ជនបរទេសម្នាក់បានវាក់អើជាមួយវ៉ូងគោរហូតរបួសបាក់ដៃម្ខាង

ថ្ងៃទី ១១ ខែ មិថុនា ឆ្នាំ ២០១៨

ម៉ោង ១៥:២៤

ខេត្តកំពត ៖ ជនបរទេសម្នាក់ដែលគេដឹងថា ជាជនជាតិអាមេរិកកាំងបានជិះម៉ូតូអាយខន ពណ៌ស គ្មានស្លាកលេខ ក្នុងទិសដៅពីលិចទៅកើត កាលពីរសៀលថ្ងៃទី១០ ខែមិថុនា ឆ្នាំ ២០១៨ លើកំណាត់ផ្លូវជាតិលេខ៣កំពត- វារេញ ស្ថិតក្នុងភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពត ។

លុះមកដល់ចំណុចកើតហេតុចៃដន្យមានហ្វូងគោរត់កាត់មុខម៉ូតូធ្វើឲ្យជនរងគ្រោះវាក់អើ និងគោនោះក៏ចាប់ហ្វ្រាំងម៉ូតូទាំងបង្ខំ បណ្តាលឲ្យដួលនៅលើថ្នល់អូសជិត១០ម៉ែត្រ ហើយរងរបួសបាក់ដៃខាងឆ្វេងម្ខាង ។
សមត្ថកិច្ចនគរបាលចរាចរណ៍ខេត្តបានឲ្យដឹងថា ជន រងគ្រោះមានឈ្មោះ BEOT HOUK (ប៊ឹត ហ៊ុក) ភេទប្រុស អាយុ៦៧ឆ្នាំ ជនជាតិអាមេរិកកាំង ស្នាក់នៅភូមិ១ឧសភា សង្កាត់កំពង់កណ្តាល ក្រុងកំពត ។
សមត្ថកិច្ចបានឲ្យដឹងទៀតថា ក្រោយពីកើតហេតុកម្លាំងសមត្ថកិច្ចនគរបាលការិយាល័យចរាចរណ៍ផ្លូវគោកបានជួយអន្តរាគមន៍ដឹកជនរងគ្រោះជាជនបរទេសរូបនេះ ទៅសង្គ្រោះ និងព្យាបាល របួសនៅមន្ទីរពេទ្យស៊ុនយ៉ាឃៀលចំការដូង ស្ថិតក្នុងឃុំបឹងទូក ស្រុកទឹកឈូ ។

ប្រភពព័ត៌ពីកន្លែងកើតហេតុបានលើកឡើងថា ជុំវិញករណីគ្រោះថ្នាក់ចរាចរណ៍ចំពោះជនបរទេសខាងលើ ក៏មានប្រភពពីប្រជាពលរដ្ឋ និងមហាជនខ្លះបានរិះគន់មកលើនគរបាលប៉ុស្តិ៍រដ្ឋបាលដែលនៅជិតកន្លែងកើតហេតុខាងលើថា ហាក់ដូចជាមិនយកចិត្តទុកដាក់ចំពោះហេតុការដែលកើតឡើងខាងលើនេះសោះ គេឃើញជនរងគ្រោះជួបហេតុការណ៍តាំងពីម៉ោង៣និង១៥រសៀលរហូតដល់ម៉ោងជិត៧យប់ទើបមានកម្លាំងសមត្ថកិច្ចប៉ុស្តិ៍ និងចរាចរណ៍ខេត្តទៅដល់កន្លែងកើតហេតុ ហើយបានយកជនរងគ្រោះទៅសង្គ្រោះមន្ទីរពេទ្យខាងលើក្នុងឃុំកើតហេតុខាងលើ ។

ចំពោះម៉ូតូពុំមានរងការខូចខាតធ្ងន់ធ្ងរនោះទេ ហើយក៏ត្រូវបានសមត្ថកិច្ចប្រគល់ជូនម្ចាស់របស់ខ្លួនវិញ ៕