ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា ផ្ទះ១ខ្នងរបស់បងប្អូនខ្មែរអ៊ិស្លាម សង់ពីឈើប្រក់ស័ង្កសី ត្រូវបានភ្លើងត្របាក់អស់គ្មានសល់ កើតឡើងកាលពីវេលាម៉ោង០៨ និង៤៥នាទីយប់ថ្ងៃទី១១ មិថុនា ត្រង់ចំណុចភូមិបឹងតាស្រី…
ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា ផ្ទះ១ខ្នងរបស់បងប្អូនខ្មែរអ៊ិស្លាម សង់ពីឈើប្រក់ស័ង្កសី ត្រូវបានភ្លើងត្របាក់អស់គ្មានសល់ កើតឡើងកាលពីវេលាម៉ោង០៨ និង៤៥នាទីយប់ថ្ងៃទី១១ មិថុនា ត្រង់ចំណុចភូមិបឹងតាស្រី ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ ។
សេចក្តីរាយការណ៍បន្តថា ម្ចាស់ផ្ទះខាងលើឈ្មោះសាន់ ឌត ភេទប្រុស អាយុ៥៧ឆ្នាំ មានប្រពន្ធឈ្មោះ ម៉ៃ គ្រួសារនេះ មានសមាជិកសរុបចំនួន៧នាក់ ។ ប៉ុន្តែយ៉ាងណា អគ្គិភ័យនេះ មិនបង្កឱ្យមានមនុស្សរងគ្រោះថ្នាក់ឡើយ តែឆេះសម្ភារៈប្រើប្រាស់ និងថវិកាខ្ទេចគ្មានសល់ ដូចជាទូរទស្សន៍២៤អ៊ុីញ១គ្រឿង, កង់១គ្រឿង, លុយខ្មែរ១លានរៀល, លុយដុល្លារ៥០០ និងកងដៃប្លាទីន៤ជីផងដែរ ។
ប្រភពបន្តថា ចំពោះមូលហេតុ ត្រូវសង្ស័យថាបណ្តាលមកពីទុស្សេខ្សែភ្លើង ។ ដើម្បីជាភាពចាំបាច់ មិនយូរប៉ុន្មាន ក៏មានខាងកាកបាទក្រហមសាខាខេត្តព្រះសីហនុ នាំយកអំណោយសង្គ្រោះបន្ទាន់ មានទាំងគ្រឿងឧបភោគ បរិភោគ តង់ កន្ទេល មុងភួយ រួមទាំងថវិកា ។ល។ យកទៅប្រគល់ជូនភ្លាមៗទៅដល់ជនរងគ្រោះដើម្បីសង្គ្រោះបឋម ។
ចែករំលែកព័តមាននេះ