ខេត្តបន្ទាយមានជ័យ ៖ មន្ត្រីកាំកុងត្រូលខេត្តបន្ទាយមានជ័យបានលើកឡើងដោយផ្អែកលើរបាយការណ៍ថា ក្នុងរយៈពេល៥ខែឆ្នាំ២០១៨នេះ មន្ត្រីកាំកុងត្រូលចុះពិនិត្យទំនិញតាមទីផ្សារបានចំនួន១២លើក និងកម្ទេចទំនិញខូចគុណភាពបាន៦៩៣គីឡូក្រាម ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្ត បានមានប្រសាសន៍នៅក្នុងកិច្ចប្រជុំពង្រឹងការងារ ដែលបានរៀបចំឡើងកាលពីថ្ងៃទី៧ មិថុនា ថា មន្ត្រីសាខាកាំកុងត្រូលខេត្តបានចុះត្រួតពិនិត្យទំនិញតាមទីផ្សារ និងស្តង់លក់ដូរ ដោយបានរកឃើញទំនិញខូចគុណភាព ដែលត្រូវដកហូតទៅកម្ទេចចោលមានចំនួនសរុប៦៩៣គីឡូក្រាមនៅច្រកទ្វារអន្តរជាតិប៉ោយប៉ែត ព្រមទាំងទំនិញហួសកាលបរិច្ឆេទចំនួន២.៨០៨គីឡូក្រាម ។
លោកបានបញ្ជាក់ថា ៖« ទំនិញដែលដកហូតបាននោះ មានទំនិញខូចគុណភាព និងមិនប្រក្រតីសរុប៣.៥០១គីឡូក្រាម ។ ដោយឡែក ការវិភាគរកសារធាតុគីមីពុលសំណល់ថ្នាំកសិកម្មនៅមន្ទីរពិសោធន៍ខ្នាតតូចបានចំនួន៥៩គំរូ ក្នុងនោះមានប្រភេទបន្លែ៤៥គំរូ និងផ្លែឈើ១៤គំរូ ព្រមទាំងបានណែនាំអាជីវករធ្វើអាជីវកម្មបិទតម្លៃលើមុខទំនិញ និងសេវាកម្មគ្រប់ប្រភេទជាប្រាក់រៀល » ។
លោកបានបញ្ជាក់ថា ការចុះពិនិត្យតាមទីផ្សារក្នុងខេត្តបន្ទាយមានជ័យ គឺចុះធ្វើជាប្រចាំ ដើម្បីពិនិត្យរកទំនិញដែលមានសារធាតុគីមី ហួសកាលបរិច្ឆេទ និងខូចគុណភាព។ នេះជាការយកចិត្តទុកដាក់ចំពោះសុខុមាលភាពបងប្អូនប្រជាពលរដ្ឋ ហើយមន្ត្រីជំនាញកំពុងយកចិត្តទុកដាក់ត្រួតពិនិត្យទំនិញដែលនាំចូលពីប្រទេសថៃមកកម្ពុជាផងដែរ ។
លោកថា ៖« នៅក្នុងការចុះពិនិត្យនោះ មន្ត្រីកាំកុងត្រូវបានណែនាំដល់បងប្អូនប្រជាពលរដ្ឋត្រូវចូលរួមលក់ដូរទំនិញគ្មានសារធាតុគីមី ដែលប៉ះពាល់សុខភាពប្រជាពលរដ្ឋ ហើយកម្លាំងដែលឈរជើងតាមបន្ទាត់ព្រំដែន ត្រូវរួមគ្នាទប់ស្កាត់រាល់ទំនិញនាំចូលពីប្រទេសជិតខាងមានសារធាតុគីមី និងខូចគុណភាព » ។
ក្នុងឱកាសនោះដែរ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ណែនាំដល់មន្ត្រីមន្ទីរពាណិជ្ជកម្មខេត្ត ត្រូវសហការជាមួយសាខាកាំកុងត្រូលខេត្ត និងសមត្ថកិច្ចជំនាញ ចុះពិនិត្យទំនិញតាមទីផ្សារជាប្រចាំ និងទប់ស្កាត់ទំនិញខូចគុណភាពលួចនាំចូលពីប្រទេសជិតខាងឲ្យបាន និងណែនាំដល់អាជីវករដែលធ្វើអាជីវកម្មចំណីអាហារមិនឲ្យមានសារធាតុគីមី ៕
ចែករំលែកព័តមាននេះ