតបុត្ត កូនជាន់ទាបជាកូនគម្រក់មិនលុះក្នុងដំបូន្មានប្រៀនប្រដៅរបស់មាតាបិតា គឺកូននេះខូចបំផុតតាំងពីក្មេងរហូតដល់ចាស់ស្លាប់ ។ បុត្រទាំង៣ពួកនេះគួរមាតាបិតាសង្គ្រោះដោយស្ថាន៥យា៉ងដូចគ្នា ។
ឯភរិយាមាន៧ពួកគឺ អយ្យាភរិយា ភរិយាលើកតម្កើងតែខ្លួនឯងទុកស្វាមីដូចជាខ្ញុំបម្រើ១ ចោរីភរិយា ភរិយាដូចជាចោរលួចទ្រព្យសម្បត្តិរបស់ស្វាមី១ មាតាភរិយា ភរិយាដែលផ្គត់ផ្គង់ស្វាមីដូចមាតាទំនុកបម្រុងកូន១ ភគិនីភរិយា ប្រពន្ធដែលមានចិត្តពិតត្រង់ស្មោះចំពោះស្វាមី១ ទាសីភរិយា ភរិយាដែលគោរពប្រតិបត្តិបម្រើស្វាមី ដូចជាអម្ចាស់គឺខ្លាចប្តីដូចជាខ្លាចម្ចាស់១ សខាភរិយា ភរិយាដែលស្រឡាញ់ប្តីដូចជាមិត្តសម្លាញ់១ និងវធកាភរិយា-ប្រពន្ធចាំមើលតែទោសប្តីដូចជាសត្រូវ១ ។
ភរិយាទាំង៧ពួកនេះមិនថាភរិយានោះជាស្រីប្រភេទណាទេ ស្វាមីគួរសង្គ្រោះដោយស្ថានប្រាំយា៉ងដែរគឺ ពោលសម្តីពីរោះផ្អែមល្ហែមទន់ភ្លន់ ដោយការរាប់អានដ៏ស្មោះចំពោះភរិយា១ មិនមើលងាយភរិយាធ្វើទុក្ខបុកម្នេញដូចជា ទាសី១ មិនប្រព្រឹត្តក្បត់ចិត្តភរិយា១ ផ្គត់ផ្គង់ផ្គាប់ចិត្តដោយគ្រឿងតុបតែងកាយគ្រប់ប្រដាប់១ និងប្រគល់គ្រឿងឥស្សរិយយសដាច់មុខជាមេផ្ទះ១ ។
ចែករំលែកព័តមាននេះ